وزیر اعظم ٹروڈو اور مسٹر وان ڈیر لین نے عالمی وبا کورونا، کینیڈا اور یوروپی یونین میں اس سے لڑنے اور لوگوں کی جان بچانے کے لئے اٹھائے جا رہے اقدامات پر تبادلہ خیال کیا۔

اوٹاوا: کینیڈا کے وزیر اعظم جسٹن ٹروڈو نے کورونا وائرس ( کووڈ-19) کے معاملے پر یورپی کمیشن کی صدر اروسولا وان ڈیر لین سے بات چیت کی۔

یہ اطلاع کنیڈا کے وزیر اعظم کے دفتر نے دی۔ وزیر اعظم کے دفتر نے کہا ’’آج وزیر اعظم جسٹن ٹروڈو نے یوروپی کمیشن کی صدر اروسولا وان ڈیر لین سے بات کی۔ وزیر اعظم ٹروڈو اور مسٹر وان ڈیر لین نے عالمی وبا کورونا، کینیڈا اور یوروپی یونین میں اس سے لڑنے اور لوگوں کی جان بچانے کے لئے اٹھائے جا رہے اقدامات پر تبادلہ خیال کیا‘‘۔

وزیر اعظم کے دفتر نے کہا ’’اس دوران دونوں رہنماؤں نے کینیڈا اور یوروپی یونین کے درمیان تعاون کے قریبی تعلقات کو جاری رکھنے سمیت محفوظ اور مؤثر ویکسین لگانے کی اہمیت پر رضا مندی ظاہر کی‘‘۔ دونوں رہنماؤں نے کمزور ممالک کو تعاون دینے سمیت اس وبا کے خلاف بین الاقوامی لڑائی کی کوششوں کے لئے حمایت دینے پر زور دیا اور 29 مارچ کو اقوام متحدہ میں انٹر نیشنل ڈیبٹ ڈھانچے اور لیکویڈیٹی کے معاملے پر آئندہ اعلی سطحی اجلاس کے لئے تیاری دکھائی۔

ترنمول کانگریس کے ہنگامے کے درمیان راجیہ سبھا نے ‘مالیاتی بل 2021’ کو لوک سبھا کو لوٹا دیا۔ 

نئی دہلی: ترنمول کانگریس کے ہنگامے کے درمیان راجیہ سبھا نے بدھ کے روز ‘مالیاتی بل 2021’ کو صوتی ووٹوں سے لوک سبھا کو لوٹا دیا۔

ایوان میں وزیر خزانہ نرملا سیتارمن نے بل پر بحث کا جواب دیتے ہوئے کہا کہ وزیر اعظم نریندر مودی کی حکومت بدعنوانی سے پاک ہے اور معاشرے کے استحصال کے شکار، محروم اور غریب طبقے کو براہ راست مدد فراہم کی جارہی ہے۔ حکومت کی معاشی اصلاحات سے بینکوں کے غیر منفعت بخش اثاثوں میں کمی آئی ہے۔

انہوں نے کہا کہ مالیاتی بل میں ٹیکس کو منطقی اور آسان بنانے کی کوشش کی گئی ہے اور انکم ٹیکس کی شرحوں میں کوئی تبدیلی نہیں کی گئی ہے۔ آسانی سے کاروبار کرنے کی سہولت سے معیشت کو فروغ دینے پر زور دیا گیا ہے اور اس کی تعمیل کے لئے بہت ساری اہم تبدیلیاں بھی کی گئیں ہیں۔ اس سلسلے میں پروڈکشن ڈیوٹی میں بھی تبدیلی کی گئی ہے۔

وزیر خزانہ نے جی ایس ٹی سے متعلق ممبروں کے سوالوں کا جواب دیتے ہوئے کہا کہ جی ایس ٹی وزارت خزانہ کا معاملہ نہیں ہے۔ جی ایس ٹی میں کوئی بھی فیصلہ جی ایس ٹی کونسل کرتی ہے اور وہ اس سے متعلق تبدیلیاں لا سکتی ہے۔ یہ کونسل ملک کی تمام ریاستوں کے نمائندوں پر مشتمل ہے اور انہیں تبدیلی کا حق ہے۔ ریاستی حکومتوں کو چاہئے کہ وہ پٹرول اور ڈیزل کی قیمتوں کو کم کرنے کے لئے کونسل کے اجلاس میں ایک تجویز پیش کرے۔ جی ایس ٹی میں بار بار تبدیلیاں ہوتی رہی ہیں اور تفصیلی تبادلہ خیال کے بعد اس کا فیصلہ کیا گیا ہے۔

آزادانہ اور منصفانہ الیکشن پر زور دیتے ہوئے الیکشن کمیشن آف انڈیا نے کہا ہے کہ وہ آٹھ مرحلے کے اسمبلی انتخابات سے پہلے اور اس کے دوران کسی بھی طرح کی بدامنی یا تشدد کو برداشت نہیں کرے گی۔ کمیشن نے ریاست میں آزادانہ اور منصفانہ پولنگ کو یقینی بنانے کے لئے مرکزی افواج کی تعیناتی کی ہدایت بھی دی۔

سلی گوڑی: آزادانہ اور منصفانہ رائے دہی پر زور دیتے ہوئے آج بدھ کو چیف الیکشن کمشنر سنیل اروڑا کی سربراہی میں الیکشن کمیشن آف انڈیا (ای سی آئی) کے فل بنچ نے کہا ہے کہ وہ آٹھ مرحلے کے اسمبلی انتخابات سے پہلے اور اس کے دوران کسی بھی طرح کی بدامنی یا تشدد کو برداشت نہیں کرے گی۔

الیکشن کمیشن نے یہ بھی کہا ہے کہ آئینی ذمہ داریوں کو بروئے کار لاتے ہوئے تمام کووڈ ضابطوں پر سختی سے عمل کیا جائے گا۔ ای سی آئی نے پولنگ بوتھ میں معاشرتی دوری کو برقرار رکھنے، ماسک پہننے اور سینیٹائزر کے استعمال کو یقینی بنایاجائے گا۔ کمیشن نے ضلعی انتظامیہ سے پولنگ بوتھ میں تھرمل اسکیننگ کے لئے پی پی ای کٹس اور مشینری بھی خریدنے کا مطالبہ کیا ہے۔ مغربی بنگال میں 27 مارچ سے شروع ہونے والے آٹھ مرحلے کے انتخابات ہوں گے اور آخری مرحلہ کی پولنگ 27 اپریل کو ہوگی۔ نتائج کا اعلان 2 مئی کو کیا جائے گا۔

آزادانہ اور منصفانہ پولنگ کے لئے مرکزی افواج کی تعیناتی کی ہدایت

چیف الیکشن کمشنر سنیل اروڑا کی سربراہی میں کمیشن کے فل بنچ نے ریاست بھر میں امن و امان کی صورتحال کا جائزہ لینے کے لئے ریاستی چیف سکریٹری علاپن بندیو پادھیائے اور ڈی جی پی نیرج نارائن سے سلی گوڑی میں ملاقات کی۔ ای سی آئی نے انتظامیہ کو ہدایت کی کہ وہ پولنگ بوتھ پر ویب کاسٹنگ کے انتظامات کو یقینی بنائیں۔ الیکشن کمیشن نے ریاست میں آزادانہ اور منصفانہ پولنگ کو یقینی بنانے کے لئے مرکزی افواج کی تعیناتی کی ہدایت بھی دی۔

الیکشن کمیشن کا وفد سلی گوڑی کے دو روزہ دورے پر

پولنگ سے قبل کئی اضلاع میں ہتھیاروں کی برآمدگی پر ناراضگی ظاہر کرتے ہوئے کمیشن نے کہا کہ سختی سے نمٹا جائے گا۔ انہوں نے کہا کہ بنگال اور آسام میں روپے بھی برآمد ہو رہے ہیں ہم اس پر سختی سے نمٹیں گے۔ الیکشن کمیشن کا وفد سلی گوڑی کے دو روزہ دورے پر ہے۔ کمیشن کے فل بنچ نے چار خصوصی مبصرین کی موجودگی میں ریاست کے تمام ضلعی مجسٹریٹوں اور پولیس عہدیداروں سے ورچوئل میٹنگیں کیں۔

پچاس فیصد حساس بوتھوں میں ویب کاسٹنگ کی ہدایت

منگل کو مسٹر اروڑا کی سربراہی میں کمیشن نے شمالی بنگال کے آٹھ اضلاع کے 54 اسمبلی حلقوں میں انتخابی تیاریوں کا بھی جائزہ لیا۔ غیر قانونی اسلحہ کے خلاف اضافی نگرانی پر زور دیتے ہوئے 50 فیصد حساس بوتھوں میں ویب کاسٹنگ کی ہدایت بھی دی۔ سی ای سی اروڑا اور الیکشن کمشنرز سوشیل چندر اور راجیو کمار نے بھی بنگال کے چیف انتخابی افسر ایریز آفتاب، خصوصی پولیس مبصر ویویک دوبے اور اے ڈی جی (امن و امان) جگ موہن سمیت دیگر لوگوں کے ساتھ ریاستی اور مرکزی فورسوں کی تعیناتی پر غور کیا۔ الیکشن کمیشن ریاست کے 23 اضلاع میں مرکزی فورسیس کی ایک ہزار سے زیادہ کمپنیاں تعینات کرنے پر غور کر رہا ہے۔

جسٹس رمن نے سائنس اور قانون میں گریجویشن کے بعد 10 فروری 1983 سے قانون کے پیشے سے آغاز کیا۔ اپنے وکالت کے کریئر کے دوران انہوں نے نہ صرف آندھرا پردیش ہائی کورٹ میں بلکہ مرکزی انتظامیہ ٹریبونل (سی اے ٹی) اور سپریم کورٹ میں بھی پریکٹس کی۔

نئی دہلی: سپریم کورٹ کے دوسرے سینئر ترین جج این وی رمن اگلے چیف جسٹس آف انڈیا (سی جے آئی) ہوں گے۔

چیف جسٹس شرد اروند بوبڈے جو 23 اپریل کو رٹائر ہو رہے ہیں نے جسٹس رمن کے نام کی سفارش کی ہے۔

جسٹس رمن نے سائنس اور قانون میں گریجویشن کے بعد 10 فروری 1983 سے قانون کے پیشے سے آغاز کیا۔ اپنے وکالت کے کریئر کے دوران انہوں نے نہ صرف آندھرا پردیش ہائی کورٹ میں بلکہ مرکزی انتظامیہ ٹریبونل (سی اے ٹی) اور سپریم کورٹ میں بھی پریکٹس کی۔

27 جون 2000 کو آندھرا پردیش ہائی کورٹ کا مستقل جج مقرر ہونے کے بعد انہیں 13 مارچ سے 20 مئی 2013 تک اسی ہائی کورٹ کا قائم مقام چیف جسٹس مقرر کیا گیا تھا۔ بعد میں انہیں ترقی دیکر 2 ستمبر 2013 کو دہلی ہائی کورٹ کا چیف جسٹس مقرر کیا گیا۔ 17 فروری 2014 کو ا انہیں اعلی عدالت میں ترقی دی گئی۔

جسٹس رمن 26 اگست 2022 کو رٹائر ہونے والے ہیں۔ عدالت عظمیٰ میں چیف جسٹس سمیت 34 منظور شدہ ججز ہیں اور فی الوقت سپریم کورٹ میں 29 ججز ہیں۔

چیئرمین ایم وینکیا نائیڈو نے صبح دس بجے ایوان بالا کی کارروائی کا آغاز کیا اور محمد جان کے انتقال کے بارے میں آگاہ کیا۔ انہوں نے کہا کہ مسٹر محمد جان ایک وفادار سیاسی اور سماجی کارکن تھے۔

نئی دہلی: ایوان بالا راجیہ سبھا میں بدھ کے روز اپنے مرحوم ممبر اے محمد جان کو خراج عقیدت پیش کیا اور اس کے بعد ایوان کو ایک گھنٹہ کے لئے ملتوی کردیا گیا۔

چیئرمین ایم وینکیا نائیڈو نے صبح دس بجے ایوان کی کارروائی کا آغاز کیا اور محمد جان کے انتقال کے بارے میں آگاہ کیا۔ انہوں نے کہا کہ مسٹر محمد جان ایک وفادار سیاسی اور سماجی کارکن تھے۔ انہوں نے اپنے سیاسی کریئر کا آغاز تمل ناڈو میں انتہائی نچلے درجے سے کیا تھا۔

ایوان نے مسٹر محمد جان کو خاموش خراج تحسین پیش کیا۔ اس کے بعد چیئرمین نے صبح 10.30 بجے سے ساڑھے 11 بجے تک کیلئے ایوان کو ملتوی کرنے کا اعلان کیا۔

منگل کو تمل ناڈو کے سابق وزیر اور اے آئی اے ڈی ایم کے کے رکن راجیہ سبھا محمد جان کا انتقال ہوگیا، وہ 72 سال کے تھے۔ انہوں نے بے چینی کی شکایت کی تھی جس کے بعد انہیں ضلع رانی پیٹ کے والجاپیٹ جنرل اسپتال پہنچایا گیا جہاں ڈاکٹروں نے انہیں مردہ قرار دے دیا۔ وہ اسمبلی انتخابات کے لئے انتخابی مہم چلانے کے بعد اپنے آبائی ضلع رانی پیٹ واپس لوٹے تھے۔

خیال رہے مسٹر محمد جان اس وقت کی وزیر اعلی جے للیتا کی کابینہ میں پسماندہ طبقات کے وزیر تھے۔

برطانوی وزیر اعظم بورس جانسن کا کہنا ہے کہ لگتا ہے پوری زندگی اس وبائی امراض کے نتیجے میں ہونے والی تباہی کا سامنا کرنا پڑے گا۔

لندن: برطانیہ کے وزیر اعظم بورس جانسن نے کہا ہے کہ کورونا وائرس کی وبا کے اثرات سے نکلنے میں کئی سال لگیں گے۔

اپنی رہائش ڈاؤننگ اسٹریٹ میں پریس کانفرنس کرتے ہوئے وزیر اعظم بورس جانسن نے خبردار کیا ہے کہ کورونا وائرس غیرمعینہ مدت تک ساتھ رہے گا۔

برطانوی وزیر اعظم کا کہنا تھا کہ لگتا ہے کہ پوری زندگی اس وبائی امراض کے نتیجے میں ہونے والی تباہی کا سامنا کرنا پڑے گا۔

دوسری جانب حکومت کے چیف میڈیکل ایڈوائزر پروفیسر کرس وائٹی کا کہنا تھا کہ لاک ڈاؤن کی وجہ سے پائے جانے والی احساس محرومی لوگوں کی صحت پر طویل عرصے تک بڑے پیمانے پر اثر انداز ہو سکتی ہے۔

برطانیہ میں گزشتہ 24 گھنٹوں میں کورونا وائرس کی وجہ سے 112 افراد ہلاک ہو گئے جس کے بعد اموات کی مجموعی تعداد سوا لاکھ سے متجاوز کر گئی ہے۔

گزشتہ روز فائرنگ کا یہ واقعہ کولوراڈو کی ایک سپر مارکیٹ میں پیش آیا تھا جس میں 10 افراد ہلاک ہوگئے تھے۔ اس واقعہ کے بارے میں پولیس کا کہنا تھا کہ فائرنگ کنگ سپر مارکیٹ میں ہوئی جس میں اے آر پندرہ رائفل استعمال کی گئی تھی۔

واشنگٹن: امریکہ کی ایک ریاست کولوراڈو کی سپر مارکیٹ میں فائرنگ کرنے والے مشتبہ شخص پر 10 افراد کے قتل کے الزامات عائد کئے گئے ہیں۔

خبر رساں ایجنسی کے مطابق 21 برس کے حملہ آور کی شناخت احمد علیسا کے نام سے کی گئی۔ ملزم کو بولڈر کاؤنٹی کی جیل منتقل کردیا گیا۔ فائرنگ کا مقصد تاحال ظاہر نہیں کیا گیا ہے۔

واضح رہے کہ گزشتہ روز فائرنگ کا یہ واقعہ ایک سپر مارکیٹ میں پیش آیا تھا جس میں 10 افراد ہلاک ہوگئے تھے۔ اس واقعہ کے بارے میں پولیس کا کہنا تھا کہ فائرنگ کنگ سپر مارکیٹ میں ہوئی جس میں اے آر پندرہ رائفل استعمال کی گئی تھی۔ اس فائرنگ میں متعدد افراد زخمی بھی ہوئے تھے۔

انتخابی ریلی میں کورونا کے اصول و ضوابط کی پاسداری نہیں کئے جانے پر کلکتہ شہریوں کے ایک گروپ نے کلکتہ ہائی کورٹ میں عرضی دائر کیا ہے۔ درخواست میں کہا گیا ہے کہ آخر انتخابات ملتوی کیوں نہیں کئے جا رہے ہیں۔

کلکتہ: انتخابی جلسے اور جلوس میں کورونا کے اصول و ضوابط کی پاسداری نہیں کئے جانے پر کلکتہ شہریوں کے ایک گروپ نے کلکتہ ہائی کورٹ میں عرضی دائر کرتے ہوئے کہا ہے کہ ریاست میں کورونا کی دوسری مہم آنے کا خدشہ بڑھ گیا ہے۔ اس کے باوجود سیاسی جماعتوں کے جلسے و جلوس میں کورونا وائرس کے اصول و ضوابط پر عمل نہیں کیا جارہا ہے۔

الیکشن کمیشن نے مداخلت نہیں کی

مفاد عامہ کی عرضی میں کہا گیا ہے کہ ڈاکٹروں کے متنبہ کرنے کے بعد الیکشن کمیشن کی توجہ اس جانب مبذول کرائی گئی تھی کہ سیاسی جماعتوں کے جلسے و جلوس میں کورونا وائرس کے اصول و ضوابط پر عمل نہیں کیا جارہا ہے۔ اس کے باوجود الیکشن کمیشن نے مداخلت نہیں کی ہے۔ اگر سیاسی جماعتوں کے جلسے و جلوس پر روک نہیں لگائی گئی تو سیاسی جماعتوں کے جلسے و جلوس کی وجہ سے کورونا وائرس کا خطر ہ کئی گنا بڑھ جائے گا۔

درخواست میں کہا گیا ہے کہ آخر انتخابات ملتوی کیوں نہیں کئے جا رہے ہیں۔ کلکتہ ہائی کورٹ کے چیف جسٹس اس معاملے کی سماعت اگلے ہفتے کریں گے۔

الیکشن کمیشن سے کئی سوالات

عرضی گزار سومناتھ رائے کے وکیل، شیامک باگچی نے بتایا کہ کلکتہ ہائی کورٹ میں عوامی مفادات میں قانونی چارہ جوئی کی گئی ہے کہ موجودہ صورت حال میں انتخابات کیوں ہو رہے ہیں۔ مدعی یہ بھی جاننا چاہتے تھے کہ انفیکشن کی روک تھام کے لئے کیا اقدامات کیے گئے ہیں۔ کورونا صورتحال میں، حکومت نے پولنگ ورکرز اور سرکاری ملازمین کے لئے ویکسین فراہم کی ہیں۔ لیکن اس صورتحال میں، حکومت نے میٹنگ میں جانے والے لوگوں کی بڑی تعداد کے لئے کیا کیا ہے؟ کیس میں یہ بھی پوچھا گیا کہ کیا الیکشن کمیشن نے انسانی حقوق کے نفاذ کے لئے کووڈ قواعد کی تعمیل کی ہے؟

ریاست میں کورونا کی صورتحال تشویشناک موڑ لینا شروع

اسمبلی میں رائے دہندگی کے پیش نظر، ریاست میں کورونا کی صورتحال تشویشناک موڑ لینا شروع کر رہی ہے۔ ریاست میں ایک بار پھر انفیکشن پھیل رہا ہے۔ خاص طور پر کلکتہ شہر می بہت سنگین ہے۔  پچھلے 24 گھنٹوں کے دوران، ریاست میں 60 افراد نئے متاثر ہوئے ہیں۔ دو افراد ہلاک ہوگئے ہیں۔ ریاست میں اب تک 5 لاکھ 80 ہزار 999 افراد متاثر ہوئے ہیں۔ ان میں 5 لاکھ 8 ہزار 116 افراد صحت یاب ہونے کے بعد گھر لوٹ آئے ہیں۔ بنگال میں صحت یاب ہونے کی شرح 97.61 فیصد ہے۔

کانگریس اور دیگر اپوزیشن جماعتوں نے دہلی میں حکومت اور لیفٹیننٹ گورنر کے حقوق سے متعلق قومی راجدھانی ترمیمی بل پر آج راجیہ سبھا میں زور دار ہنگامہ کیا جس کے سبب ایوان کی کارروائی چار مرتبہ ملتوی کی گئی اور بعد میں چھ بجکر دس منٹ پر پورے دن کے لئے ملتوی کردی گئی۔

نئی دہلی: قومی راجدھانی ترمیمی بل پر آج کانگریس اور دیگر اپوزیشن جماعتوں نے راجیہ سبھا میں زوردار ہنگامہ کیا جس کی وجہ سے چار بار ملتوی کئے جانے کے بعد ایوان کی کارروائی پورے دن کیلئے ملتوی کردی گئی۔

کانگریس اور دیگر اپوزیشن جماعتوں نے دہلی میں حکومت اور لیفٹیننٹ گورنر کے حقوق سے متعلق قومی راجدھانی ترمیمی بل پر آج راجیہ سبھا میں زور دار ہنگامہ کیا جس کے سبب ایوان کی کارروائی چار مرتبہ ملتوی کی گئی اور بعد میں چھ بجکر دس منٹ پر پورے دن کے لئے ملتوی کردی گئی۔

وزیر مملکت برائے داخلہ جی کشن ریڈی نے جیسے ہی یہ بل ایوان میں پیش کیا کانگریس اور دیگر اپوزیشن جماعتوں نے اس کی سخت مخالفت کی۔ ایوان میں اپوزیشن کے لیڈر ملک ارجن کھڑگے نے کہا کہ اس میں دہلی حکومت کے اختیارات پر سخت حملہ کیا گیا ہے۔

دہلی میں حکمراں عام آدمی پارٹی کے اراکین نے بھی بل کی سخت مخالفت کرتے ہوئے شوروغل کیا۔  ڈپٹی چیئرمین ہری ونش نے اراکین سے پرسکون رہنے کی اپیل کی لیکن اس کا اثر نہیں ہونے پر انہوں نے کارروائی پندرہ منٹ کے لئے پانچ بجکر 24 منٹ تک ملتوی کردی۔ اس کے بعد کارروائی پندرہ۔پندرہ منٹ کے لئے تین بار ملتوی کی گئی اور پھر پورے دن کے لئے ملتوی کردی گئی۔

امریکہ میں ایک اور فائرنگ کے نتیجے میں ایک پولیس افسر سمیت کم از کم 10 افراد ہلاک ہوگئے ہیں۔ وائٹ ہاؤس نے بتایا کہ صدر جو بائیڈن کو اس کی اطلاع دے دی گئی ہے۔

واشنگٹن: امریکہ میں فائرنگ کا ایک اور واقعہ سامنے آیا ہے، جس میں ایک پولیس افسر سمیت 10 افراد کی موت ہو گئی ہے۔

یہ واقعہ پیر کے روز کولاراڈو ریاست میں گراسری (کیرانہ کے سامان) کے ایک بازار میں ہوا، جہاں ایک بندوق بردار اچانک سے فائرنگ کرنے لگا جس سے 10 افراد کی موت ہو گئی۔

عینی شاہدین نے گولی باری کے اس واقعہ کا ویڈیو بنا کر یوٹیوب پر اپلوڈ کر دیا۔ پیر کے روز مشتبہ شخص اچانک گراسری اسٹور میں داخل ہوا اور تقریباً 14:30 بجے فائرنگ کرنے لگا۔ پولیس نے بتایا کہ مشتبہ شخص کو حراست میں لے لیا ہے۔

اس درمیان وائٹ ہاؤس نے بتایا کہ صدر جو بائیڈن کو اس کی اطلاع دے دی گئی ہے۔