عالمی بازار میں جمعہ کو خام تیل کے بلند ترین سطح پر قائم رہنے کے درمیان پٹرول – ڈیزل کی قیمتوں میں گھریلو سطح پر مسلسل تیسرے دن اضافہ جاری ہے۔

نئی دہلی: عالمی بازار میں جمعہ کو خام تیل کے بلند ترین سطح پر قائم رہنے کے درمیان پٹرول – ڈیزل کی قیمتوں میں گھریلو سطح پر مسلسل تیسرے دن اضافہ جاری ہے۔ سرکاری آئل مارکیٹنگ کمپنیوں نے ہفتے کو مسلسل چوتھے دن ان دونوں کی قیمتوں میں 35-35 پیسے فی لیٹر اضافہ کیا جس کے بعد قومی دارالحکومت نئی دہلی میں پٹرول 108.99 روپے فی لیٹر اور ڈیزل 97.72 روپے فی لیٹر کے اب تک ریکارڈ سطح پر پہنچ گیا۔

اس اضافے کے بعد ممبئی میں پٹرول 114.81روپے اور ڈیزل 105.86 روپے فی لیٹر، مدھیہ پردیش کے دارالحکومت بھوپال میں سب سے مہنگا پٹرول 117.71 روپے فی لیٹر اور ڈیزل 107.13 روپے فی لیٹر، پٹنہ میں پٹرول 112.76 روپے اور ڈیزل بنگلورو میں 104.35 روپے فی لیٹر پٹرول 112.79 روپے اور ڈیزل 103.72 روپے فی لیٹر پر پہنچ گیا ہے۔

کولکاتا میں بھی پٹرول 109.46 روپے فی لیٹر اور ڈیزل 100.84 روپے فی لیٹر پر پہنچ گیا ہے۔ رانچی میں ان دونوں کی قیمتوں میں فرق صرف 11 پیسے ہے۔ پٹرول 103.20 روپے اور ڈیزل 103.20 روپے فی لیٹر ہے۔ نوئیڈا، دہلی این سی آر میں پٹرول کی قیمت 106.12 روپے اور ڈیزل کی قیمت 98.38 روپے فی لیٹر ہے۔

ڈیزل بھی بیشتر شہروں میں سنچری لگا رہا ہے

ابھی ملک کے تمام بڑے شہروں میں پٹرول کی قیمت 105 روپے فی لیٹر سے تجاوز کر گئی ہے۔ ڈیزل بھی بیشتر شہروں میں سنچری لگا رہا ہے۔ اس مہینے میں اب تک 30 دنوں میں سے 23 دنوں میں ان دونوں کی قیمتوں میں اضافہ ہوا ہے۔ اس ماہ اب تک پٹرول 7.35 روپے فی لیٹر اور ڈیزل 7.95 روپے فی لیٹر مہنگا ہو چکا ہے۔

مارکیٹ اسٹڈی اور کریڈٹ ریٹنگ کمپنی گولڈمین سیکس نے اگلے سال تک برینٹ کروڈ 110 ڈالر فی بیرل تک پہنچنے کی رپورٹ کے بعد امریکی بازار میں خام تیل میں تیزی تھی۔

جمعہ کو سنگاپور میں خام تیل کی تجارت اضافے کے ساتھ شروع ہوئی۔ برینٹ کروڈ کی قیمت 83.72 ڈالر فی بیرل پر رہا جبکہ امریکی کروڈ 0.50 فیصد کے اضافے کے ساتھ 83.22 ڈالر فی بیرل پر بند ہوا۔

آئل مارکیٹنگ کمپنی انڈین آئل کارپوریشن کے مطابق دہلی میں پٹرول 108.99 روپے فی لیٹر اور ڈیزل 97.72 روپے فی لیٹر پر پہنچ گیا۔

ان دونوں کی قیمتوں کا روزانہ جائزہ لیا جاتا ہے اور اس کی بنیاد پر ہر دن صبح 6 بجے سے نئی قیمتوں کا نفاذ کیا جاتا ہے۔

ملک کے چار میٹرو شہروں میں آج پٹرول اور ڈیزل کی قیمت اس طرح ہے:

شہر——————پٹرول روپے—————ڈیزل 
دہلی ————— 108.99—————— 97.72
ممبئی-————  114.87—————— 105.86
چنئی ————— 105.74—————— 101.92
کولکتہ ————  109.46—————— 100.84

عالمی مارکیٹ میں مسلسل گراوٹ سے مایوس سرمایہ کاروں کی مقامی سطح پر چوطرفہ فروخت سے گھریلو شیئر بازار میں آج دوسرے دن بھی ہلچل جاری رہی۔

ممبئی: آن لائن مارکیٹ پلیس ایمیزون اور موبائل فون بنانے والی کمپنی ایپل کے کمزور سہ ماہی نتائج کی وجہ سے عالمی مارکیٹ میں مسلسل گراوٹ سے مایوس سرمایہ کاروں کی مقامی سطح پر چوطرفہ فروخت سے گھریلو شیئر بازار میں آج دوسرے دن بھی ہلچل جاری رہی۔

بی ایس ای کا تیس حصص کا حساس انڈیکس سینسیکس 677.77 پوائنٹس گر کر 59,306.93 پوائنٹس اور نیشنل اسٹاک ایکسچینج (این ایس ای) کا نفٹی 185.60 پوائنٹس کا غوطہ لگا کر 17,671.65 پوائنٹس پر رہا۔ تاہم بڑی اور چھوٹی کمپنیوں کے برعکس درمیانے درجے کی کمپنیوں میں خریداری ہوئی۔ بی ایس ای کا اسمال کیپ 107.17 پوائنٹس گر کر 27،982.80 پر رہا، جبکہ مڈ کیپ 41.44 پوائنٹس کے اضافے سے 25،277.72 پر پہنچ گیا۔

بی ایس ای پر کل 3399 کمپنیوں کے حصص کا کاروبار ہوا۔ ان میں سے 1819 کی قیمتوں میں کمی جبکہ 1427 کی قیمتوں میں تیزی رہی جبکہ 153 کی قیمتوں میں کوئی تبدیلی نہیں ہوئی۔ اسی طرح این ایس ای میں 32 کمپنیوں نے غوطہ لگایا جبکہ 18 میں اضافہ ہوا۔

اس دوران، رئیلٹی، دھاتیں، کنزیومر ڈیور بلس، آٹو، ہیلتھ کیئر، بیسک میٹیریل گروپ کی 0.55 فیصد کی تیزی کے علاوہ بقیہ گروپس میں مندی رہی۔ اس دوران ٹیک 1.35، پاور 0.70، آئل اینڈ گیس 0.52، کیپٹل گڈز 0.73، بینکنگ 1.12، یوٹیلٹیز 0.93، ٹیلی کام 0.46، آئی ٹی 1.60، فنانس 0.95 اور گروپ کے حصص میں 1.90 فیصد اضافہ ہوا۔

غیر ملکی منڈیوں میں گراوٹ کا رجحان رہا۔ اس دوران برطانیہ کا ایف ٹی ایس ای 0.35، جرمنی کا ڈیکس 0.90 اور ہانگ کانگ کا ہینگ سینگ 0.70 فیصد اتر گیا۔ جبکہ جاپان کے نکیئی میں 0.25 فیصد اور چین کے شنگھائی کمپوزٹ میں 0.82 فیصد کی تیزی رہی۔

اترپردیش کے کشی نگر میں ایک سڑک حادثے میں دیوریا ضلع کے پانچ نوجوانوں کی موت ہوگئی جبکہ چار زخمی ہیں۔

دیوریا: اترپردیش کے کشی نگر ضلع کے رام پور باگہا کُٹی کے نزدیک ایک سڑک حادثے میں دیوریا ضلع کے پانچ نوجوانوں کی موت ہوگئی جبکہ چار زخمی ہیں۔

پولیس ذرائع نے جمعہ کو بتایا کہ رودرپور قصبے کے شیوالہ وارڈ کے رام کرپال ورما کے بیٹے کی منگنی کی رسم رام کولا مندر میں ہوئی تھی اور اس رسم کے بعد جمعرات کی رات واپس رودرپور آ رہی کار رام کولا علاقے کے رام پور باگہا کٹی کے نزدیک سامنے سے آ رہی ٹریکٹر ٹرالی سے ٹکرا گئی۔

اس حادثے میں پیارے لال کی موقع پر ہی موت ہوگئی جبکہ سنگین طور پر زخمی ابھیشیک ورما، رودریش چوبے، ارباز انصاری، راج اور جیتو مدھیشیا کی میڈیکل کالج گورکھپور لے جاتے وقت راستے میں موت ہوگئی۔ حادثے میں چار نوجوان شیو کمار، منشی، سونو اور پون سنگین طور پر زخمی ہیں جن کا علاج میڈیکل کالج گورکھپور میں ہورہا ہے۔ مرنے والوں نوجوان رودرپور کے رہنے والے ہیں۔ سبھی نوجوان ایک ہی کار میں سوار تھے۔

ممبئی ہائی کورٹ نے آرین خان اور دیگر ملزمین کو بحری جہاز میں منشیات کی ریو پارٹی میں شرکت کرنے اور اسکے استعمال کے معاملے میں مشروط ضمانت پر رہا کئے جانے کا حکم جاری کیا۔

ممبئی: ممبئی ہائی کورٹ نے آج یہاں ٢۵ دنوں کی جیل کی صعوبتیں برداشت کرنے کے بعد بالآخر فلم اداکار شاہ رخ خان کے بیٹے آرین خان اور دیگر ملزمین کو بحری جہاز میں منشیات کی ریو پارٹی میں شرکت کرنے اور اسکے استعمال کے معاملے میں مشروط ضمانت پر رہا کئے جانے کا حکم جاری کیا۔

آرین خان اور اسکے دیگر ساتھیوں کو تین ہفتوں سے قبل ممبئی کے ساحل پر ایک کروز جہاز پر نارکوٹکس کنٹرول بیورو (این سی بی) کے چھاپے کے دوران گرفتار کیا گیا تھا اور ان کے قبضہ سے ۱۳؍گرام کوکین، ۵؍گرام ایم ڈی، ۲۱؍گرام چرس اور ایس ٹی سی نامی منشیات کی ۲۲؍گولیاں و تقریباً ڈیڑھ لاکھ روپیہ نقد ضبط کیا گیا تھا۔

ممبئ ہائی کورٹ کے جج حسٹس نیتن سامبرے نے اپنے یک سطری حکم میں کہا کہ تینوں ملزمین کی درخواست ضمانت کو منظور کر رہی ہے لیکن اپنا مکمل حکم نامہ کل ظاہر کرے گی۔

آرین کو ضمانت پر رہا کرتے ہوئے عدالت نے اس پر مختلف شرائط بھی عائد کرنے کا تذکرہ کیا اور کہا کہ ضمانت کی شرائط بھی کل ہی ظاہر کی جائے گی۔ خان اور اس کے دو دوست ارباز مرچنٹ اور من من دھمیچا کو بھی عدالت نے ضمانت پر رہا کیا ہے۔ دفاعی وکلاء نے عدالت سے نقد رقم ادا کرنے کی بھی درخواست کی جسے عدالت نے یہ کہہ کر مسترد کر دیا کہ کل حتمی فیصلہ دیا جائے گا۔

آرین خان فی الوقت ممبئ کے آرتھر روڈ جیل میں

آرین خان فی الوقت ممبئ کے آرتھر روڈ جیل میں مقید ہیں گزشتہ دنوں انہیں جیل کے قرنطینہ سنٹر سے دیگر قیدیوں کے بیرک میں منتقل کیا گیا تھا۔

پورے ملک میں موضوع بحث بننے والی بالخصوص قانونی حلقوں میں گہری نظروں سے دیکھی جانے والی آرین خان کی درخواست ضمانت کی استغاثہ نے خصوصی عدالت میں پرزور لفظوں میں مخالفت کی تھی۔ اور عدالت کو کہا تھا کہ آرین خان منشیات کا عادی ہے اور اس کے موبائل پر دستیاب وہاٹس ایپ چیٹ سے حاصل شدہ گفتگو سے یہ ثابت ہوتا ہے کہ ملزم کے عالمی سطح پر منشیات فروشوں سے روابط تھے۔ لہذا ایسے ملزم کو ضمانت پر نہیں رہا کیا جانا چاہیئے کیونکہ اس کی رہائی سے جاری تفتیش متاثر ہوگی اور ثبوت و شواہد کے تباہ ہونے کا بھی اندیشہ ہو گا۔

استغاثہ کی پیروی ایڈشنل سالیسیٹر جنرل انل سنگھ نے کی تھی اور انہوں نے عدالت کو بتلایا کہ اس بات سے کوئی انکار نہیں کہ آرین خان کے قبضہ سے کوئی منشیات نہیں دستیاب ہوئی ہے۔ لیکن آرین کے دوستوں کے پاس جو منشیات این سی بی نے ضبط کی ہے اس کی مقدار تجارتی ہے اور چونکہ وہ اس گروہ کا رکن تھا جن کے قبضہ سے تجارتی مقدار کی منشیات ضبط ہوئی ہے۔ لہذا ان منشیات فروشوں پر قانون کی جو سخت دفعات اور جو سزائیں تجویز کی جا سکتی ہیں وہ آرین خان پر بھی نافذ ہوتی ہیں۔

استغاثہ کے دلائل کی وکلاء دفاع نے مخالفت کی

استغاثہ کے ان دلائل کی وکلاء دفاع سینئر وکلاء مکل روہتگی امیت دیسائی، ستیش مانے شندے اور دیگر نے مخالفت کی اور کہا تھا کہ ملزم کے قبضہ سے کوئی منشیات برآمد نہیں ہوئی ہے۔ نیز وہ اس کا استعمال کرتے ہوئے پایا گیا ہوگا کیونکہ وہ ایک گمراہ کن نوجوان ہے۔ لہذا اسے اصلاح کا موقع فراہم کرنا چاہیئے اور اسے ضمانت پر رہا کرنا چاہیئے۔

وکلاء دفاع نے عدالت کو مزید بتلایا تھا کہ چرس اور گانجے کو عالمی سطح پر مختلف ممالک میں منشیات کی فہرست سے ہی نکال دیا ہے۔ نیز آرین خان سمیت دیگر ملزمین کو اپنے کیئے کی سزا مل چکی ہے اور وہ ایک طویل عرصہ سے جیل کی سلاخوں کے پیچھے مقید ہیں اور تقاضہ وقت ہے کہ انہیں اصلاح کیلئے ضمانت پر رہا کیا جائے۔

2 اکتوبر کو شام میں ہوئی آرین کی گرفتاری

2؍ اکتوبر کو شام میں آرین کی گرفتاری کے بعد اسے 3؍اکتوبر کو ممبئی کی مقامی عدالت میں پیش کیا گیا تھا جس نے اسے ۵؍اکتوبر تک این سی بی کی حراست میں رکھے جانے کا حکم جاری کیا تھا۔ اس کے بعد ۵؍اکتوبر کو ہی آرین سمیت دیگر کو عدالت نے ۱۴؍دنوں کیلئے عدالتی تحویل میں بھیج دیا تھا۔ جس کے بعد انہیں ممبئی کے آرتھر روڈ جیل میں مقید کیا گیا تھا۔ اس دوران دفاعی وکلاء نے مقامی عدالت میں درخواست ضمانت دائر کی تھی لیکن مجسٹریٹ نے اسے یہ کہہ کر مسترد کر دیا تھا کہ ضمانت پر رہا کرنا مقامی عدالت کے دائرہ اختیار میں نہیں ہے۔

مقامی عدالت کی جانب سے ضمانت مسترد کیئے جانے کے بعد آرین اور دیگر نے سیشن عدالت میں درخواست ضمانت داخل کی تھی جس پر عدالت نے ۲۰؍اکتوبر تک اپنا فیصلہ محفوظ رکھا تھا۔ اور درخواست کو یہ کہکر مسترد کر دیا تھا کہ بادی النظر میں ملزمین کے خلاف شواہد موجود ہیں اور ضمانت پر رہائی سے تفشیش متاثر ہوں گی۔

منشیات کی ریو پارٹی میں شریک آرین کو رہائی کا نامکمل پروانہ دستیاب

٢۵؍دنوں تک این سی بی اور جیل کی صعوبتیں برداشت کرنے کے بعد آج آرین کو رہائی کا نامکمل پروانہ دستیاب ہوا۔ کیونکہ حتمی فیصلہ ابھی آنا باقی ہے اور اسکے بعد کل یا پرسوں اسکی جیل سے رہائی عمل میں آئے گی۔

آرین نے گزشتہ دنوں جیل میں اپنے والدین سے بھی ویڈیو کال پر دس منٹ کیلئے گفتگو کی تھی۔ شاہ رخ خان اور انکی اہلیہ گوری خان نے بھی جیل جاکر آرین سے جزباتی ملاقاتیں کی تھی۔ جیل میں قیام کے دوران آرین سے سرکاری ماہرین نفسیات نے بھی ملاقات کی تھی اور اس کی اصلاح کیلئے مختلف مشورے دیئے تھے۔

منشیات کنٹرول بیورو (این سی بی ) کی آرین پر کی جانے والی یہ کارروائی سیاسی حلقوں میں بھی موضوع بحث بنی تھی اور مہاراشٹر کے ایک کابینی وزیر نواب ملک نے تفتیشی ایجنسیوں پر الزام عائد کیا تھا کہ اس نے قانون کی دھجیاں اڑاتے ہوئے اس معاملے میں خلاف ورزیاں کی ہیں۔ اور پوری کارروائی پر انہوں نے شک کے دائرے میں لائے جانے کے الزامات عائد کیے تھے جبکہ این سی بی نے اسے بے بنیاد اور گمراہ کن قرار دیا تھا۔

مرکزی وزارت صحت اور خاندانی بہبود نے بتایا کہ گزشتہ 24 گھنٹوں میں ملک بھر میں 49 لاکھ 9 ہزار 254 کووڈ ویکسین لگائی گئی ہیں۔

نئی دہلی: ملک بھر میں گزشتہ 24 گھنٹوں کے دوران 49 لاکھ سے زیادہ کووڈ ویکسین لگائی گئی ہیں۔ اس کے ساتھ ہی کل ویکسینیشن 104 کروڑ سے تجاوز کر گئی ہے۔

مرکزی وزارت صحت اور خاندانی بہبود نے جمعرات کو یہاں بتایا کہ گزشتہ 24 گھنٹوں میں ملک بھر میں 49 لاکھ 9 ہزار 254 کووڈ ویکسین لگائی گئی ہیں۔ آج صبح 7 بجے تک کل 104 کروڑ 99 ہزار 873 ویکسینیشن ہوچکی ہے۔

وزارت کے مطابق گزشتہ 24 گھنٹوں میں ملک بھر میں 16156 نئے کووڈ مریض سامنے آئے ہیں۔ اس وقت ملک میں ایک لاکھ 60 ہزار 989 کووڈ مریض زیر علاج ہیں۔ انفیکشن کی شرح 0.47 فیصد ہے۔ اسی عرصے میں 17095 افراد انفیکشن سے نجات پا چکے ہیں۔ اب تک کل تین کروڑ 36 لاکھ 14434 لوگ کووڈ انفیکشن سے صحت یاب ہو چکے ہیں۔ صحت یابی کی شرح 98.20 فیصد تک پہنچ گئی ہے۔

اعداد و شمار کے مطابق گزشتہ 24 گھنٹوں میں 12 لاکھ 90 ہزار 900 کووڈ ٹیسٹ کیے گئے ہیں۔ ملک میں اب تک 60 کروڑ 44 لاکھ 98 ہزار 405 کووڈ ٹیسٹ کیے جا چکے ہیں۔

بین الاقوامی بازار میں خام تیل کی بلند ترین سطح سے گرنے کے باوجود گھریلو سطح پر پٹرول اور ڈیزل کی قیمتوں میں لگاتار دوسرے دن اضافہ جاری ہے۔

نئی دہلی: بین الاقوامی بازار میں جمعرات کو خام تیل کی بلند ترین سطح سے گرنے کے باوجود گھریلو سطح پر پٹرول اور ڈیزل کی قیمتوں میں مسلسل دوسرے دن اضافہ جاری ہے۔ ان دونوں کی قیمتوں میں 35-35 پیسے فی لیٹر کا اضافہ کیا گیا، جس کے بعد دارالحکومت دہلی میں پٹرول 108.29 روپے فی لیٹر اور ڈیزل 97.02 روپے فی لیٹر کے ریکارڈ سطح پر پہنچ گیا۔

ممبئی میں پٹرول 114.14 روپے اور ڈیزل 105.12 روپے فی لیٹر، مدھیہ پردیش کی راجدھانی بھوپال میں پٹرول 116.98 روپے فی لیٹر اور ڈیزل 106.38 روپے فی لیٹر، پٹنہ میں پٹرول 112.04 روپے اور ڈیزل 103.64 روپے فی لیٹر، بنگال میں پٹرول اور 103.64 روپے فی لیٹر۔ ڈیزل 102.98 روپے فی لیٹر تک پہنچ گیا ہے۔

رانچی میں پٹرول اور ڈیزل کی قیمتوں میں صرف 18 پیسے فرق

کولکتہ میں بھی پٹرول 108.78 روپے فی لیٹر اور ڈیزل بھی 100.14 روپے فی لیٹر تک پہنچ گیا ہے۔ رانچی میں پٹرول اور ڈیزل کی قیمتوں میں فرق صرف 18 پیسے ہے۔ پٹرول کی قیمت 102.54 روپے اور ڈیزل کی قیمت 102.36 روپے فی لیٹر ہے۔ نوئیڈا، دہلی این سی آر میں پٹرول کی قیمت 105.44 روپے اور ڈیزل کی قیمت 97.28 روپے فی لیٹر ہے۔

اس وقت ملک کے تمام بڑے شہروں میں پٹرول کی قیمت 100 روپے فی لیٹر سے تجاوز کر گئی ہے۔ ڈیزل بھی بیشتر شہروں میں سنچری کو چھو رہا ہے۔ اس مہینے میں اب تک 28 دنوں میں سے 21 دنوں میں ان دونوں کی قیمتوں میں اضافہ ہوا ہے۔ اس ماہ اب تک پٹرول 6.65 روپے فی لیٹر اور ڈیزل 7.25 روپے فی لیٹر مہنگا ہو چکا ہے۔

مارکیٹ اسٹڈی اور کریڈٹ ریٹنگ کمپنی گولڈمین سیکس کی جانب سے اگلے سال تک 110 ڈالر فی بیرل تک پہنچنے کی اطلاعات کے درمیان بین الاقوامی مارکیٹ میں بدھ کو امریکہ میں خام تیل کی قیمت میں تیزی سے کمی ہوئی۔ اس کے ساتھ ہی سنگاپور میں خام تیل کی تجارت جمعرات کو نرمی کے ساتھ شروع ہوئی۔ برینٹ کروڈ کی قیمت 2.09 ڈالر کمی کے ساتھ 82.49 ڈالر فی بیرل اور یو ایس کروڈ 1.79 ڈالر کم ہوکر 80.87 ڈالر فی بیرل پر ٹریڈ ہوا۔

آئل مارکیٹنگ کمپنی انڈین آئل کارپوریشن کے مطابق دہلی میں پٹرول 108.29 روپے فی لیٹر اور ڈیزل 97.02 روپے فی لیٹر پر پہنچ گیا۔

پٹرول اور ڈیزل کی قیمتوں کا روزانہ جائزہ لیا جاتا ہے اور اس کی بنیاد پر ہر روز صبح 6 بجے سے نئی قیمتوں کا نفاذ کیا جاتا ہے۔

شہر ——————  پٹرول —————— ڈیزل

دہلی —————— 108.29—————— 97.02
ممبئی-——————114.14—————— 105.12
چنئی ——————105.13 ——————101.25
کولکتہ —————108.78———————100.14

این سی بی کے گواہ کرن گوساوی، جو آرین خان منشیات معاملے میں کئی دنوں سے مفرور تھے، کو آج پونے پولیس نے گرفتار کر لیا۔

ممبئی: نارکوٹکس کرائم کنٹرول بیورو (این سی بی) کے گواہ کرن گوساوی، جو آرین خان منشیات معاملے میں کئی دنوں سے مفرور تھے، کو آج پونے پولیس نے گرفتار کر لیا۔

پولیس کے ذرائع کے مطابق گوساوی کو آج صبح 5 بجے حراست میں لیا گیا ہے۔ ذرائع کے مطابق پولیس ابھی اس سے پوچھ گچھ کر رہی ہے۔

واضح رہے کہ گوساوی نارکوٹکس کرائم کنٹرول بیورو (این سی بی) کے آرین خان منشیات معاملے کے پانچ گواہوں میں سے ایک ہے اور اس پر این سی بی کے ممبئی زون کے ڈائریکٹر سمیر وانکھیڑے کے کہنے پر جھوٹی گواہی دینے کا الزام ہے۔

حال ہی میں سوشل میڈیا پر ان کی بات چیت وائرل ہوئی جس میں وہ یہ کہتے ہوئے سنائی دے رہے ہیں کہ وہ لکھنؤ پولیس کے سامنے خود سپردگی کریں گے۔ اسی معاملے میں گوساوی کے محافظ پربھاکر سیل نے ممبئی کی خصوصی عدالت میں بالترتیب تفتیشی ایجنسیوں اور گواسی کے اہلکاروں کے خلاف حلف نامہ دیا ہے۔

شاہ رخ خان کے بیٹے آرین خان اور دیگر ملزمین کو بحری جہاز میں منشیات کی ریو پارٹی میں شرکت کرنے اور اسکے استعمال کے معاملے میں داخل کردہ درخواست ضمانت پر دفاعی وکلاء کی بحث کا اختتام عمل میں آیا۔

ممبئی: ممبئی ہائی کورٹ نے آج یہاں فلم اداکار شاہ رخ خان کے بیٹے آرین خان اور دیگر ملزمین کو بحری جہاز میں منشیات کی ریو پارٹی میں شرکت کرنے اور اسکے استعمال کے معاملے میں داخل کردہ درخواست ضمانت پر دفاعی وکلاء کی بحث کا اختتام عمل میں آیا۔ اب کل این سی بی استغاثہ اپنی بحث کا آغاز کرے گی اسکے بعد عدالت ابنا فیصلہ ظاہر کرے گی۔ خان اور اسکے دیگر ساتھیوں کو تین ہفتے قبل ممبئی کے ساحل پر ایک کروز جہاز پر نارکوٹکس کنٹرول بیورو (این سی بی) کے چھاپے کے دوران گرفتار کیا گیا تھا۔

عدالت کے روبرو گزشتہ دو دنوں سے دفاع کی جاری بحث کا آج اسوقت خاتمہ ہوا جب وکلاء دفاع نے این سی بی کی پوری کاروائی کو ہی غلط بتلایا اور عدالت سے تینوں ملزمین کو ضمانت پر رہا کئے جانے کا مطالبہ کیا۔

آج عدالت کے روبرو آرین خان سمیت اس کے دو دوست ارباز مرچنٹ اور من من دھمیچا کی درخواست ضمانت پر وکلاء نے اپنے موقف کے اظہار کے دوران ملزمین پر عائد تمام الزامات سے انکار کیا۔ ایڈیشنل سالیسٹر جنرل انیل سنگھ کل اس معاملے میں اپنی بحث ختم کریں گے۔

مشروط ضمانت پر رہا کرنے کی اپیل

گذشتہ کل نامور وکیل مکل روہتگی نے آرین پر عائد تمام الزامات سے انکار کیا تھا اور عدالت کو بتلایا تھا کہ ملزم کے قبضے سے کوئی ممنوع اشیاء سمیت منشیات برآمد نہیں ہوئی تھی۔ نیز اگر یہ تسلیم بھی کر لیا جائے کہ ملزم منشات کا عادی ہے تو بھی اسے اصلاح کا موقع فراہم کیا جائے اور مشروط ضمانت پر رہا کیا جائے۔ آج اسی سلسلے کو جاری رکھتے ہوئے آرین کے دیگر وکیل امت دیسائی نے عدالت میں مجرمانہ سازش کے تعلق سے تفصیلی بحث کی اور عدالت کو بتلایا کہ ملزم کسی طرح سے بھی منشیات کے استعمال اور اس کی خرید و فروخت کی سازش میں شامل نہیں تھا۔

خان اور اس کے دو دوست ارباز مرچنٹ اور من من دھمیچا نے جسٹس وی ایم سامبرے کے روبرو اپنی درخواستوں میں رہائی کی درخواست کی ہے۔ آرین فی الوقت ممبئ کے آرتھر روڈ جیل میں مقید ہیں گذشتہ دنوں ان کے والد شاہ رخ خان اور ان کی والدہ گوری خان نے آرین سے آرتھر روڈ جیل میں جا کر جذباتی ملاقات کی تھی۔

نواب ملک نے ایک اور سنسنی خیز انکشاف کرتے ہوئے کہا کہ دو اکتوبر کو کروز پر ایک بین الاقوامی ڈرگ پیڈلر موجود تھا اور اس کا شبہ داڑھی والے شخص پر جاتا ہے۔

ممبئی: نیشنلسٹ کانگریس پارٹی (این سی پی) کے ترجمان اور ریاست کے اقلیتی امور کے وزیر نواب ملک نے بدھ کو ایک اور سنسنی خیز انکشاف کرتے ہوئے کہا کہ دو اکتوبر کو کروز پر ایک بین الاقوامی ڈرگ پیڈلر موجود تھا اور اس کا شبہ داڑھی والے شخص پر جاتا ہے۔

مسٹر ملک نے یہاں میڈیا اہلکاروں سے کہا کہ ایک بین الاقوامی ڈرگ پیڈرل کروز پر موجود تھا اور اس کے ہاتھ میں ایک ہتھیار تھا اور وہ نارکوٹکس کنٹرول بیورو (این سی بی) کے ریجنل ڈائریکٹر سمیر وانکھیڑے کا قریبی دوست تھا۔ انہوں نے سوال کیا کہ تقریباً ایک معاملہ درج کیا گیا تھا، جس میں بالی ووڈ اداکارہ دپیکا پاڈوکون، سارا علی خان اور شردھا کپور کو گواہ کے طور پر بلایا گیا تھا لیکن ابھی تک کوئی گرفتاری نہیں ہوئی ہے کیونکہ مسٹر ملک نے کہا کہ این سی بی دفتر سے موصولہ ایک نامعلوم خط میں اطلاع دی گئی ہے کہ 26 سے زیادہ معاملوں میں مسٹر وانکھیڑے اور اس کے گروپ نے پیسہ وصولی کی تھی۔

این سی بی کے ایک افسر نے کل صبح کہا کہ وہ خط کو اپنے نوٹس میں لیں گے لیکن شام تک انہوں نے کہا کہ یہ ایک نامعلوم خط ہے۔ خط پر کسی کے دستخط نہیں ہیں۔ اس لئے قانون کے مطابق ہم اس کا نوٹس نہیں لے سکتے۔ مسٹر ملک نے کہا کہ اب پورا ادارہ شبہ کے گھیرے میں ہے۔

انہوں نے کہا کہ وہ اپنے اس بیان پر قائم ہیں کہ فرضی اور جعلی دستاویزات کا استعمال کرکے سمیر وانکھیڑے کو سرکاری نوکری ملی ہے۔ مسٹر ملک نے کہا کہ ’’کروز جہاز کے سی سی ٹی وی فوٹیج میں سب کچھ واضح ہے۔ انہوں نے 50 لاکھ روپے نکالے اور ایک شخص سیم ڈیسوزا کو سونپ دیئے تھے‘‘۔