ضلع اعظم گڑھ میں سماج وادی پارٹی اور بھارتیہ جنتا پارٹی کے حامیوں کے درمیان پرتشدد جھڑپ ہونے سے متعدد گاڑیوں کو نقصان پہنچا ہے اور علاقے میں کشیدگی پھیل گئی ہے

اعظم گڑھ: اترپردیش کے ضلع اعظم گڑھ کے سدھاری پولیس اسٹیشن علاقے کے شرف الدین پور گاؤں میں پولنگ اختتام پذیر ہونے سے کچھ دیر پہلے سماج وادی پارٹی (ایس پی) اور بھارتیہ جنتا پارٹی (بی جے پی) کے حامیوں کے درمیان پرتشدد جھڑپ ہونے سے متعدد گاڑیوں کو نقصان پہنچا ہے اور علاقے میں کشیدگی پھیل گئی۔

پولیس نے بتایا پولنگ ختم ہونے کے آخری مرحلے میں اعظم گڑھ صدر سے ایس پی امیدوار درگا پرساد یادو اور بی جے پی امیدوار اکھلیش مشرا کے حامی ایک دوسرے کے سامنے آگئے اور تشدد پھوٹ پڑا۔ دونوں فریقین نے ایک دوسرے پر پتھر بازی کی جس میں کئی گاڑیوں کو نقصان پہنچا ہے۔ علاقے میں کشیدگی ہے اور ایس پی و بی جے پی امیدواروں نے ایک دوسرے پر الزامات عائد کئے ہیں۔

سپرنٹنڈنٹ آف پولیس انوراگ آریہ نے بتایا کہ حالات کنٹرول میں ہے اور معاملے کی جانچ کی جارہی ہے۔ ان کے مطابق پورے معاملے کی جانچ کی جارہی ہے کہ کن وجوہات کی بنا پر یہ حالات پیدا ہوئے اور اسی کی بنیاد پر آگے کی کاروائی کی جائے گی۔ خاطیوں کے خلاف سخت کاروائی ہوگی۔

روس اور یوکرین کے درمیان جنگ کے معاملے پر عالمی عدالت انصاف میں سماعت شروع ہوئی

ہیگ: روس اور یوکرین کے درمیان جنگ کے معاملے پر پیر کے روز ہالینڈ کے ہیگ میں واقع بین الاقوامی عدالت انصاف میں سماعت شروع ہوئی۔

عالمی عدالت انصاف کی جانب سے جاری بیان کے مطابق اس معاملے کی سماعت منگل کے روز بھی ہوگی۔

یہ بات قابل ذکر ہے کہ عالمی عدالت انصاف اقوام متحدہ کے اہم عدالتی ادارے کے طور پر تنازعات کے پرامن حل میں اہم کردار ادا کرتی ہے۔

یوکرین نے 26 فروری کو بین الاقوامی عدالت انصاف میں روس کے خلاف نسل کشی کے جرم کی روک تھام اور سزا کے معاہدے کے تحت کارروائی شروع کرنے اور روس کو یوکرین میں تمام فوجی کارروائیوں کو فوری طور پر روکنے کی ہدایت دینے کے لیے درخواست دائر کی تھی۔

روس کی جانب سے یوکرین پر مزید حملوں کے انتباہ کے بعد زیلنسکی نے اپنے خطاب میں برہمی کا اظہار کیا

کیف: پڑوسی ملک روس کی جانب سے جنگ کا شکار ہونے والے ملک یوکرین کے صدر ولادیمیر زیلنسکی نے کہا ہے کہ ظلم کرنے والوں کو نہ بھولیں گے اور نہ ہی معاف کریں گے۔

انہوں نےروس کے حملوں کے دوران بچوں، خواتین پر ظلم کرنے والوں کو سزائیں دینے کے عزم کا اظہار کیا۔
روس کی جانب سے یوکرین پر مزید حملوں کے انتباہ کے بعد زیلنسکی نے اپنے خطاب میں برہمی کا اظہار کیا اور کہا کہ یہ قتل عام ہے، ناصرف قتل عام بلکہ سوچا سمجھا قتل عام ہے۔

انہوں نے کہا کہ ہم معاف نہیں کریں گے، ہم نہیں بھولیں گے، ہم ہر اس شخص کو سزا دیں گے جس نے ہماری سرزمین پر ظلم کیا ہے، ظلم کرنے والوں کے لیے اس زمین پر قبر کے سوا کوئی پرسکون جگہ نہیں ہوگی۔

خیال رہے کہ روسی افواج نے آج یوکرین کے شہروں کو ہوائی، زمینی اور سمندری راستوں سے مزید حملوں کا انتباہ جاری کیا ہے۔

روس اور یوکرین کے درمیان مذاکرات کا تیسرا دور آج ہوگا جس کا مقصد خونریز تنازع سے نکلنے کا راستہ تلاش کرنا ہے۔

اتر پردیش اسمبلی انتخابات کے ساتویں اور آخری مرحلے کے لیے صبح سات بجے ووٹنگ شروع ہو گئی ہے

لکھنؤ: اتر پردیش میں اسمبلی انتخابات کے ساتویں اور آخری مرحلے کے لیے نو اضلاع کی 54 نشستوں کے لیے پہلے سے طے شدہ انتخابی شیڈول کے مطابق پیر کی صبح سات بجے ووٹنگ شروع ہو گئی۔

الیکشن کمیشن کی طرف سے موصولہ اطلاعات کے مطابق اس مرحلے میں اعظم گڑھ، مؤ، جونپور، غازی پور، چندولی، وارانسی، مرزا پور، بھدوہی اور سون بھدرا اضلاع کی 51 اسمبلی سیٹوں پر شام 6 بجے تک ووٹ ڈالے جائیں گے۔ ان کے علاوہ 3 سیٹوں چندولی ضلع کی چکیہ (محفوظ) اور سون بھدرا ضلع کی رابرٹس گنج اور دودھی (محفوظ) سیٹوں پر رائے دہندگان شام 4 بجے تک اپنا حق رائے دہی استعمال کر سکیں گے۔

الیکشن کمیشن سے موصول ہونے والی معلومات کے مطابق صبح 7 بجے ووٹنگ شروع ہونے کے فوراً بعد دیہی علاقوں کے پولنگ اسٹیشنوں پر ووٹروں کی قلیل تعداد نے اپنا حق رائے دہی استعمال کیا۔ ووٹروں سے سورج نکلنے کے بعد گھروں سے نکل کر پولنگ اسٹیشنوں تک پہنچنے کی توقع ہے۔

پولنگ عملے کی پولنگ ٹیمیں اتوار کی شام دیر گئے تک پولنگ اسٹیشنوں پر پہنچ چکی تھیں تاکہ ووٹنگ کا عمل بروقت شروع کیا جا سکے۔

اہم بات یہ ہے کہ پولنگ کے ساتویں مرحلے میں 2.06 کروڑ ووٹر ای وی ایم میں 75 خواتین امیدواروں سمیت 613 امیدواروں کی قسمت کا فیصلہ کریں گے۔ پولنگ کے اس مرحلے میں 1.09 کروڑ مرد، 97.08 لاکھ خواتین اور 1027 تیسری جنس کے ووٹر ہیں۔

انتخابات کے آخری مرحلے میں 12,210 پولنگ مراکز میں سے 23,614 پولنگ اسٹیشنوں پر پولنگ ہوگی۔ پرامن، آزادانہ اور منصفانہ پولنگ کو یقینی بنانے کے لیے 52 جنرل آبزرور، 09 پولیس مبصر اور 17 ایکسپینڈیچر آبزرور بھی تعینات کیے گئے ہیں۔

فیس بک پر یوکرینی مسلح افواج کے ذریعہ ایک پوسٹ میں بھی کیا گیا ہے، جس میں کہا گیا ہے کہ وہ جنگ کا تجربہ رکھنے والے لوگوں کی تلاش کررہے ہیں جو روسی حملے کے خلاف یوکرین کے ساتھ کھڑے ہوں گے

نیویارک/کیف: روس کے حملے کا مقابلہ کرنے میں مدد کرنے کے لئے ایک بین الاقوامی بٹالین میں شامل ہونے کے یوکرین کے اعلان پر تقریباً تین ہزار امریکی رضاکاروں نے اتفاق کا اظہار کیا ہے۔

یوکرینی صدر ولادیمیر زیلینسکی نے اپنے ٹیلی گرام چینل پر پوسٹ کئے گئے ایک جذباتی ویڈیو میں 16 ہزار غیر ملکی رضاکاروں کی ’بین الاقوامی فوج‘ کا ذکر کیا ہے۔ انہوں نے رضاکاروں سے ’یوکرین ،یورپ اور دنیا کی حفاظت میں شامل ہونے‘ کی بھی اپیل کی۔ انہوں نے کہا، ’’ہمارے پاس کھونے کے لئے کچھ بھی نہیں ہے، لیکن ہماری اپنی آزادی ہے۔‘‘

وائس آف امریکہ کی رپورٹ کے مطابق، نئی اکائی – یوکرین کے علاقائی دفا کی بین الاقوامی فوج، غیر ملکیوں کے ذریعہ تقرری کی جائے گی جو یوکرینین کے ساتھ مل کر روسی حملہ آوروں کو پیچھے ہٹانے کے لئے تیار ہیں۔

یوکرین کے بین الاقوامی دفاعی فوج میں شامل ہونے کے خواہش مند غیر ملکی شہریوں کے لئے سبھی ضروری معلومات والی ایک ویب سائٹ شروع کی گئی ہے۔

مسٹر زیلنسکی کے پیغام کا ذکر فیس بک پر یوکرینی مسلح افواج کے ذریعہ ایک پوسٹ میں بھی کیا گیا ہے، جس میں کہا گیا ہے کہ وہ جنگ کا تجربہ رکھنے والے لوگوں کی تلاش کررہے ہیں جو روسی حملے کے خلاف یوکرین کے ساتھ کھڑے ہوں گے۔

حکومت نے رضاکاروں کے لئے ویزا ضرورتوں کو پہلے معطل کردیا ہے۔

یوکرین کی حکومت کی جانب سے جاری بیان میں کہا گیا ہے کہ چین کے 2500، ترکی کے 1700 اور ازبکستان کے 200 طلبہ کے انخلاء میں بھی مدد کی گئی ہے

کیف/نئی دہلی: یوکرین کی حکومت نے اتوار کو کہا کہ گذشتہ ایک ہفتے میں دس ہزار ہندوستانیوں سمیت ایک لاکھ 30 ہزار سے زائد غیر ملکیوں کو ملک چھوڑنے میں مدد کی گئی ہے۔

یوکرین کی حکومت کی جانب سے جاری بیان میں کہا گیا ہے کہ چین کے 2500، ترکی کے 1700 اور ازبکستان کے 200 طلبہ کے انخلاء میں بھی مدد کی گئی ہے۔

بیان میں مزید کہا گیا ہے کہ غیر ملکی شہریوں کو بحفاظت اور جلد از جلد یوکرین چھوڑنے میں مدد جاری ہے۔ دوسرے ممالک میں سفارتی مشن اپنے شہریوں کو جنگ زدہ علاقوں سے نکالنے کی کوششوں میں زیادہ فعال ہونے اور یوکرین کی وزارت خارجہ کے ساتھ بہ ضابطہ رابطہ قائم رکھنے کی درخواست کی گئی ہے۔

بیان میں کہا گیا ہے کہ غیر ملکی شہریوں کو یوکرین سے محفوظ طور پر اور جتنی جلدی ہو سکے ملک چھوڑنے کے لیے مدد جاری ہے۔ دیگر ممالک کے سفارتی مشن سے اپنے شہریوں کو جنگ زدہ علاقوں سے نکالنے کی کوششوں میں زیادہ فعال ہونے اور یوکرین کی وزارت خارجہ کے ساتھ بہ ضابطہ رابطہ قائم کرنے کی درخواست کی گئی ہے۔

بیان میں غیر ملکی حکومتوں سے روس کے صدر ولادیمیر پوتن سے یہ مطالبہ کرنے کی بھی درخواست کی گئی ہے کہ وہ یوکرین کے خلاف جنگ فوراً روک دیں۔

بیان میں کہا گیا ہے کہ انتہائی مشکل حالات کے باوجود یوکرین کی حکومت نے مغربی سرحد پر تمام چوکیوں کو 24 گھنٹے کھلا رکھا ہے۔ یہاں چیکنگ کے عمل کو زیادہ سے زیادہ آسان بنایا گیا ہے اور مطلوبہ دستاویزات کی فہرست کو کم سے کم کیا گیا ہے۔

موصولہ رپورٹ کے مطابق اس نوجوان نے اسرائیل کے پولیس حکام کو چاقو مار کر زخمی کر دیا تھا اس کے بعد پولیس نے اسے گولی مار کر شہید کر دیا

یروشلم: اسرائیل کی پولیس نے اتوار کو مشرقی یروشلم کے پرانے شہر میں ایک فلسطینی نوجوان کو گولی مار کر شہید کر دیا۔

موصولہ رپورٹ کے مطابق اس نوجوان نے اسرائیل کے پولیس حکام کو چاقو مار کر زخمی کر دیا تھا۔ اس کے بعد پولیس نے اسے گولی مار کر شہید کر دیا۔

پولیس نے ایک بیان میں کہا کہ ایک 19 برس کے نوجوان نے مشرقی یروشلم کے پرانے شہر کے ایک گیٹ پر تعینات دو پولیس اہلکاروں پر حملہ کیا۔ پولیس نے کہا، ’مشتبہ نوجوان نے چاقو نکالا اور ایک اہلکار پر وار کیا‘۔

پولیس کے مطابق چاقو لگنے سے ایک اہلکار کو معمولی چوٹیں آئیں اور ایک اہلکار کو شدید چوٹیں آئیں۔ اس کے بعد پولیس نے مشتبہ نوجوان پر فائرنگ کردی۔

پنجاب کے ضلع امرتسر کے خاصہ واقع بارڈر سیکورٹی فورس (بی ایس ایف) کے ہیڈکوارٹر میں ایک جوان نے کسی بات سے ناراض ہو کر اپنی رائفل سے گولیاں چلا کر چار جوانوں کو ہلاک کر دیا

امرتسر: پنجاب کے ضلع امرتسر کے خاصہ واقع بارڈر سیکورٹی فورس (بی ایس ایف) کے ہیڈکوارٹر میں اتوار کی صبح ایک جوان نے اندھا دھند گولیاں چلائیں، جس سے پانچ افراد کی موقع پر ہی موت ہو گئی اور دوسرا شدید طور پر زخمی ہو گیا۔

بی ایس ایف کے افسر آشیش پراتے نے بتایا کہ 144 ویں بٹالین کے سپاہی سوتُپا نے آج صبح کسی بات سے ناراض ہو کر اپنی رائفل سے گولیاں چلا کر چار جوانوں کو ہلاک کر دیا۔ واقعہ کے بعد جوان نے خود کو بھی گولی مار لی جس کے نتیجے میں اس کی موت ہوگئی۔ گولی چلنے کی آواز سن کر دوسرے سپاہی ادھر ادھر بھاگنے لگے۔

انہوں نے کہا کہ ایک جوان شدید زخمی ہے، جسے امرتسر کے سول اسپتال بھیجا گیا ہے۔ افسر نے ابھی تک ہلاک ہونے والوں کی شناخت ظاہر نہیں کی ہے۔

بتایا جا رہا ہے کہ مہاراشٹر کے سوتپا سے پچھلے کچھ دنوں سے مسلسل ڈیوٹی لی جا رہی تھی۔ اس سے وہ بہت پریشان ہوا۔ ہفتے کو اس کی بی ایس ایف کے ایک سینئر افسر سے بحث بھی ہوئی لیکن کوئی فائدہ نہیں ہوا۔ سوتپا اتوار کی صبح بھی ڈیوٹی پر تعینات تھا۔

واقعہ کی اطلاع ملتے ہی پولیس اور بی ایس ایف کے اعلیٰ افسران موقع پر پہنچ گئے۔ پولیس نے لاشوں کو پوسٹ مارٹم کے لیے تحویل میں لینے کی تیاریاں شروع کردی ہیں۔ ہلاک ہونے والوں اور زخمی کے اہل خانہ کو مطلع کیا جا رہا ہے۔

ایک اسرائیلی افسر کے مطابق ملاقات میں یوکرین بحران کی صورت حال کے مختلف پہلوؤں پر گفتگو ہوئی، ملاقات میں ویانا میں ایران جوہری مذاکرات میں پیش رفت بھی زیر بحث آئی

ماسکو: اسرائیل کے وزیر اعظم نفتالی بینیٹ نے روسی صدر ولادیمیر پیوٹن کو یوکرین بحران پر ثالثی کی پیشکش کی ہے۔

خبر رساں ایجنسی کے مطابق نفتالی بینیٹ نے ماسکو میں روس کے صدر ولادیمیر پیوٹن سے تین گھنٹے کی طویل ملاقات کی۔ یوکرین نے اسرائیل سے ماسکو کے ساتھ بات چیت کی درخواست کی تھی۔

ایک اسرائیلی افسر کے مطابق ملاقات میں یوکرین کی صورت حال کے مختلف پہلوؤں پر گفتگو ہوئی، ملاقات میں ویانا میں ایران جوہری مذاکرات میں پیش رفت بھی زیر بحث آئی۔

اس کے علاوہ اسرائیلی افسر نے بتایا کہ دورے کے لیے امریکہ، جرمنی اور فرانس کی معاونت حاصل تھی جبکہ صدر پیوٹن سے ملاقات کے بعد اسرائیلی وزیر اعظم نے یوکرینی صدر کو فون کیا۔

دوسری جانب روس کے صدر ولادیمیر پیوٹن کا کہنا ہے کہ ملک میں مارشل لاء لگانے کا کوئی ارادہ نہیں ہے، مارشل لاء کی ضرورت اس وقت ہوتی ہے جب ملک کو بیرونی جارحیت کا سامنا ہو۔

پیوٹن کا کہنا تھا کہ یوکرین میں ہر چیز منصوبے کے مطابق چل رہی ہے اور جو ملک یوکرین کی فضائی حدود کو نوفلائی زون قرار دے گا وہ تنازع میں شامل ہو جائے گا۔

روس یوکرین میں گولہ بارود کے ڈپو کو تباہ کرنے کے لیے طویل فاصلے تک مار کرنے والے درست ہتھیاروں کا استعمال کر رہا ہے

ماسکو: روسی وزارت دفاع کے ترجمان ایگور کوناشینکوف نے کہا کہ روس کے مسلح افواج نے یوکرین میں فوجی کارروائی کے آغاز سے لے کر اب تک یوکرین کے 2,037 فوجی بنیادی ڈھانچے کو تباہ کیا ہے۔

انہوں نے کہا کہ ان ڈھانچوں میں یوکرین کی مسلح افواج کی 71 کمانڈ پوسٹیں اور مواصلاتی مراکز، 98 طیارہ شکن میزائل سسٹم اور 61 ریڈار اسٹیشن شامل ہیں۔

اس کے علاوہ زمین پر موجود تقریباً 66 اور فضا میں 16 طیارے تباہ ہوئے، جب کہ 708 ٹینک اور دیگر بکتر بند جنگی گاڑیاں، 74 راکٹ لانچرز، 261 فیلڈ آرٹلری اور مارٹر، خصوصی فوجی گاڑیوں کے 505 یونٹس اور بغیر پائلٹ کے 56 فضائی گاڑیاں تباہ ہوئیں۔

انہوں نے کہا کہ روس یوکرین میں گولہ بارود کے ڈپو کو تباہ کرنے کے لیے طویل فاصلے تک مار کرنے والے درست ہتھیاروں کا استعمال کر رہا ہے۔