ہماچل پردیش کی تین اسمبلی سیٹوں پر حالیہ ہوئے ضمنی انتخابات میں منتخب ہونے والے تین اراکین اسمبلی نے آج یہاں حلف لیا۔

شملہ: ہماچل پردیش کی تین اسمبلی سیٹوں پر حالیہ ہوئے ضمنی انتخابات میں منتخب ہونے والے تین اراکین اسمبلی نے آج یہاں حلف لیا۔ ریاستی اسمبلی کے اسپیکر وپن پرمار نے اپنے چیمبر میں ایک سادہ تقریب میں ان اراکین اسمبلی کو عہدہ اور رازداری کا حلف دلایا۔

انہوں نے نو منتخب اراکین اسمبلی کو مبارکباد دیتے ہوئے اپنے اپنے حلقوں میں ترقیاتی کاموں کو تیز کرنے اور ایوان میں ہونے والی بحث میں حصہ لینے اور اپنے علاقوں کے مسائل اجاگر کرنے اور انہیں حل کرنے پر زور دیا۔

ضمنی انتخابات میں تینوں اراکین اسمبلی کانگریس پارٹی کے جیت کر آئے ہیں۔ یہ ضمنی انتخابات کانگڑا ضلع کی فتح پور اسمبلی سیٹ، سولن ضلع کی آرکی اور شملہ ضلع کی جبل کوٹ کھائی اسمبلی سیٹوں کے لیے ہوئے تھے، جو کانگریس رکن اسمبلی سوجن سنگھ پٹھانیا، رکن اسمبلی اور سابق وزیر اعلی ویربھدر سنگھ اور حکمراں بی جے پی کے چیف وہپ اور رکن اسمبلی نریندر باگٹا کی موت کی وجہ سے خالی ہوئی تھی۔

فتح پور میں سوجن سنگھ کا بیٹا بھوانی سنگھ پٹھانیا، آرکی میں سنجے اوستھی اور جبل پور میں روہت ٹھاکر نے جیت حاصل کی ہے۔ اس طرح کانگریس نے ایوان میں ایک سیٹ کا اضافہ کیا ہے جبکہ بی جے پی کو ایک سیٹ کا نقصان ہوا ہے۔

کسان لیڈر راکیش ٹکیت نے ایم پی اروند شرما کے مبینہ متنازعہ بیان پر رد عمل میں آج کہا کہ بی جے پی لیڈروں کی زبان سن کر لگتا ہے کہ طالبان سے ان کا تعلق ہے۔

حصار: کسان لیڈر راکیش ٹکیت نے ایم پی اروند شرما کے مبینہ متنازعہ بیان پر رد عمل میں آج کہا کہ بی جے پی لیڈروں کی زبان سن کر ایسا لگتا ہے کہ کہیں ان کا تعلق طالبان سے تو نہیں ہے۔

مسٹر ٹکیت یہاں ہانسی میں ایم پی اور بی جے پی لیڈر رام چندر جانگڑا کے خلاف پولیس کیس درج کرنے اور کسانوں کے خلاف درج کیس کو واپس لینے کا مطالبہ کرنے کے لیے متحدہ کسان مورچہ کے دھرنے میں آئے تھے۔ مسٹر اروند شرما کے ‘آنکھیں نکال لینے…’ کے تبصرے پر رد عمل ظاہر کرتے ہوئے انہوں نے کہا کہ بی جے پی کے تمام لیڈر اس طرح کی بات کرتے ہیں۔ انہیں اسی کی تربیت دی جاتی ہے۔ ان کی زبان سن کر لگتا ہے کہ طالبان سے ان کا تعلق ہے۔

ادھر کسانوں کے ذریعہ پولیس سپرنٹنڈنٹ کے دفتر کے گھیراؤ کا اعلان کیے جانے بعد ہانسی کے ایس پی آفس کو چھاؤنی میں تبدیل کر دیا گیا ہے۔ ایس پی آفس کی طرف جانے والی سڑکوں پر رکاوٹیں لگا کر پولیس کی بھاری نفری تعینات کر دی گئی ہے۔ حصار کے آئی جی راکیش کمار بھی سیکیورٹی انتظامات کا جائزہ لینے کے لیے صبح ہی ہانسی پہنچ گئے۔ سیکیورٹی کے حوالے سے 2 اے ایس پی، 7 ڈی ایس پی، پیرا ملٹری فورس کی 2 کمپنیاں اور چار اضلاع کی پولیس تعینات کی گئی ہے۔

مظاہرین کو پولیس کی جانب سے سخت ہدایات

منی سیکرٹریٹ کے سامنے سے گزرنے والی پرانی قومی شاہراہ کو دونوں طرف سے رکاوٹیں لگا کر مکمل طور پر بندکر دیا گیا ہے۔ نیز اس راستے کو سیکٹر 5 کی طرف موڑ دیا گیا ہے۔ کسان صبح سے ہی ہانسی میں احتجاج کے لیے جمع ہونا شروع ہو گئے تھے۔ اس دوران انہیں پولیس کی جانب سے سخت ہدایات دی گئی ہیں کہ وہ اپنی گاڑیاں ایس پی آفس سے 300 میٹر دور کھڑی کرکے پیدل چل کر منی سیکرٹریٹ کے سامنے پرامن احتجاج کر سکتے ہيں۔ مگر منی سیکرٹریٹ میں کسی کو داخلے کی اجازت نہیں ہے۔

دوسری طرف، ہانسی پولیس نے وضاحت کی ہے کہ پولیس نے کوئی لاٹھی چارج نہیں کیا۔ پولیس کا یہ بھی دعویٰ ہے کہ کلدیپ ساتروڑ نامی کسان کو پولیس کی کارروائی میں کوئی چوٹ نہیں آئی، بلکہ اسے مرگی کے دورے پڑے، جس کی وجہ سے اسے برین ہیمرج ہوا۔ اس بیان سے ناراض مظاہرین نے ایس پی سے معافی مانگنے کا مطالبہ کیا ہے۔

واضح رہے کہ تین روز قبل مسٹر جانگڑا نارنود میں ایک پروگرام میں آئے تھے، جہاں تین زراعتی قوانین کے خلاف احتجاج کرنے والے کسان بھی پہنچ گئے۔ الزام ہے کہ پولیس نے ان پر لاٹھی چارج کیا جس کے دوران کلدیپ ساتروڑ بری طرح زخمی ہوگئے اور وہ آئی سی یو میں ہیں۔

سلامتی دستوں نے بتایا کہ الکاظمی کے گھر پر حملے میں شامل ایک ڈرون کو پکڑ لیا گیا ہے۔

بغداد: عراق کے وزیر اعظم مصطفی الکاظمی اتوار کی صبح ایک ڈرون حملے میں زخمی ہو گئے ہیں۔ انہیں اسپتال میں داخل کرایا گیا ہے۔ العربیہ نے اپنی رپورٹ میں یہ اطلاع دی۔

رپورٹ کے مطابق ڈرون حملے میں عراق کے وزیر اعظم کے گھر کو ہدف بناکر راکٹ داغا گیا۔ اس حملے میں الکاظمی اور ان کے کئی محافظین بھی زخمی ہوئے ہیں۔

رپورٹ میں کہا گیا ہے کہ بغداد میں گرین زون کے پاس بھی شدید گولہ باری ہوئی ہے۔

سلامتی دستوں نے بتایا کہ الکاظمی کے گھر پر حملے میں شامل ایک ڈرون کو پکڑ لیا گیا ہے۔

ناگالینڈ کے سابق وزیر اعلیٰ ایس سی ضمیر نے آج یہاں وزیر اعظم نریندر مودی سے ملاقات کی اور ریاست سے متعلق مختلف مسائل پر تبادلہ خیال کیا۔

نئی دہلی: ناگالینڈ کے سابق وزیر اعلی ایس سی ضمیر نے آج یہاں وزیر اعظم نریندر مودی سے ملاقات کر کے ریاست سے متعلق مختلف مسئلوں پر تبادلہ خیال کیا۔

وزیر اعظم نے ہفتے کو ٹویٹ پیغام میں کہا،’’ناگالینڈ کے سابق وزیر اعلی ایس سی ضمیر کے ساتھ آج بہت اچھی ملاقات ہوئی۔ ہم نے مختلف مسئلوں پر بات چیت کی۔‘‘

It was wonderful to meet Shri SC Jamir, the former CM of Nagaland and respected statesman. We exchanged views on several issues. I also have fond memories of working with him when he briefly served as the Governor of Gujarat back in 2009. pic.twitter.com/bjYw877CPV

— Narendra Modi (@narendramodi) November 6, 2021

مسٹر مودی نے کہا کہ ملاقات کے دوران انہوں نے مسٹر ضمیر کے سال 2009 میں گجرات کے گورنر کے طور پر دور اقتدار سے منسلک باتوں کو بھی یاد کیا۔ اس وقت مسٹر مودی گجرات کے وزیر اعلی تھے۔

وزیر اعظم نے مسٹر ضمیر کو اعزاز ی لیڈر بتایا اور ان کے ساتھ ملاقات کی کچھ تصویریں بھی شیئر کی ہیں۔

مسٹر ضمیر ناگالینڈ کے مقبول وزرائے اعلی میں شمار ہیں اور ان کے دور اقتدارمیں ریاست میں متعدد ترقیاتی کام کئے گئے جنہوں نے ریاست کی ترقی میں اہم کردار ادا کیا ہے۔

سی بی آئی نے اس سال اپریل میں اس وقت کے وزیر داخلہ انیل دیشمکھ کے خلاف بدعنوانی اور رشوت ستانی کے الزام میں ایف آئی آر درج کی تھی، جس کی بنیاد پر ای ڈی اس معاملے کی جانچ کر رہی ہے۔

ممبئی: ممبئی کی ایک خصوصی پی ایم ایل اے عدالت نے ہفتہ کو مہاراشٹر کے سابق وزیر داخلہ انیل دیشمکھ کو 14 دن کی عدالتی حراست میں بھیجنے کا حکم دیا ہے۔

انفورسمنٹ ڈائریکٹوریٹ نے تحقیقات کا حوالہ دیتے ہوئے دیشمکھ کی حراست میں مزید نو دن کی توسیع کی درخواست کی تھی، جسے عدالت نے مسترد کر دیا۔ ایجنسی مسٹر دیشمکھ کے خلاف منی لانڈرنگ کیس کی جانچ کر رہی ہے۔ سنٹرل بیورو آف انویسٹی گیشن (سی بی آئی) نے اس سال اپریل میں اس وقت کے وزیر داخلہ انل دیشمکھ کے خلاف بدعنوانی اور رشوت ستانی کے الزام میں ایف آئی آر درج کی تھی، جس کی بنیاد پر ای ڈی اس معاملے کی جانچ کر رہی ہے۔

مسٹر دیش مکھ کو 2 نومبر کو ممبئی کی چھٹی عدالت نے اس معاملے میں 6 نومبر تک ای ڈی کی حراست میں بھیج دیا تھا۔ ای ڈی نے مسٹر دیش مکھ کے خلاف ممبئی کے سابق پولیس کمشنر پرم بیر سنگھ کی طرف سے لگائے گئے رشوت کے الزامات پر مقدمہ درج کیا تھا۔ مقدمہ درج ہونے کے بعد انہیں وزیر داخلہ کے عہدے سے استعفیٰ دینا پڑا تھا۔

پرم بیر سنگھ کا وزیر اعلیٰ ادھو ٹھاکرے کو خط

پرم بیر سنگھ نے مہاراشٹر کے وزیر اعلیٰ ادھو ٹھاکرے کو خط لکھ کر الزام لگایا کہ اس وقت کے وزیر داخلہ انل دیشمکھ نے اسسٹنٹ انسپکٹر سچن واجے کے ذریعے دسمبر 2020 سے فروری 2021 کے درمیان کئی آرکسٹرا اور بار مالکان سے تقریباً 4.7 کروڑ روپے کی رقم وصول کی۔

ای ڈی نے 2 نومبر کو عدالت میں دعویٰ کیا تھا کہ مسٹر دیش مکھ منی لانڈرنگ کیس میں براہ راست ملوث تھے۔ ای ڈی نے شریک ملزم واجے سمیت دو اور پولیس اہلکاروں کے بیانات ریکارڈ کیے ہیں۔
ایڈیشنل سالیسٹر جنرل انیل سنگھ اور اسپیشل پبلک پراسیکیوٹر ہیتن وینیگاوکر نے عدالت کو بتایا کہ مسٹر دیشمکھ نے دہلی کی پیپر کمپنیوں کی مدد سے یہ رقم اپنے تعلیمی ٹرسٹ سری سائی سکھشن سنستھا کو عطیہ کے طور پر دلائی تھی۔

احمد نگر کے سول اسپتال میں ہفتہ کو شارٹ سرکٹ کی وجہ سے آگ لگنے سے دس مریض ہلاک اور دس سے زیادہ زخمی ہوگئے۔

احمد نگر/نئی دہلی: مہاراشٹر کے احمد نگر کے سول اسپتال میں ہفتہ کو شارٹ سرکٹ کی وجہ سے آگ لگنے سے دس مریض ہلاک اور دس سے زیادہ زخمی ہوگئے۔

احمد نگر کے ضلع مجسٹریٹ راجیندر بھوسلے نے بتایا کہ حادثہ شارٹ سرکٹ کی وجہ سے ہوا۔

اسپتال کے عملے نے آج یہاں بتایا کہ آگ انتہائی نگہداشت یونٹ (آئی سی یو) میں تقریباً 11.30 بجے لگی اور تیزی سے پورے کمرے میں پھیل گئی۔ کمرے میں تقریباً 25 کووڈ مریض داخل تھے۔
مہاراشٹر کے وزیر اعلی ادھو ٹھاکرے نے واقعے کی تحقیقات کا حکم دیا ہے۔

سات فائر ٹینڈرز کی مدد سے آگ پر قابو پالیا گیا ہے۔

وزیر اعظم نریندر مودی اور وزیر داخلہ امت شاہ نے احمد نگر اسپتال میں حادثے میں مریضوں کی موت پر غم کا اظہار کیا ہے۔ وزیر اعظم مودی نے حادثے میں ہلاک ہونے والوں کے اہل خانہ سے تعزیت کا اظہار کیا ہے اور زخمیوں کی جلد صحت یابی کی تمنا کی ہے۔

وزیر داخلہ امیت شاہ نے کہا ’’مہاراشٹر کے احمد نگر کے سول اسپتال میں پیش آنے والے دل دہلا دینے والے حادثے سے بہت تکلیف ہوئی ہے۔ غم کی اس گھڑی میں میری تعزیت سوگوار خاندانوں کے ساتھ ہے اور میں زخمیوں کی جلد صحت یابی کے لیے دعا کرتا ہوں۔

حکام نے بتایا کہ مریضوں کو دوسری جگہ منتقل کر دیا گیا ہے۔ متعدد زخمیوں کی حالت تشویشناک بتائی جاتی ہے۔

مہاراشٹر حکومت کے وزیر حسن مشرف نے کہا کہ اس واقعے میں دس افراد کی المناک موت ہوئی ہے۔ انہوں نے کہا کہ اس کی تحقیقات کی جا رہی ہیں اور اگر غفلت پائی گئی تو ذمہ داروں کے خلاف کارروائی کی جائے گی۔

مسٹر مشرف احمد شہر کے نگران وزیر ہیں۔

عراق کی وزارت صحت نے کہا کہ جھڑپوں میں 125 افراد زخمی ہوئے جس میں 27 شہری ہیں اور بقیہ سیکیورٹی فورسز کے اہلکار ہیں۔

بغداد: عراق میں گزشتہ ماہ سامنے آنے والے انتخابی نتائج کے خلاف دارالحکومت بغداد میں احتجاج کرنے والے سینکڑوں مظاہرین کی پولیس اور سیکیورٹی فورسز سے جھڑپوں میں 100 سے زائد افراد زخمی ہو گئے۔

عالمی خبر رساں ایجنسی کے مطابق عراق کی وزارت صحت نے کہا کہ جھڑپوں میں 125 افراد زخمی ہوئے جس میں 27 شہری ہیں اور بقیہ سیکیورٹی فورسز کے اہلکار ہیں۔

ایران کی حمایت یافتہ حشد الشعبی کا سیاسی بازو تصور کی جانے والی جماعت کی گزشتہ انتخابات میں نشستیں کم ہوئی تھیں اور اس جماعت نے ان انتخابات سے لاتعلقی کا اعلان کرتے ہوئے اسے فراڈ قرار دیا ہے۔

مظاہرین نے گرین زون تک جانے والے راستے تین اطراف سے بند کردیئے تاہم اس کے بعد پولیس نے ہوائی فائرنگ کرکے انہیں منتشر ہونے پر مجبور کردیا۔

وزارت صحت کے مطابق جھڑپوں میں کوئی بھی شخص ہلاک نہیں ہوا لیکن ایران کے حامی کچھ گروپس نے پیغام رسائی کی ایپلی کیشن ’ٹیلی گرام‘ پر پولیس پر مظاہرین پر براہ راست فائرنگ کا الزام عائد کیا ہے۔

تاہم وزارت صحت کے دعوت کے برعکس ہشد کے طاقتور دھڑے حزب اللہ بریگیڈ نے کہا کہ پولیس کی فائرنگ سے دو مظاہرین مارے گئے۔