ورکر یونین سے خطاب کرتے ہوئے ممتا بنرجی نے ریاستی سرکاری ملازمین کے ساتھ ہمدردی کا اظہار کرتے ہوئے کہا کہ کورونا وائرس کے بحران کی وجہ سے مرکزی حکومت کے ملازمین کی حالت خراب ہے ۔ مگر ہم اپنے ملازمین کے ساتھ کھڑے ہیں۔

کلکتہ: اسمبلی انتخابات سے عین قبل وزیر اعلیٰ ممتا بنرجی نے آج سرکاری ملازمین کو خوشخبری سناتے ہوئے کہا کہ اگلے سال جنوری میں 3 فیصد کی شرح کے حساب سے ڈی اے دیا جائے گا۔

ریاستی سیکریٹریٹ میں ورکر یونین سے خطاب کرتے ہوئے ممتا بنرجی نے ریاستی سرکاری ملازمین کے ساتھ ہمدردی کا اظہار کرتے ہوئے کہا کہ کورونا وائرس کے بحران کی وجہ سے مرکزی حکومت کے ملازمین کی حالت خراب ہے ۔ مگر ہم اپنے ملازمین کے ساتھ کھڑے ہیں۔

26 جولائی 2019 کو ایس اے ٹی نے ریاستی حکومت کو آئندہ چھ ماہ میں ریاستی سرکاری ملازمین کو ڈی اے ادا کرنے کی ہدایت دی تھی۔ ریاستی حکومت کے ذریعہ نہیں ادا کئے جانے کے بعد سرکاری کارکنوں کی تنظیم ایس اے ٹی نے توہین عدالت کا مقدمہ دائر کیا۔

ریاست نے ایس اے ٹی میں ایک بار پھر نظرثانی کی درخواست دائر کردی۔ اس قانونی لڑائی کے درمیان سرکاری ملازمین کی یونین نے وزیر اعلیٰ ممتا بنرجی کو خط لکھا۔ اس خط کے تناظر میں ممتا بنرجی نے میٹنگ طلب کی اور کہا کہ مرکزی حکومت کے ملازمین کو غیریقینی صورت حال کا سامنا ہے۔

اس موقع پر وزیر اعلی ممتا بنرجی نے مرکز کے بقایا جات کی ادائیگی کا مطالبہ کرتے ہوئے کہا کہ ہمارے بقایا جات تقریبا 75,000 کروڑ روپئے ہیں۔ وہ 2000 روپے کی بات کر رہے ہیں۔ ممتا بنرجی نے کہا کہ کووڈ کے علاج پر روپے خرچ ہوتے ہیں۔ امفان طوفان کے متاثرین کی مدد کے لئے مرکزی حکومت نے ایک روپے نہیں دیا ہے۔

انجینئرس فیڈریشن نے زرعی قوانین اور الیکٹرسٹی (ترمیمی) بل کی واپسی کا مطالبہ کیا اور کسانوں کو حمایت دینے کا فیصلہ کیا ہے۔ الیکٹرسٹی (ترمیمی) بل کا ڈرافٹ جاری ہوتے ہی بجلی انجینئروں نے اس کی مخالفت کی تھی۔

لکھنؤ: آل انڈیا پاور انجینئرس فیڈریشن نے زرعی قوانین اور الیکٹرسٹی (ترمیمی) بل کی واپسی کا مطالبہ کرتے ہوئے گذشتہ سات دنوں سے سراپا احتجاج کسانوں کے حمایت دینے کا فیصلہ کیا ہے۔

آل انڈیا پاور انجینئرس فیڈریشن کے چیئرمین شیلندر دوبے نے آج یہاں کہا کہ الیکٹرسٹی (ترمیمی) بل کا ڈرافٹ جاری ہوتے ہی بجلی انجینئروں نے اس کی مخالفت کی تھی۔ اس بل میں اس بات کی تجویز ہے کہ کسانوں کو بجلی ٹیرف میں مل رہی سبسڈی ختم کردی جائے اور بجلی کے اخراجات سے کم قیمت پر کسانوں سمیت کسی بھی صارف کو بجلی نہ دی جائے۔

اگر بل میں اس بات کی تجویز ہے کہ حکومت کو چاہے تو ڈائریکٹر بنیفٹ ٹرانسفر کے ذریعہ کسانوں کو سبسڈی دے سکتی ہے مگر اس سے پہلے کسانوں کو بجلی بل کے پوری ادائیگی کرنی پڑے گی جو سبھی کسانوں کے لئے ممکن نہیں ہوگا۔ انہوں نے کہا کہ کسان مشترکہ مورچہ کی اپیل پر چل رہی تحریک میں زرعی قوانین کی واپسی کے ساتھ کسانوں کی یہ ایک اہم مطالبہ ہے کہ بجلی (ترمیمی) بل 2020 واپس لیا جائے۔

قومی دارالحکومت میں کسانوں کے ساتھ مرکز کے نامناسب رویہ کے خلاف کسانوں کی تنظیموں کی اپیل پر حیدرآباد میں کسانوں نے احتجاج کیا، جس میں دہلی کے کسانوں کی حمایت کی گئی۔

حیدرآباد: مرکزی حکومت کی جانب سے حال ہی میں پارلیمنٹ میں منظور شدہ زرعی قوانین اور بجلی کے ترمیمی بل کے خلاف تلنگانہ کے مختلف مقامات پر کل جماعتی کسانوں کی تنظیموں کی جانب سے احتجاج کیا گیا۔

قومی دارالحکومت نئی دہلی میں کسانوں کے ساتھ مرکز کے نامناسب رویہ کے خلاف کسانوں کی تنظیموں کی اپیل پر یہ احتجاج کیا گیا، جس میں دہلی کے کسانوں کی حمایت کی گئی۔

اس موقع پر مودی زیر قیادت مرکزی حکومت کے خلاف اور کسانوں کی حمایت میں نعرے بازی کی گئی۔ حیدرآباد ۔ گولکنڈہ چوراہا پر کسانوں کی بڑی تعداد نے راستہ روکو احتجاج کیا۔ احتجاجیوں نے کسانوں کے ساتھ نامناسب رویہ کا مرکزی حکومت پر الزام لگایا۔

احتجاجی کسان تنظیموں نے کہا کہ مرکز کے نامناسب رویہ کے خلاف اس ماہ کی پانچ تاریخ کو ملک بھر میں احتجاج کیا جائے گا۔ اس احتجاج کے نتیجہ میں ٹریفک میں رکاوٹ پیدا ہوگئی۔ پولیس نے احتجاجیوں کو گرفتار کرلیا۔

اے پی کے ضلع مشرقی گوداوری کے راجمندری جونیر کالج میں تعلیم حاصل کرنے والی لڑکی اور لڑکے نے کلاس روم میں شادی کی۔ یہ دونوں ایک دوسرے سے محبت کرتے تھے۔

حیدرآباد: کالج کی کلاس روم میں نابالغ طالبہ اور طالب علم کی شادی کا چونکا دینے والا واقعہ پیش آیا۔ اے پی کے ضلع مشرقی گوداوری کے راجمندری جونیر کالج میں تعلیم حاصل کرنے والی لڑکی اور لڑکے نے کلاس روم میں شادی کی۔ یہ دونوں ایک دوسرے سے محبت کرتے تھے۔

تفصیلات کے مطابق انٹرمیڈیٹ سکنڈری ایم پی سی میں تعلیم حاصل کرنے والے ان دونوں نے گذشتہ ماہ کی 17 تاریخ کو کلاس روم میں شادی کی۔ یہ معاملہ تاخیر سے اُس وقت منظر عام پر آیا جب اس واقعہ کے سلسلہ میں ایک ویڈیو وائرل ہوا۔ اس ویڈیو میں دکھایا گیا ہے کہ طالب علم اپنی معشوقہ کے گلے میں منگل سوتر ڈال رہا ہے۔

اس ویڈیو کے وائرل ہونے کے ساتھ ہی اس کالج کے پرنسپل نے دونوں کو ٹی سی دے دی جس کے ساتھ ہی سب نے یہ سمجھا کہ یہ معاملہ یہیں ختم ہوگیا ہے تاہم مزید حیرت انگیز بات یہ سامنے آئی کہ یہ دونوں نابالغ ہیں۔

اس واقعہ کے ویڈیو کو دیکھنے کے بعد دونوں کے والدین سکتہ سے دو چار ہوگئے۔ اس بات کا ہنوز پتہ نہیں چل سکا کہ یہ شادی مزاح کے لئے کی گئی تھی یا پھر یہ شادی حقیقی معنوں میں شادی تھی۔

کسانوں نے نوئیڈا سے غازی آباد کو آنے والے اور قومی دارالحکومت کو آنے والے کئی راستوں میں رکاوٹ کھڑی کر دی ہے جس کی وجہ سے مختلف مقامات پر جام کا مسئلہ ہو گیا ہے۔ کسان تنظمیوں نے 5 دسمبر کو قومی سطح پر دھرنے کی اپیل کی ہے۔

نئی دہلی: کسان تنظیموں نے زرعی اصلاحی قوانین کو واپس لینے کے مطالبے میں قومی دارالحکومت میں دباؤ بڑھا دیا ہے اور کہا ہے کہ مطالبات تسلیم کیے جانے کے بعد ہی وہ واپس جائیں گے۔

کسانوں نے نوئیڈا سے غازی آباد کو آنے والے اور قومی دارالحکومت کو آنے والے کئی راستوں میں رکاوٹ کھڑی کر دی ہے جس کی وجہ سے مختلف مقامات پر جام کا مسئلہ ہو گیا ہے۔ اس دوران وزیر زراعت نریندر سنگھ تومر نے کہا کہ انھیں یقین ہے کہ کسانوں کے مسائل کا حل ضرور نکلے گا۔

مسٹر تومر نے کہا کہ کسان تحریک کا راستہ چھوڑ کر بات چیت کا راستہ اختیار کریں۔ دہلی کے راستے بند ہونے سے عوام کو مشکلات کا سامنا ہے۔ دہلی کے عوام برداشت اور خندہ پیشانی کا ثبوت دیں۔

 3 دسمبر کو حکومت کے ساتھ ہونے والی میٹنگ کا لائحہ عمل تیار

کسان تنظیموں کی آج دن بھر میٹنگ ہوتی رہی اور تین دسمبر کو حکومت کے ساتھ ہونے والی میٹنگ کا لائحہ عمل تیار کیا گیا۔ کسانوں نے کہا ہے کہ اگر ان کے تمام مطالبات تسلیم نہیں کیے جاتے تو دہلی آنے کے تمام راستے بند کر دیے جائیں گے۔

کسان تنظمیوں نے پانچ دسمبر کو قومی سطح پر دھرنے کی اپیل کی ہے۔

کسان رہنما راکیش ٹکیت نے کہا ہے کہ مطالبات تسلیم کیے جانے کے بعد ہی کسان دہلی سے واپس جائیں گے۔ انہوں نے کہا کہ حکومت کو قومی زرعی پالیسی بنانی چاہیے اور کسانوں کے مسائل حل کرنے چاہییں ۔ انہوں نے الزام عائد کیا کہ حکومت نے بار بار کسانوں کو دھوکہ دیا۔

آرٹسٹوں کی کسانوں کے مطالبات کی حمایت

اس درمیان کچھ آرٹسٹوں نے کسانوں کے مطالبات کی حمایت کی ہے۔ پنجاب اور ہریانہ سے خاتون کسانوں کا آنا بھی شروع ہو گیا ہے۔ گذشتہ 32 کسانوں تنظیموں کے ساتھ حکومت کے چوتھے دور کی بات چیت ہوگی۔

کسان تنظیموں نے حکومت سے پارلیمنٹ کا خصوصی اجلاس بلا کر زرعی اصلاحی قوانین کو رد کرنے کا بھی مطالبہ کیا ہے اور فصلوں کے کم از کم امدادی قیمت (ایم ایس پی) کو قانونی درجہ دینے کا مطالبہ کیا ہے۔

برطانوی میڈیا کے حوالے سے بتایا گیا ہے کہ حکومت نے انگلینڈ کے ہسپتالوں کو ہدایات جاری کی ہیں کہ آئندہ ہفتے سے کورونا ویکسین کو سب سے پہلے طبی رضاکاروں پر استعمال شروع کر دیا جائے۔

لندن: برطانیہ نے کورونا کی امریکہ کی فائزر اور جرمنی کی بائیو این ٹیک کمپنیوں کے ویکسین کے استعمال کی اجازت دے دی۔ ان ویکسینوں کو ہنگامی بنیادوں پر استعمال کرنے کے ساتھ ہی عام استعمال کی بھی اجازت دے دی گئی ہے۔

اس طرح برطانیہ دنیا کا پہلی کورونا ویکسین کے استعمال کی اجازت دینے والا ملک بن گیا۔ جلد ہی وہاں اس ویکسین کا عام استعمال بھی شروع ہو جائے گا۔

ادویہ ساز کمپنیوں فائزر اور بائیو این ٹیک نے گزشتہ ماہ 10 نومبر کو دعویٰ کیا تھا کہ ان کی تیار کردہ ویکسین بیماری سے تحفظ کے لیے 90 فیصد سے زیادہ مؤثر ہیں۔

برطانوی میڈیا کے حوالے سے بتایا گیا ہے کہ حکومت نے انگلینڈ کے ہسپتالوں کو ہدایات جاری کی ہیں کہ آئندہ ہفتے سے کورونا ویکسین کو سب سے پہلے طبی رضاکاروں پر استعمال شروع کر دیا جائے۔

برطانوی حکومت نے پہلے ہی مذکورہ کمپنی کو 4 کروڑ ویکسینز کا آرڈر دے رکھا ہے جو 2 کروڑ افراد کو لگائی جائیں گی۔

ہر ایک آدمی کو مذکورہ ویکسین کے دو ڈوز دیئے جائیں گے۔ ابتدائی طور پر میڈیکل اسٹاف اور اولڈ ہومز میں رہنے والے عمر رسیدہ لوگوں کو ویکسین کے ڈوز لگائے جائیں گے۔

برطانیہ کے بعد امید کی جاتی ہے کہ جلد ہی یورپی یونین اور امریکہ میں بھی ویکسین کے استعمال کی اجازت دے دی جائے گی جس کے بعد ممکنہ طور پر اس ویکسین کے استعمال کی اجازت کچھ ایشیائی ممالک بھی دیں گے۔

رضا اکیڈمی کے روح رواں الحاج سعید نوری نے کہا کہ بابری مسجد کی یوم شہادت پر باقاعدگی سے بطور احتجاج یوم سیاہ منایا جاتا ہے۔ یہ ملک کی تاریخ پر بدنما داغ ہے کہ ایک مسجد کو دن دہاڑے کارسیوکوں اور غنڈوں نے شہید کردیا اور فیصلہ بھی خلاف توقع ہی آیا ہے۔

ممبئی: ممبئی شہر و مضافات میں چھ دسمبر کے پیش نظر پولیس نے ریڈ الرٹ جاری کیا ہے دوسری طرف مسلم تنظیموں نے یہاں بابری مسجد کی شہادت کی برسی پر یوم سیاہ اور اذان دینے کا فیصلہ کیا ہے۔ بابری مسجد کی شہادت 6 دسمبر 1992 کو باقاعدہ طور پر یوم شہادت منایا جائے گا۔

بابری مسجد کی ملکیت پر رام مندر کی تعمیر اور سنگ بنیاد کے بعد بھی رضا اکیڈمی نے یہ واضح کیا ہے کہ وہ بابری مسجد کے قضیہ کے بعد بھی وہاں قیامت تک مسجد ہی مانتے ہیں کیونکہ عرش سے لے کر فرش تک یہ جگہ مسجد ہی رہے گی اس کا کوئی بدل نہیں ہے۔ اس لئے مسلمانوں کا عقیدہ اور ایمان ہے کہ جس جگہ پر مسجد قائم ہو وہاں قیامت تک مسجد ہی رہے گی۔ اس لئے برسہا برس سے یوم شہادت پر رضا اکیڈمی مسجد کی باز یافت اور اس کی آزادی کے لئے دعا کرتی ہے یہ سلسلہ آئندہ بھی جاری ہے گا۔

ملک کی تاریخ پر بدنما داغ

رضا اکیڈمی کے روح رواں الحاج سعید نوری نے کہا کہ بابری مسجد کی یوم شہادت پر باقاعدگی سے بطور احتجاج یوم سیاہ منایا جاتا ہے۔ یہ ملک کی تاریخ پر بدنما داغ ہے کہ ایک مسجد کو دن دہاڑے کارسیوکوں اور غنڈوں نے شہید کردیا اور فیصلہ بھی خلاف توقع ہی آیا ہے۔ اس لئے مسلمان یہ مانتا ہے کہ آج بھی یہاں بابری مسجد ہی ہے اور یہ ملکیت تاقیامت بابری مسجد ہی رہے گی اس لئے مسجد کی بازیابی کے لئے چھ دسمبر کو دعا اور اذانیں دی جائے گی۔

ملک بھر میں سہ پہر 3:45 منٹ پر اذان دی جائے گی

انہوں نے کہا کہ کھتری مسجد، مینارہ مسجد، نواب ایاز مسجد سمیت ممبئی ہی نہیں ملک میں سہ پہر 3:45 منٹ کو باقاعدہ طور پر اذان دی جائے گی اور یوم سیاہ بھی منایا جائے گا۔ انہوں نے کہا کہ یہ سلسلہ تب تک جاری رہے گا جب تک بابری مسجد کی بازیافت نہیں ہو جاتی کیونکہ مسلمان کے لئے آج بھی اس جگہ مسجد ہی ہے۔

مسلمان یوم سیاہ کے طور پر چھ دسمبر مناتے ہیں

ایسی صورتحال میں مسلمان یوم سیاہ کے طور پر چھ دسمبر مناتے ہیں اور اذان کا بھی انعقاد کرتے ہیں کیونکہ غنڈوں نے چھ دسمبر کو سہ پہر گنبدوں پر چڑھ کر ایک قدیم اورتاریخی مسجد کو شہید کر دیاتھا۔ یہ کھلی دہشت گردی تھی جسے ملک نے دیکھا تھا۔ بابری مسجد کی جگہ رام مندر کی تعمیر کے فیصلہ کے بعد بھی ملک میں مسلم تنظیموں نے یوم سیاہ اور تین بجکر 45 منٹ پر اذان دینے کا فیصلہ کیا ہے۔

سپریم کورٹ کے فیصلے کے بعد یہ پہلی بابری مسجد کی برسی ہے جسے مسلمانوں نے یوم سیاہ کے طور پر منانے کا فیصلہ کیا ہے۔ بابری مسجد کی برسی اور ڈاکٹر بابا صاحب امبیڈکر کی یوم وفات پر ممبئی شہر میں الرٹ جاری کیا گیا ہے شہر میں حکم امنتاعی کا نفاذ ہے۔

عدلیہ میں خواتین کی نمائندگی کو بہتر بنانے سے جنسی تشدد سے متعلق کیسز میں زیادہ متوازن اور بااختیار انداز اختیار کیا جاسکے گا۔

نئی دہلی: اٹارنی جنرل کے کے وینوگوپال نے خواتین پر بڑھتے تشدد کے واقعات کو روکنے کے لئے عدالتوں میں خاتون ججوں کی تعداد بڑھانے کی وکالت کی ہے۔

مسٹر وینوگوپال نے ملزم کو متاثرہ سے راکھی بندھوانے کی شر ط پر ضمانت دیئے جانے کے مدھیہ پردیش ہائی کورٹ کے فیصلہ کے خلاف دائر درخواست میں اپنے تحریری حلف نامے میں عدالتوں میں خواتین کی تعداد بڑھانے کی وکالت کی ہے۔

انہوں نے کہا کہ عدلیہ میں خواتین کی نمائندگی کو بہتر بنانے سے جنسی تشدد سے متعلق کیسز میں زیادہ متوازن اور بااختیار انداز اختیار کیا جاسکے گا۔

انہوں نے کہا ’’عدالتوں میں خاتون ججوں کی تعداد ان کے حقوق کا خیال رکھاجانا چاہئے ، تاکہ خواتین کے خلاف ہونے والے جرائم اور ان سے متعلق مقدمات پر سختی سے کارروائی کی جاسکے۔”

ساڑھے تین گھنٹے تک جاری رہنے والی میٹنگ کے بعد، وزیر زراعت نریندر سنگھ تومر نے کہا کہ حکومت اور کسان تنظیموں کے مابین اچھا مکالمہ ہوا ہے۔  کسانوں کے نمائندوں نے کہا کہ اگر حکومت امن چاہتی ہے تو اسے کسانوں کی مشکلات کو حل کرنا چاہئے۔ کسان اپنا احتجاج جاری رکھیں گے۔

نئی دہلی: کسان تنظیموں نے منگل کو زرعی مسائل کے حل کے لئے کمیٹی بنانے کی حکومت کی تجویز کو مسترد کردیا اور احتجاج کو جاری رکھنے کے عزم کا اظہار کیا۔

تقریبا ساڑھے تین گھنٹے تک جاری رہنے والی اس میٹنگ کے بعد، وزیر زراعت نریندر سنگھ تومر نے کہا کہ حکومت اور کسان تنظیموں کے مابین اچھا مکالمہ ہوا ہے اور بات چیت جمعرات کو بھی جاری رہے گی۔

انہوں نے کہا کہ حکومت نے کسانوں کی مشکلات کے حل کے لئے کمیٹی بنانے کی تجویز پیش کی تھی، لیکن اس پر اتفاق رائے نہیں ہوسکا۔

اس میٹنگ میں وزیر خوراک و سپلائی وزیر پیوش گوئل اور وزیر مملکت برائے تجارت سوم پرکاش اور 35 کسان قائدین نے شرکت کی۔ اجلاس سہ پہر 3 بجے وگیان بھون میں شروع ہوا۔

کسانوں کے نمائندوں نے کہا کہ اگر حکومت امن چاہتی ہے تو اسے کسانوں کی مشکلات کو حل کرنا چاہئے۔ کسان اپنا احتجاج جاری رکھیں گے۔

دریں اثنا، مہاراشٹر اور کئی دیگر ریاستوں کے کسان نمائندے اس تحریک سے اظہار یکجہتی کے لئے قومی دارالحکومت آئے۔