ریزرو بینک آف انڈیا کے جاری کردہ ہفتہ وار اعداد و شمار کے مطابق غیر ملکی زرمبادلہ کے ذخائر کا سب سے بڑا جزو غیر ملکی کرنسی کے اثاثے 24 دسمبر کو ختم ہونے والے ہفتے میں 84.7 ملین ڈالر سے گھٹ کر 573.36 بلین ڈالر رہ گئے۔

ممبئی: ملک کے غیر ملکی زرمبادلہ کے ذخائر 24 دسمبر کو ختم ہونے والے ہفتے میں 5.87 ملین ڈالر سے گھٹ کر 635.08 بلین ڈالر رہ گئے، جبکہ گزشتہ ہفتہ بھی 16 ملین ڈالر سے گھٹ کر 635.66 بلین ڈالر رہ گئے تھے۔

ریزرو بینک آف انڈیا کے جاری کردہ ہفتہ وار اعداد و شمار کے مطابق غیر ملکی زرمبادلہ کے ذخائر کا سب سے بڑا جزو غیر ملکی کرنسی کے اثاثے 24 دسمبر کو ختم ہونے والے ہفتے میں 84.7 ملین ڈالر سے گھٹ کر 573.36 بلین ڈالر رہ گئے۔ اسی عرصے کے دوران سونے کے ذخائر 20.7 ملین ڈالر کے اضافے سے 39.39 بلین ڈالر تک پہنچ گئے۔

اسپیشل ڈرائنگ رائٹس (ایس ڈی آر ایس ) زیر جائزہ ہفتے میں 2.4 ملین ڈالر بڑھ کر 19.11 بلین ڈالر ہو گئے۔ اسی طرح بین الاقوامی مالیاتی فنڈ (آئی ایم ایف) کے ذخائر 2.8 ملین ڈالر سے بڑھ کر 5.2 بلین ڈالر تک پہنچ گئے۔

دنیا کے کئی ممالک میں اومیکرون کا پھیلاؤ جاری ہے، کورونا ویرینٹ کیسز کی تعداد لاکھوں میں سامنے آرہی ہے۔

جنیوا: دنیا کے کئی ممالک میں اومیکرون کا پھیلاؤ جاری ہے، کورونا ویرینٹ کیسز کی تعداد لاکھوں میں سامنے آرہی ہے۔ غیرملکی میڈیا کے مطابق امریکہ میں مزید 4 لاکھ تینتالیس ہزار سے زائد کیسز رپورٹ ہوئے ہیں جبکہ فرانس میں سوا لاکھ سے زائد کیسز کے باوجود پابندیاں نہیں لگائی گئیں۔

عالمی ادارہ صحت کے سربراہ ٹیڈروس ایڈہنوم نئے سال پر عالمی برادری کی مدد سے کورونا کو ہرانے کے لیے پرعزم ہیں۔

برطانیہ میں کی گئی تحقیق کے مطابق ڈیلٹا ویرینٹ کے مقابلے میں اومیکرون ویرینٹ سے متاثر افراد کے اسپتال میں داخل ہونے کا امکان تقریباً پچاس فیصد کم ہو جاتا ہے۔ اومیکرون سے تحفظ کے لیے ویکسین کی دو خوراک لگوانے والے افراد کا اسپتال میں داخل ہونے کا خطرہ 65 فیصد کم ہو جاتا ہے۔

رپورٹس کے مطابق جانوروں پر کی جانے والی ایک تحقیق سے پتا چلتا ہے کہ گزشتہ ویرینٹ کے مقابلے اومیکرون پھیپھڑوں کو کم نقصان پہنچا رہا ہے۔

ریاستی سیکریٹریٹ نوبنو کے مطابق مغربی بنگال میں اس وقت لاک ڈاؤن نہیں لگایا جائے گا۔

کلکتہ: مغربی بنگال حکومت نے کورونا وائرس کے کیسوں میں اضافے کے بعد اپنے دو سرکاری پروگراموں کو منسوخ کرنے کا فیصلہ کیا ہے۔ اس کے بعد یہ قیاس آرائی شروع ہوگئی ہے کہ پیر سے ریاست میں مرحلہ وار پابندیاں لگائی جاسکتی ہیں۔

پیر کو نیتا جی انڈور اسٹیڈیم میں ’’یوم طلبا‘‘ منایا جانا تھا اور اس میں وزیر اعلیٰ ممتا بنرجی شرکت کرنے والی تھیں مگر اس کو موخر کردیا گیا ہے۔

اس کے علاوہ ’’حکومت آپ کے دروازے‘‘ (دوارے سرکار) پروگرام کو بھی منسوخ کردیا گیا ہے۔

بدھ کو وزیر اعلیٰ ممتا بنرجی نے اشارہ دیا تھا کہ اگر کورونا کے پھیلنے کی یہی رفتار رہی تو ایک مرتبہ پھر اسکول اور کالج کو بند کیا جاسکتا ہے۔

تاہم ریاستی سیکریٹریٹ نوبنو کے مطابق ریاست میں اس وقت لاک ڈاؤن نہیں لگایا جائے گا۔ ٹرین، بس اور میٹرو خدمات کو فوری طور پر بند نہیں کیا جا رہا ہے۔

ذرائع نے بتایا کہ صورت حال کا تجزیہ کرنے کے بعد مرحلہ وار پابندیاں عائد کی جائیں گی۔

اس وقت بنگال میں انفیکشن کی شرح خطرناک حد تک بڑھ گئی ہے، لیکن اسپتالوں میں نہ کورونا کے بیڈ کی قلت ہوئی ہے اور نہ ہی آکسیجن یا دیگر طبی آلات کی کمی کی کوئی شکایت سامنے آئی ہے۔ اس کے علاوہ، اگرچہ انفیکشن کی شرح میں اضافہ ہوا ہے، لیکن اموات کی شرح دوسری لہر کی طرح تشویشناک نہیں ہے۔

اس وقت ریاست میں کورونا کے 80 فیصد مریض غیر علامتی ہیں۔ 20 فیصد مریض علامات کے ساتھ۔ ان میں سے 17 فیصد گھریلو علاج سے صحت یاب ہو رہے ہیں۔ صرف 3 فیصد کو اسپتال میں داخل ہونا پڑتا ہے۔

کئی ڈاکٹروں کا کہنا ہے کہ اس بار مریضوں میں علامات اور اموات کی شرح کم ہونے کی وجہ ویکسینیشن ہے۔

صحت اور خاندانی بہبود کی مرکزی وزارت کی طرف سے جاری اعداد و شمار کے مطابق، ملک میں اب تک کورونا کے نئے ویرینٹ اومیکرون کے کل 1431 کیس درج کئے گئے ہیں۔

نئی دہلی: ملک میں کورونا وائرس کے معاملات بہت تیزی سے بڑھ رہے ہیں اور گزشتہ 24 گھنٹوں میں کورونا انفیکشن کے 22775 کیسز درج کیے گئے ہیں جبکہ ایک دن پہلے یہ تعداد 16764 تھی۔

نئے متاثرہ مریضوں کے ساتھ ملک میں کورونا سے متاثرہ افراد کی تعداد 34861579 ہو گئی ہے۔ اس دوران کورونا سے 406 مریض جاں بحق ہوئے جن میں سے اب تک اس وبا سے مرنے والوں کی تعداد 4 لاکھ 81 ہزار 486 تک پہنچ گئی ہے۔

ویکسینیشن کی تعداد

جمعہ کو ملک میں 58 لاکھ 11 ہزار 487 کووڈ ویکسین لگائی گئیں اور اس کے ساتھ ہی کل ویکسینیشن کی تعداد ایک ارب 45 کروڑ 16 لاکھ 24 ہزار 150 ہو گئی ہے۔

اومیکرون کے کل 1431 کیسز

ہفتہ کی صبح صحت اور خاندانی بہبود کی مرکزی وزارت کی طرف سے جاری اعداد و شمار کے مطابق، ملک میں اب تک کورونا کے نئے ویرینٹ اومیکرون کے کل 1431 کیس درج کئے گئے ہیں۔ گزشتہ 24 گھنٹوں میں 8949 مریضوں کے صحت یاب ہونے کے ساتھ ہی اس وبا سے نجات پانے والوں کی تعداد 34275312 ہوگئی ہے۔ اس دوران فعال کیسز 13420 بڑھ کر 104781 ہو گئے۔

ملک میں صحت یاب ہونے کی شرح 98.32 فیصد، ایکٹو کیسز کی شرح 0.30 فیصد اور اموات کی شرح 1.38 فیصد ہے۔ اس وقت کیرالہ میں ملک میں سب سے زیادہ ایکٹیو کیسز ہیں۔ پچھلے 24 گھنٹوں میں یہاں ایکٹیو کیسز 419 کم ہو کر 20106 پر آ گئے ہیں۔ ریاست میں 2742 مریضوں کے ٹھیک ہونے کے ساتھ ہی کورونا سے کو شکست دینے والے لوگوں کی تعداد بڑھ کر 5179277 ہو گئی ہے۔

مرنے والوں کی تعداد

اس دوران مزید 353 مریضوں کی موت کے بعد مرنے والوں کی تعداد بڑھ کر 47794 ہو گئی ہے۔ گزشتہ 24 گھنٹوں میں کیرالہ میں کورونا انفیکشن کی وجہ سے سب سے زیادہ اموات ہوئی ہیں۔

مہاراشٹر میں اس عرصے میں 6293 ایکٹیو کیسز کے اضافے کے ساتھ فعال کیسوں کی کل تعداد بڑھ کر 28199 ہو گئی ہے، جب کہ مزید 8 مریضوں کی موت سے مرنے والوں کی تعداد بڑھ کر 141526 ہو گئی ہے۔ اس کے ساتھ ہی 1766 مزید مریضوں کے کورونا سے صحت مند ہونے کے ساتھ ان کی کل تعداد 6509096 ہو گئی ہے۔

ماتا ویشنو دیوی مندر میں کچھ عقیدت مندوں کے درمیان جھڑپ کی وجہ سے بھگدڑ مچ گئی تھی جس میں 12 لوگوں کی موت اور 13 دیگر زخمی ہوئے ہیں۔

نئی دہلی: مرکزی وزیر مملکت برائے داخلہ نتیانند رائے نے کہا ہے کہ ماتا ویشنو دیوی مندر میں کچھ عقیدت مندوں کے درمیان جھڑپ کی وجہ سے توازن بگڑنے کی وجہ سے بھگدڑ مچ گئی تھی اور واقعہ کی تحقیقات کا حکم دے دیا گیا ہے۔

مسٹر رائے نے کہا کہ نئے سال کی وجہ سے بھون میں زائرین کی بھیڑ بڑھ گئی تھی اور ڈھالان پر کچھ عقیدت مندوں کے درمیان جھڑپوں کی وجہ سے لوگوں کے توازن کھونے سے ایک دوسرے پر گرتے چلے گئے۔ انہوں نے کہا کہ واقعے کی تحقیقات کا حکم دے دیا گیا ہے اور وزیر اعظم خود اس معاملے رابطے قائم کئے ہوئے ہیں اور صورتحال پر نظر رکھ رہے ہیں۔

انہوں نے کہا کہ اب وہاں حالات معمول پر آ رہے ہیں اور انتظامات قائم کرکے تمام عقیدت مندوں کو درشن کی اجازت دی جائے گی اور کسی کو واپس نہیں کیا جائے گا۔

انہوں نے کہا کہ زخمیوں کو اسپتال میں داخل کرایا گیا ہے اور ان کے علاج میں کوئی کوتاہی نہیں برتی جائے گی۔
مرکزی وزیر داخلہ امت شاہ نے جموں و کشمیر کے لیفٹیننٹ گورنر منوج سنہا سے بھی بات کی ہے اور صورتحال کے بارے میں معلومات حاصل کیں۔

ایک ٹویٹ میں، انہوں نے کہا ’’ماتا ویشنو دیوی مندر میں ہونے والے افسوسناک حادثے سے دل کو بہت تکلیف ہوئی ہے۔ میں نے اس سلسلے میں لیفٹیننٹ گورنر منوج سنہا جی سے بات کی ہے۔ انتظامیہ زخمیوں کو علاج فراہم کرنے کے لیے مسلسل کام کر رہی ہے۔ اس حادثے میں جان گنوانے والے لوگوں کے اہل خانہ سے میں تعزیت کا اظہار کرتا ہوں‘‘۔

माता वैष्णो देवी मंदिर में हुई दुखद दुर्घटना से हृदय अत्यंत व्यथित है। इस संबंध में मैंने J&K के उपराज्यपाल श्री मनोज सिन्हा जी से बात की है। प्रशासन घायलों को उपचार पहुँचाने के लिए निरंतर कार्यरत है। इस हादसे में जान गँवाने वाले लोगों के परिजनों के प्रति संवेदना व्यक्त करता हूँ।

— Amit Shah (@AmitShah) January 1, 2022

واضح رہے کہ اس حادثے میں 12 لوگوں کی موت اور 13 دیگر زخمی ہوئے ہیں۔

سماج میں بڑھتے ہوۓ زبردستی مطالبہ اور نمائشی جہیز کی قبیح، حرام اور ناجائز رسم و رواج کے خلاف ایک رکن اسمبلی کا عملی جہاد

گزشتہ کل مجلس اتحاد المسلمین (بہار کے ریاستی صدر، امور اسمبلی حلقہ (سیمانچل) سے بہار اسمبلی کے رکن جناب اخترالایمان کی صاحب زادی کی شادی ہوئی۔ نماز عصر کے قبل دولہا، اپنے ابو جان اور خاندان کے چند ذمہ داران کے ساتھ ایم ایل اے صاحب کے گھر پہنچے۔ بعد نماز عصر مسجد کے مقامی نمازیوں، قریبی رشتے داروں اور طرفین کے چند مخصوص افراد کی موجودگی میں، مسجد ہی میں نکاح پڑھایا گیا۔ دولہے کی طرف سے کھجور اور مٹھائیاں تقسیم کی گئیں۔ نہ باراتی کے نکھرے اور نہ جہیز کا بوجھ ۔ خاندان، رشتے داروں اور پڑوسیوں کی طرف سے نیک خواہشات کے ساتھ اخترالایمان صاحب کی بیٹی کی رخصتی ہوگئی۔ ماشاء اللہ۔ سادگی سے دو گھنٹے میں شادی کی تقریب مکمل ہوگئی۔

مروجہ جہیز ایک قبیح رسم

موجودہ زمانے میں جہیز کا جس طرح رواج ہے۔ وہ ایک بری رسم کی شکل اختیار کر گیا ہے۔ امیر و غریب ہر ایک کے لئے لازمی درجہ کی چیز ہو گئی ہے۔ جس میں لڑکی والوں کی طرف سے طول طویل فہرست کی تکمیل کی جاتی ہے اور اس کی عورتوں میں مرد اور کہیں مردوں میں فخر و مباحات کے ساتھ تعریف و تحسین کے لئے نمائش کی جاتی ہے۔ اسی لئے معاشرے میں اُسے ضروری سمجھ کر نہ دینے والوں کو گری نظر سے دیکھا جاتا ہے۔ اس لئے لوگ نام آوری یا عزت بچانے کے لئے اپنی حیثیت سے زائد دینے کی کوشش کرتے ہیں۔ غریب ہو جاتے ہیں، مقروض ہو جاتے ہیں اور کبھی سودی و زکاۃ کی رقم حاصل کرنے کی کوشش کرتے ہیں۔ ایک غریب باپ، بیٹی کی شادی کے لئے نہ چاہتے ہوۓ بھی گاؤں گاؤں مسجد مسجد گھوم کر چندہ اکٹھا کرنے پر مجبور ہوتا ہے۔ مروجہ جہیز کی رقم اپنے لوازمات کے ساتھ ایک قبیح رسم بن گئی ہے، اس لئے مروجہ طریقے پر اُسے دینے سے گریز کیا جاۓ۔

جہیز کی جگہ بیٹیوں کو اپنی پراپرٹی میں حصہ دیں

مروجہ جہیز کی خرابیوں میں سے ایک بڑی خرابی یہ بھی ہے کہ لڑکیوں کو جہیز دے کر بعض لوگ یہ سمجھتے ہیں کہ ہم نے وراثت سے حصہ دے دیا پھر ورثاء اس کو وراثت سے محروم بھی کر دیتے ہیں۔ اس نیت سے جہیز دینا قانون شریعت کی خلاف ورزی اور اس میں کھلی تحریف ہے۔ ہم اپنی آخرت بہتر چاہتے ہیں تو جہیز کی جگہ بیٹیوں کو اپنی پراپرٹی میں حصہ دینا شروع کریں۔ یقین جانیں اگر کسی باپ یا بھائی نے اپنی بیٹی/بہن کی شادی میں پچاسوں لاکھ بھی خرچ کر ڈالا ہو اور بیٹی/بہن کو وراثت (پراپرٹی) میں حصہ نہیں دیا ہو تو وہ کل میدان محشر میں حقوق العباد کی حق تلفی کے معاملے میں عذاب دوزخ کے مستحق قرار دیے جائیں گے۔ خدا کی پناہ!

سماج کی ایک جاہلانہ، غیر شرعی رسم کے خلاف قدم

میں دل کی گہرائیوں سے سیمانچل میں امور حلقے سے بہار کے رکن اسمبلی بڑے بھائی اخترالایمان صاحب کو مبارک باد پیش کرتا ہوں۔ انہوں نے سماج کی ایک جاہلانہ، غیر شرعی رسم کے خلاف قدم اٹھانے کی ہمت دکھائی ہے اور عملی طور پر شادی کو "سادی سی تقریب” بناکر نکاح کے نبوی اور اسلامی طریقہ کو سماج کے سامنے پیش کیا ہے۔ اگر ان کو دیکھ کر ہمارے سماج کے لوگوں نے ان کی طرح سادگی سے نکاح شادی کا سلسلہ شروع کر دیا تو نیک عمل شروع کرنے کا ثواب اُنھیں برابر ملتا رہے گا۔ ان شاء اللہ

خوش گوار موڈ میں خوش مگن: منظر حسن نعیمی حسینی سرسی اسمبلی حلقہ امور ۔ 29 دسمبر 2021

ڈائریکٹر جنرل ٹیڈروس گیبریس نے اومیکرون اور ڈیلٹا ویرینٹس کو دوہرا خطرہ قرار دیتے ہوئے کہا کہ ان کے کیسز سونامی کی طرح بڑھ رہے ہیں۔

جنیوا: ورلڈ ہیلتھ آرگنائزیشن (ڈبلیو ایچ او) کے ڈائریکٹر جنرل ٹیڈروس گیبریس نے کووڈ-19 کے اومیکرون اور ڈیلٹا ویرینٹس کو دوہرا خطرہ قرار دیتے ہوئے کہا کہ ان کے کیسز سونامی کی طرح بڑھ رہے ہیں۔

مسٹر گیبریس نے بدھ کے روز ایک بیان میں کہا کہ کورونا کی ان دو شکلوں کے دوہرے خطرے کے باعث کیسز کی تعداد میں اضافہ ہو رہا ہے۔ اور اسپتالوں میں مریضوں اور اموات کی تعداد میں دوبارہ اضافہ ہو گا۔

انہوں نے کہا "مجھے گہری تشویش ہے کہ ڈیلٹا کی طرح اومیکرون بھی انتہائی متعدی ہے۔ اس وائرس کے کیسز تیزی سے بڑھ رہے ہیں۔ یہ اس تیزی سے پھیل رہا ہے کہ ویکسینیشن کے علاوہ صحت کے رہنما اصولوں کو اپنانا بھی بہت ضروری ہو گیا ہے تاکہ وائرس کے کیسز کو کم کیا جا سکے۔

ڈبلیو ایچ او کے ڈائریکٹر جنرل نے فارماسیوٹیکل کمپنیوں اور ترقی یافتہ ممالک کے رہنماؤں پر زور دیا ہے کہ وہ کورونا کے الفا، بیٹا، گاما، ڈیلٹا اور اومیکرون کی مختلف اقسام سے سبق حاصل کریں اور 70 فیصد آبادی کو ویکسین پلانے کا ہدف مقرر کرنے کی اپیل کی۔

اومیکرون کے پھیلاؤ کو روکنے کے لیے 30 دسمبر کی آدھی رات سے دو جنوری کی آدھی رات تک سفری پابندیاں

تروننت پورم: کیرالا حکومت نے کورونا کے نئے ویرینٹ اومیکرون کے پھیلاؤ کو روکنے کے لیے 30 دسمبر کی آدھی رات سے دو جنوری کی آدھی رات تک سفری پابندیاں عائد کر دی ہیں۔

تاہم، سبریمالا اور شیوگیری جانے والے عقیدت مندوں کو سفری پابندی سے مستثنیٰ رکھا گیا ہے۔ یہ اطلاع بدھ کو جاری ایک سرکاری پریس ریلیز میں دی گئی۔

پریس ریلیز میں کہا گیا ہے کہ پابندی آج رات 11 بجے سے صبح 5 بجے تک نافذ رہے گی۔ 30 دسمبر کی رات 11 بجے کے بعد نئے سال کا جشن منانے پر بھی پابندی عائد کر دی گئی ہے۔

نئے سال کی تقریبات کے پیش نظر ریجنل مجسٹریٹ کو تعینات کیا جائے گا جہاں رات کو بھیڑ کا امکان ہو۔

پریس ریلیز کے مطابق بار، کلب، ہوٹل اور ریستوراں اپنی استعداد کے 50 فیصد پر کام کر سکیں گے۔

رائے پور میں ہوئی دھرم سنسد کے دوران مہاتما گاندھی کے خلاف توہین آمیز کلمات ادا کرنے والے ہندو مذہبی رہنما کالی چرن مہاراج گرفتار

ممبئی: رائے پور میں ہوئی دھرم سنسد کے دوران مہاتما گاندھی کے خلاف توہین آمیز کلمات ادا کرنے والے گرفتار شدہ ہندو مذہبی رہنما کالی چرن مہاراج کی تحویل حاصل کرنے کے لئے مہاراشٹر پولیس کا ایک خصوصی دستہ ریاست چھتیس گڑہ کے رائے پور شہر میں خیمہ زن ہے جو عدالت سے اسکی تحویل طلب کرکے اسے مہاراشٹرا لائیگا۔

تاکہ ریاست میں اسکے خلاف درج شکایات پر کاروائی کی جاسکے ریاستی وزارات داخلہ کے ذرائع نے یہ باتیں کہی۔

مہاراج کی مدھیہ پردیش میں گرفتاری

ذرائع نے یہ بھی بتلایا کہ پونہ پولیس کی ایک ٹیم کو اسوقت راے پور کے لئے روانہ کیا گیا جب اسے مہاراج کی مدھیہ پردیش میں گرفتاری کی اطلاع موصل ہوئی۔

مدھیہ پردیش کے کھجوراو شہر میں گرفتار مہاراج کو چھتیس گڑہ کے راے پور شہر کی ایک عدالت میں پیش کیا جائيگا۔ جہاں مہاراشٹرا پولیس اسکی تحویل حاصل کرنے کی درخواست دیگی۔

واضح رہے کہ گزشتہ دنوں ریاستی اسمبلی کے جاری سرمائی اجلاس کے دوران نائب وزیر اعلیٰ اجیت پوار نے یہ اعلان کیا تھا اور کہا تھا کہ ریاستی حکومت کالی چرن مہاراج کے تبصروں کے بارے میں رپورٹ طلب کرے گی اور سخت کارروائی کرے گی۔

مہاتما گاندھی کے خلاف ان کے تبصروں کا معاملہ ریاستی اسمبلی میں این سی پی کے رکن نواب ملک نے اٹھایا تھا اور کہا تھا کہ کالی چرن مہاراج کا تعلق مہاراشٹر کے اکولا سے ہے۔ نیز انہوں نے بابائے ہند مہاتما گاندھی کے خلاف جو توہین آمیز کلمات ادا کئے ہے اس پر مذہبی رہنما کے خلاف غداری کا مقدمہ درج کرکے اسے گرفتار کرنا چاہیے۔

مہاراج کے خلاف متعدد مقامات پر ایف آئی آر درج

مہاراشٹرا میں بھی مہاراج کے خلاف متعدد مقامات پر ایف آئی آر درج ہے جسمیں پونہ، آکولہ، تھانہ اور دیگر شہر شامل ہیں۔

کل شام ریاستی کابینی وزیر جیتیندر آہواڑ نے بھی کالی چرن مہاراج کے خلاف تھانہ پولیس میں ایف آر درج کروایا تھا۔

رائے پور میں دھرم سنسد کے دوران کالی چرن مہاراج نے کہا تھا، ”اسلام کا ہدف سیاست کے ذریعے قوم پر قبضہ کرنا ہے۔ ہماری آنکھوں کے سامنے، انہوں نے (مسلمانوں نے 1947 میں قبضہ کر لیا تھا (تقسیم کا حوالہ دیتے ہوئے)… وہ پہلے ایران، عراق اور افغانستان پر قبضہ کر چکے تھے۔ انہوں نے سیاست کے ذریعے بنگلہ دیش اور پاکستان پر قبضہ کیا… میں ناتھورام گوڈسے کو سلام کرتا ہوں کہ اس نے گاندھی کو مارا۔”

رائے پور پولیس نے گزشتہ دنوں مہاراج کے خلاف ایف آئی آر درج کی تھی۔

کووڈ انفیکشن میں تیزی سے اضافہ کے درمیان، گزشتہ 24 گھنٹوں میں کووڈ کے کل 13154 معاملے درج کیے گئے ہیں

نئی دہلی: ملک میں کووڈ انفیکشن میں تیزی سے اضافہ کے درمیان، گزشتہ 24 گھنٹوں کے دوران کووڈ انفیکشن کے کل 13154 معاملے درج کیے گئے ہیں جبکہ گزشتہ روز یہ تعداد 9195 تھی۔

مرکزی وزارت صحت اور خاندانی بہبود نے جمعرات کو یہاں کہا کہ پچھلے 24 گھنٹوں میں 961 لوگ اومیکرون سے متاثر پائے گئے ہیں، جن میں دہلی میں سب سے زیادہ 263، مہاراشٹر میں 252 اور گجرات میں 97 معاملے ہیں۔

اس کے علاوہ 22 ریاستوں میں 961 لوگ اومیکرون سے متاثر ہوئے ہیں۔ ان میں سے 320 انفیکشن سے صحت یاب ہو چکے ہیں۔

وزارت نے کہا کہ گزشتہ 24 گھنٹوں میں ملک میں 63 لاکھ 91 ہزار 282 کووڈ ویکسین لگائی گئی ہیں۔ اس کے ساتھ ہی آج صبح 7 بجے تک 143 کروڑ 83 لاکھ 22 ہزار 742 کووڈ ویکسین دی گئی ہیں۔

گزشتہ 24 گھنٹوں میں کووڈ انفیکشن کے 13154 نئے کیس رپورٹ ہوئے ہیں۔

اس وقت ملک میں 82 ہزار 402 کووڈ مریض زیر علاج ہیں۔ یہ متاثرہ معاملوں کا 0.24 فیصد ہے۔ کل 9195 افراد متاثر ہوئے تھے۔

اسی مدت میں 7486 لوگ کووڈ سے نجات پا چکے ہیں۔ اب تک مجموعی طور پر تین کروڑ 42 لاکھ 58 ہزار 778 لوگ کووڈ سے صحت یاب ہو چکے ہیں۔ صحت یابی کی شرح 98.38 فیصد ہے۔

گزشتہ 24 گھنٹوں میں ملک میں 11 لاکھ 99 ہزار 252 کووڈ ٹیسٹ کیے گئے ہیں۔ ملک میں کل67 کروڑ 64 لاکھ 45 ہزار 395 کووڈ ٹیسٹ کیے گئے ہیں۔