وزیراعلی منوہر لال کھٹر نے کہا کہ لال قلعہ پر قومی جھنڈے کے علاوہ کوئی دیگر جھنڈا لہرایا جانا کوئی بھی ہندوستانی برداشت نہیں کرسکتا۔ ایسا کرنا ان مجاہدین آزادی اور امر شہدا کی توہین ہے جنہوں نے لال قلعہ پر ترنگا لہرانے کے لئے اپنی جان تک قربان کردی۔

چندی گڑھ: ہریانہ کے وزیراعلی منوہر لال کھٹر نے دہلی میں خاص طور پر لال قلعہ پر ہوئے واقعات کی سخت مذمت کرتے ہوئے کہا کہ کسان تحریک اب اس کے لیڈروں کے کنٹرول سے باہر ہونے کے ساتھ ہی اپنی سمت سے بھٹک چکی ہے۔

مسٹر کھٹر نے منگل کی دیر شام بلائی کابینہ کی خصوصی میٹنگ کے بعد دہلی میں یوم جمہوریہ پر ہوئے واقعات کے سلسلہ میں یہ رد عمل ظاہر کیا۔ انہوں نے کسانوں سے بھی اپیل کی کہ کل کے افسوسناک واقعات کے بعد وہ اپنے گھر واپس چلے جائیں۔ انہوں نے کہا کہ پوری کابینہ اس بات پر ایک رائے ہے کہ اس وقت ریاست کے عوام متحد ہوکر غیر سماجی عناصر کے ناپاک ارادوں کو ناکام کریں اور ملک اور ریاست میں امن قائم رکھنے میں تعاون کریں۔

لال قلعہ پر قومی جھنڈے کے علاوہ کوئی جھنڈا لہرانا ناقابل برداشت

وزیراعلی نے کہا کہ لال قلعہ پر قومی جھنڈے کے علاوہ کوئی دیگر جھنڈا لہرایا جانا کوئی بھی ہندوستانی برداشت نہیں کرسکتا۔ ایسا کرنا ان مجاہدین آزادی اور امر شہدا کی توہین ہے جنہوں نے لال قلعہ پر ترنگا لہرانے کے لئے اپنی جان تک قربان کردی۔ انہوں نے کہا کہ مجاہدین آزادی نے آزادی اس طرح کی افراتفری پھیلانے کے لئے نہیں دلائی تھی۔

انہوں نے کہا کہ کسان تنظیموں نے دہلی میں پر امن مظاہرہ کا یقین دلایا تھا لیکن اس واقعہ نے ثابت کردیا ہے کہ تحریک کی قیادت ان ہاتھوں میں چلی گئی ہے جن کے کہنے اور کرنے میں فرق ہے۔ اس لئے اب کسان بھائیوں کو اس موضوع پر باریکی سے غور و خوض کرنا چاہئے کہ تحریک کس سمت میں جارہی ہے۔انہوں نے کہا کہ جمہوریت میں اختلافات دور کرنے کی کافی گنجائش ہے لیکن انہیں مل بیٹھ کر ہی دور کیا جاسکتا ہے۔

یہ بھی پڑھیں:

دہلی پولیس کی کسانوں سے واپس لوٹنے کی اپیل

صرف 2 روپے سالانہ فیس پر سیکڑوں بچوں کو ٹیوشن دینے والے سوجیت چٹوپادھیائے کو حکومت ہند نے تیسرے سب سے بڑے شہری اعزاز ’’پدم بھوشن‘‘ ایوارڈ سے نوازنے کا اعلان کیا ہے۔

کلکتہ: بردوان ضلع کے ایک دیہی گاؤں میں صرف دو روپے سالانہ فیس پر بچوں کو ٹیوشن دینے والے سوجیت چٹو پادھیائے کو اس سال حکومت ہند نے تیسرے سب سے بڑے شہری اعزاز ’’پدم بھوشن‘‘ ایوارڈ سے نوازنے کا اعلان کیا ہے۔ بردوان ضلع میں تو وہ پہلے سے ہی مشہور و معروف تھے مگر اب پدم بھوشن ایوارڈ کا اعلان ہونے کے بعد ان کی شہرت بردوان سے نکل کر ملک کے دوسرے شہروں اور نیوز چینلوں اور اخبارات کی سرخیوں تک میں پہنچ گیا ہے۔

سوجیت چٹو پادھیائے 15سال قبل سرکاری ٹیچر کے عہدہ سے ریٹائر ہوگئے تھے۔ مگر ملازمت سے سبکدوش ہونے کے باوجود انہوں نے تعلیم و تعلم کا سلسلہ بند نہیں کیا۔ بردوان ضلع میں ایک سبجیکٹ کے ٹیوشن کی سالانہ فیس کم سے کم 2 ہزار روپے ہے۔ مگر سوجیت چٹو پادھیائے صرف دو روپے سالانہ کے معمولی فیس پر سیکڑوں بچوں کو پڑھاتے ہیں۔

دو روپے فیس کیوں لیتے ہیں کے سوال پر سوجیت چٹوپادھیائے کا جواب

دو روپے فیس کیوں لیتے ہیں کے سوال پر سوجیت چٹو پادھیائے کہتے ہیں کہ یہ گرودکشنا کے طور پر فیس لی جاتی ہے۔ انہوں نے کہا کہ اس کے بغیر تعلیم مکمل نہیں ہوسکتی ہے۔ انہوں نے کہا کہ جب طالب علم دو روپے دیتا ہے تو وہ جھک کر آشیرواد لیتا ہے اور اس کی برکت سے وہ کامیاب ہوتا ہے اور ان بچوں کو احساس بھی ہوتا ہے کہ انہیں مفت میں تعلیم نہیں دی گئی ہے۔

سوجیت چٹو پادھیائے مشرقی بردوان ضلع کے آش گرام جوبیر بھوم ضلع سے متصل ہے کے شمالی رام نگر گاؤں کے رہنے والے ہیں۔ وہ ایک کچے مکان میں رہتے ہیں۔ اس گاؤں سے کافی دوری پر اسکول واقع ہے۔ سوجیت چٹو پادھیائے کی ابتدائی تعلیم گاؤں کے رام نگر جونیئر ہائی اسکول میں ہوئی تھی۔ اس کے بعد بولپور کے باندھ گڑھ ہائی اسکول سے ہائر سیکنڈری پاس کی۔ بردوان راج کالج سے گریجویشن کرنے کے بعد، انہوں نے بردوان یونیورسٹی سے ایم اے پاس کیا۔ جلپائی گوڑی سے بی ٹی پاس کی اور اپنے کیریئر کا آغاز 1985 میں 22 سال کی عمر میں کیا۔ رام نگر ہائی اسکول میں درس و تدریس کا آغاز ہوا۔ یہ گاؤں جو نوبل انعام یافتہ ماہر معاشیات امرتیہ سین کے آبائی گاؤں کے قریب ہے۔ تقریبا چالیس سال تک خدمت انجام دینے کے بعد 2004 میں ریٹائرڈ ہوگئے۔

دوران تدریس بھی غریب بچوں کو مفت میں ٹیوشن دیتے تھے

علاقے میں کم آمدنی والے خاندانوں کی تعداد زیادہ ہے۔ جس وقت سوجیت چٹو پادھیائے تدریس سے جڑے ہوئے تھے اس وقت بھی وہ اپنے گاؤں اور آس پاس کے غریب بچوں کو مفت میں ٹیوشن دیتے تھے۔ اسکول کے ایک کمرے میں وہ چھٹی کے بعد معاشی طور پر کمزور بچے جو ٹیوشن نہیں پڑھ سکتے ہیں کو ٹیوشن دیا کرتے تھے۔ ریٹائر ہونے کے بعد انہو ں نے اسکول انتظامیہ سے درخواست دی کہ انہیں بغیر تنخواہ کے پڑھانے اور اسکول کی چھٹی کے بعد بچوں کو ٹیوشن دینے کی اجازت دی جائے۔ اسکول انتظامیہ نے اس درخواست کو منظور کرلیا۔

سوجیت چٹو پادھیائے نے فون پر بتایا کہ آس پاس کے گاؤں کے بچے ان کے یہاں ٹیوشن پڑھنے کے لئے آتے ہیں تو جب میں ان بچوں سے فیس سے متعلق بات کرتا ہوں تو ان کے چہرے کے رنگ فک ہو جاتے تھے مگر جب میں انہیں بتاتا انہیں بس سال کے اخیر میں امتحان سے قبل دو روپے فیس دینے ہوں گے ان بچوں کے چہرے خوشی سے کھل اٹھتے۔

اتنی کم فیس لینے سے متعلق وہ کہتے ہیں ایک ایک طالب علم کو تین سے چار ٹیوشن لینے پڑتے ہیں۔ ان میں بہت سے غریب والدین ہیں جو اس کو خرچ کو برداشت کرنے کے متحمل نہیں ہو سکتے ہیں۔ ٹیوشن کے علاوہ دوسرے اخراجات بھی ہیں۔ اگر میں دوسروں کی طرح ٹیوشن فیس لیتا ہوں تو وہ مشکل میں آجائیں گے۔ شاید بہت سے بچے تعلیم کا سلسلہ منقطع کردیں گے۔ میرے لئے ان بچوں کے چہرے پر مسکراہٹ کی چمک ہزاروں روپے لینے سے کہیں زیادہ بہتر ہے اور یہی میری فیس ہے ان بچوں کے چہرے پر مسکراہٹ دیکھ سکوں۔

امریکی صدر جو بائیڈن اور روسی صدر ولادیمیر پتن نے یوکرین میں جاری تنازع کے علاوہ افغانستان اور روسی اپوزیشن لیڈر الیکسی نویلنی کو مبینہ طور پر زہر دیئے جانے سمیت کئی دیگر بین الاقوامی اہمیت کے امور پر بھی تبادلہ خیال کیا۔

واشنگٹن: امریکی صدر جو بائیڈن اور روسی صدر ولادیمیر پتن نے تکنیکی ہتھیاروں میں تخفیف کرنے والے معالدے (نیو اسٹارٹ) کو آگے بڑھانے کے علاوہ دیگر دو فریقی اور بین الاقوامی اہمیت کے حامل امور پر تبادلہ خیال کیا ہے۔

وائٹ ہاؤس کی پریس سکریٹری جین ساکی نے منگل کو صحافیوں کو اس بات کی اطلاع دیتے ہوئے کہا ’’صدر بائیڈن نے روس کے صدر ولادیمیر پوتن کو فون کرکے ان کے ساتھ دونوں ممالک کے درمیان تکنیکی ہتھیاروں میں کمی کرنے والے معاہدے (نیو اسٹارٹ) کو پانچ برس کے لئے آگے بڑھانے کے علاوہ دیگر دو فریقی اور بین الاقوامی اہمیت کے حامل امور پر تبادلہ خیال کیا‘‘۔

محترمہ ساکی نے کہا کہ دونوں لیڈروں نے یوکرین میں جاری تنازع کے علاوہ افغانستان اور روسی اپوزیشن لیڈر الیکسی نویلنی کو مبینہ طور پر زہر دیئے جانے سمیت کئی دیگر بین الاقوامی اہمیت کے امور پر بھی تبادلہ خیال کیا۔

ٹریکٹر ریلی کے دوران مکربا چوک، ٹرانسپورٹ نگر، آئی ٹی او اور اکشردھام سمیت دیگرمقامات پر ہوئے تصادم کے درمیان کسانوں کا ایک جتھا لال قلعہ احاطے میں پہنچ کر کسانوں کا جھنڈا لہرادیا ہے۔

نئی دہلی: دہلی پولیس نے مشتعل کسانوں سے اپیل کی ہے کہ وہ تشدد کا راستہ چھوڑیں اور امن برقرار رکھیں اور اپنے طے شدہ راستوں سے واپس لوٹ جائیں۔

دہلی پولیس نے منگل کو ایک بیان جاری کرکے کہا ہے کہ آج کی ٹریکٹر ریلی کے لئے دہلی پولیس نے کسانون کے ساتھ طے ہوئی شرائط کے مطابق کام کیا اور ضروری بندوبست کیا۔

دہلی پولیس آخر تک کافی تحمل کا مظاہرہ کیا لیکن مشتعل کسانوں نے طے شرائط کو ماننے سے انکار کردیا اور طے وقت سے پہلے ہی اپنی مارچ شروع کردی اور مظاہرین نے تشدد و توڑ پھوڑ کا راستہ چنا۔

انہوں نے بتایا کہ مشتعل کسانوں کی تخریب کاری کے پیش نظر دہلی پولیس نے امن و امان برقرار رکھنے کے لئے تحمل کے ساتھ ضروری اقدامات کیے۔ اس تحریک نے عوامی املاک کو بہت نقصان پہنچایا ہے اور متعدد پولیس اہلکار زخمی بھی ہوئے ہیں۔ مشتعل افراد سے اپیل ہے کہ وہ تشدد کا راستہ ترک کریں اور امن برقرار رکھیں اور اپنے طے شدہ راستوں سے واپس لوٹ جائیں۔

کسان ریلی کے دوران متعدد مقامات پر جھڑپیں

واضح رہے کہ کسان ریلی کے دوران کسانوں نے متعدد مقامات پر بیریکیڈ توڑ کر دہلی میں داخل ہوئے اور اس دوران آئی ٹی او، مقبرہ چوک، نانگلوئی سمیت متعدد مقامات پر جھڑپیں ہوئیں جس میں کچھ کسان اور پولیس اہلکار زخمی ہوگئے۔

ٹریکٹر ریلی کے دوران مکربا چوک، ٹرانسپورٹ نگر، آئی ٹی او اور اکشردھام سمیت دیگرمقامات پر ہوئے تصادم کے درمیان کسانوں کا ایک جتھا لال قلعہ احاطے میں پہنچ کر کسانوں کا جھنڈا لہرادیا ہے۔ آئی ٹی او پر ٹکراو کے دوران بڑی تعداد میں کسانوں نے لال قلعہ احاطہ میں داخل ہوکر اپنا جھنڈا لہرا دیا۔ پندرہ اگست کو جس مقام پر جھنڈا لہرایا جاتا ہے اس کے پاس ہی کسانوں نے اپنا پرچم لگادیا۔

کسان ریلی: کسانوں کی مکربا چوک پر پولیس کے ساتھ جھڑپ ہوئی۔ پولیس نے آنسوں گیس کے گولے چھوڑے اور لاٹھی چارج کی۔ اس دوران کچھ پولیس اہلکار اور کچھ کسان بھی زخمی ہوئے۔

نئی دہلی: زرعی قانون کے خلاف پچھلے دو مہینوں سے تحریک کرنے والے کسانوں کی مکربا چوک پر پولیس کے ساتھ جھڑپ ہوئی اور حالات پر قابو پانے کے لئے پولیس نے آنسوں گیس کے گولے چھوڑے اور لاٹھی چارج کی۔ اس کے ساتھ اکشردھام کے پاس بھی کسانوں کو آگے بڑھنے سے روکنے کے لئے پولیس نے آنسوں گیس کے گولے چھوڑے۔

کسانوں نے سنگھو بارڈر کے پاس پولیس کے ذریعہ طے وقت سے پہلے زبردستی بیریکیڈ توڑ کر آگے بڑھنے کی کوشش کی۔ پولیس نے مکربا چوک پر بھاری بندوبست کیا تھا تاکہ کسانوں کو دوسرے راستے پر موڑا جا سکے۔ مکربا چوک پر بیری کیڈنگ توڑ کر کچھ کسان آؤٹر رنگ روڈ کی طرف کوچ کر گئے ہیں۔ اس سے پہلے سنجے گاندھی ٹرانسپورٹ نگر میں کسانوں کو تتربتر کرنے کے لئے پولیس آنسو گیس کا استعمال کیا۔

سنگھو بارڈر سے کسانوں کی ٹریکٹر ریلی یہاں پہنچی تھی۔ پولیس نے کسانون کو آؤٹر رنگ روڈ کی طرف بڑھنے سے روکنے کے لئے آنسو گیس کے گولے چھوڑے اور لاٹھیاں چلائیں لیکن کسان پولیس بندوبست کو توڑتے ہوئے آگے بڑھ گئے۔ اس دوران کچھ پولیس اہلکار اور کچھ کسان بھی زخمی ہوئے۔

واضح رہے کہ پولیس افسروں اور کسانوں کے درمیان کئی مرحلوں کی بات چیت کے بعد ٹریکٹر ریلی کو اجازت دی گئی تھی۔ اس کے لئے وقت اور راستہ بھی طے کیا گیا تھا لیکن کسان دونوں کی خلاف ورزی کرتے ہوئے آگے بڑھے جس کی وجہ سے کچھ مقامات پر تصادم ہوا۔

ترنمول کانگریس کے سینئر لیڈر ڈیرک او برائن نے کہا کہ 29 جنوری سے شروع ہونے والے پارلیمنٹ کے بجٹ اجلاس میں مرکزی حکومت کو تینوں زرعی قوانین کو منسوخ کرنے اور اسے ایکٹ میں تبدیل کرنے کے لئے ایک بل پیش کرنا چاہئے۔

کلکتہ: ترنمول کانگریس نے پیر کو مطالبہ کیا کہ مرکزی حکومت زرعی قوانین کو منسوخ کرنے کے لئے آئندہ بجٹ اجلاس میں ایک نیا بل لائے۔

ترنمول کانگریس کے سینئر لیڈر ڈیرک او برائن نے پیر کو میڈیا سے خطاب کرتے ہوئے کہا کہ پارلیمنٹ کا بجٹ اجلاس 29 جنوری سے شروع ہونا ہے۔ انہوں نے کہا کہ سبھی جانتے ہیں کہ تینوں زرعی قوانین پر ترنمول کانگریس کا کیا موقف ہے۔ ممتا بنرجی کی زمین اور کسانوں کے معاملے سے وابستگی ہے۔

راجیہ سبھا میں جمہوریت کا قتل کیا گیا تھا

انہوں نے مزید کہا کہ پارلیمنٹ کے آئندہ اجلاس میں مرکزی حکومت کو تینوں زرعی قوانین کو منسوخ کرنے اور اسے ایکٹ میں تبدیل کرنے کے لئے ایک بل پیش کرنا چاہئے۔ او برائن نے کہا کہ راجیہ سبھا میں جمہوریت کا قتل کیا گیا تھا۔ حکومت کو ایک بل پیش کرنا چاہئے اور تینوں زرعی قوانین کو منسوخ کرنا چاہئے۔ ترنمول لیڈر نے وزیر اعظم کسان یوجنا کا موازنہ مغربی بنگال میں ترنمول کانگریس حکومت کے ذریعہ چلائے جانے والے کرشک بانڈو اسکیم سے کیا۔

او برائن نے کہا کہ کرشک بانڈو یوجنا کے تحت، ایک کسان کو ایک ایکڑ پر 5 ہزار روپئے، جبکہ وزیر اعظم کسان یوجنا کے تحت ایک کسان کو ایک ایکڑ پر 214 روپے ملتے ہیں۔ او برائن نے کسانوں کے لئے ریاستی حکومت کے ذریعہ چلانے والی اسکیم کے دیگر اہم نکات پر روشنی ڈالتے ہوئے کہا کہ بنگال میں تمام کسانوں کے لئے گنجائش موجود ہے، جب کہ مرکزی اسکیم کے تحت کسانوں کے چھوٹے طبقے کو فائدہ ملے گا۔

انہوں نے کہا کہ ریاست میں کسان بھائیوں کی کوریج 100 فیصد ہے، جبکہ وزیر اعظم کسان کی کوریج صرف 92 فیصد ہے۔ او برائن نے کہا کہ اگر 18 سے 60 سال کے درمیان کاشتکار کرشک بندھو اسکیم کے تحت مر جاتا ہے تو اس کے کنبے کو 2 لاکھ روپے کا فائدہ ہوتا ہے، لیکن وزیر اعظم کسان یوجنا کے تحت ایسی کوئی اسکیم نہیں ہے۔

چینی فوجیوں نے پھر سے ہندوستانی سرحد میں داخل ہونے کی کوشش کی جسے ہندوستانی فوجیوں نے ناکام بنا دیا اور چینی فوجیوں کو کرارا جواب دیا۔

نئی دہلی: گزشتہ کافی طویل عرصے سے مشرقی لداخ خطے میں لائن آف کنٹرول پر کشیدگی کے درمیان بدھ کے روز ہندوستان اور چین کی فوجوں کے درمیان سکم میں پھر سے جھڑپ ہوئی۔ تاہم، فوج کا کہنا ہے کہ یہ معمولی جھڑپ تھی اور مقامی کمانڈروں کی سطح پر مسئلے کو حل کرلیا گیا ہے۔

دونوں ملکوں کے فوجیوں کے مابین تازہ جھڑپوں سے متعلق میڈیا رپورٹوں پر صورتحال کی وضاحت کرتے ہوئے فوج نے آج کہا کہ شمالی سکم کے نکولہ میں بدھ کے روز دونوں طرف کے فوجیوں کے درمیان معمولی جھڑپ ہوئی۔ دونوں اطراف کے مقامی کمانڈروں نے معاملے کو طے شدہ بندوبست کے تحت حل کرلیا ہے۔

فوجیوں کے مابین تازہ جھڑپیں گزشتہ دس ماہ سے طویل تعطل کو ختم کرنے کے لئے کور کمانڈر کی سطح پر ہونے والی بات چیت سے پہلے ہوئی ہیں۔ غیر مصدقہ اطلاعات میں بتایا گیا ہے کہ جھڑپ میں دونوں اطراف کے فوجی زخمی ہوئے ہیں اور صورتحال کشیدہ مگر قابو میں ہے۔ انہوں نے کہا کہ چینی فوجیوں نے پھر سے ہندوستانی سرحد میں داخل ہونے کی کوشش کی جسے ہندوستانی فوجیوں نے ناکام بنا دیا اور چینی فوجیوں کو کرارا جواب دیا۔

اتوار کے روز دونوں طرف کے کمانڈروں نے 16 گھنٹے سے زیادہ بات چیت کی۔ ذرائع کے مطابق کمانڈروں کی بات چیت میں دونوں ملکوں کے درمیان تعطل کو ختم کرنے کے بارے میں مختلف امور پر تبادلہ خیال کیا گیا۔ انہوں نے کہا کہ مذاکرات میں کافی پیشرفت ہوئی ہے لیکن فوج کو پیچھے ہٹانے کے بارے میں کوئی اتفاق رائے نہیں ہوا ہے۔

اسے بھی پڑھیں:

فوجی کمانڈر مذاکرات: فوجی دستوں کو پیچھے ہٹانے پر اتفاق نہیں ہوسکا

سعودی عرب کے شہر مدینہ منورہ کو عالمی ادارہ صحت (ڈبلیو ایچ او) نے دنیا کے صحت افزا شہروں میں سے ایک شہر قرار دے دیا۔

الریاض: دنیا کے مسلمانوں کے انتہائی مقدس سعودی عرب کے شہر مدینہ منورہ کو ورلڈ ہیلتھ آرگنائزیشن (ڈبلیو ایچ او) نے دنیا کے صحت افزا شہروں میں سے ایک شہر قرار دے دیا۔

عالمی ادارہ صحت کی ایک ٹیم نے مدینہ منورہ کا دورہ کیا اور صحت سے متعلق تمام سہولیات کا جائزہ لیکر قرار دیا کہ صحت مند شہر کیلئے جتنے عالمی معیار طے کئے گئے تھے، مدینہ منورہ ان عالمی معیار پر پورا اترتا ہے۔

مدینہ منورہ کی آبادی 20 لاکھ سے زائد افراد پر مشتمل ہے۔ اس حوالہ سے عالمی ادارہ صحت نے سرٹیفکیٹ بھی جاری کردیا ہے۔

سعودی عرب کے وزیر صحت نے عالمی ادارہ صحت کی جانب سے مدینہ منورہ کو جاری کیا گیا صحت مند شہر کا سرٹیفکیٹ گورنر مدینہ شہزادہ فیصل بن سلمان کو پیش کیا۔

وزارت کی طرف سے جاری ایک بیان میں سیکیورٹی فورسز نے فضائیہ کی مدد سے طالبان کے ٹھکانوں کو نشانہ بنایا اور تقریبا 40 طالبان کو ہلاک کردیا۔