ایگزٹ پول کے نتائج مہا گٹھ بندھن کے لوگوں کیلئے دو دن کی خوشی لیکر آئی ہے لیکن کل اکثریت سے این ڈی اے کی حکومت بہار میں پھر سے بنے گی شاہنواز حسین نے کہا۔

پٹنہ: بھارتیہ جنتا پارٹی (بی جے پی) نے آج دعویٰ کیا کہ انتخاب کے بعد سروے ( ایگزٹ پول) میں مہا گٹھ بندھن کو آگے بتایا جارہا ہے لیکن کل ووٹوں کی گنتی کے بعد جب انتخابی نتائج آئیں گے تو وہ قومی جمہوری اتحاد (این ڈی اے) کے حق میں ہوں گے۔

بی جے پی کے قومی ترجمان سید شاہنواز حسین نے آج کہا کہ بہا رمیں ختم ہوئے تینوں مراحل کے انتخاب میں وزیراعظم نریندر مودی اور وزیراعلیٰ نتیش کمار کے تئیں لوگوں میں کافی جوش وخرش دیکھنے کو ملا۔ کثیر تعداد میں رائے دہندوں نے این ڈی اے کے حق میں ووٹ کیا ہے۔ حالانکہ آخری مرحلہ کی ووٹنگ کے بعد 07 نومبر کی شام جو ایگزٹ پول دکھائے گئے تھے اس میں سبقت بھلے ہی مہا گٹھ بندھن کو ہو لیکن دس نومبر کو ایگزیکٹ پول (حقیقی رائے شمای) کے نتائج این ڈی اے کے حق میں ہوں گے۔

انہوں نے کہا کہ کل ہی دو پہر 12 بجے تک یہ طے ہو جائے گا کہ بہار میں اکثریت سے این ڈی اے کی حکومت بننے جارہی ہے اور مسٹر نتیش کمار پھر سے بہار کے وزیراعلیٰ عہدہ کی کمان سنبھالیں گے۔

2015 میں ایگزٹ پول غلط ثابت ہوا تھا

مسٹر حسین نے کہا کہ سبھی کو یاد ہوگا کہ سال 2015 میں ایگزٹ پول میں این ڈی اے کی حکومت بننے کے اشارے کئے گئے تھے لیکن اس وقت یہ غلط ثابت ہوا تھا۔ اس وقت این ڈی اے میں جنتادل یونائیٹڈ (جے ڈی یو) شامل نہیں تھی۔ انہوں نے کہا کہ اسی طرح اب تک کئی ایگزٹ پول غلط ثابت ہوچکے ہیں۔ اس کے پیچھے کی وجہ ایگزٹ پول کا سیمپل سائز ہوتا ہے جو کہ ریاست کی آبادی کے حساب سے کافی چھوٹا ہوتا ہے اس لئے حقیقی صورتحال کا ادراک نہیں ہو پاتا ہے۔

بی جے پی کے قومی ترجمان نے کہا کہ ان کی پارٹی بوتھ سطح کے کارکنان سے ملے فیڈ بیک کی بنیاد پر اندازہ کرتی ہے۔ اس لحاظ سے بی جے پی کا سیمپل سائز ایگزٹ پول کے سیمپل سائز سے کئی گنا بڑا ہوتا ہے۔

اسی اندازہ کی بنیاد پر وہ یہ کہہ سکتے ہیں کہ ایگزٹ پول کے نتائج مہا گٹھ بندھن کے لوگوں کیلئے دو دن کی خوشی لیکر آئی ہے۔ کل جب ایگزیکٹ پول کی گنتی شروع ہوگی تو اکثریت سے این ڈی اے کی حکومت بہار میں پھر سے بنے گی اور بہار کے مفاد میں پھر سے آئندہ پانچ سال کیلئے مسٹر نتیش کمار سوشاسن اور ترقی کا راج قائم کریں گے۔

مسٹر ومل نے کہا: ‘علامہ اقبال ترکمانستان کے ہوتے تب بھی وہی ہوتے، اس سے کوئی فرق نہیں پڑتا کہ وہ کشمیر کے تھے یا نہیں، شاعر کبھی کسی مخصوص خطے کا نہیں ہوتا ہے بلکہ اس کا تعلق عالم انسانیت سے ہوتا ہے’۔

سری نگر: معروف براڈکاسٹر اور مصنف ستیش ومل کا کہنا ہے کہ شاعر مشرق علامہ اقبال کشمیر کی بجائے دنیا کے کسی بھی خطے کے ہوتے تب بھی اقبال ہی ہوتے۔ انہوں نے کہا کہ علامہ نے اپنے دور کی روایت سے ہٹ کر شاعری کر کے ایک نیا مزاج پیدا کیا جو آج بھی جاری ہے۔

موصوف نے ان باتوں کا اظہار یو این آئی اردو کے ساتھ علامہ اقبال کی یوم پیدائش کے حوالے سے ایک مختصر ٹیلی فونک بات چیت کے دوران کیا۔

انہوں نے کہا: ‘علامہ اقبال ترکمانستان کے ہوتے تب بھی وہی ہوتے، اس سے کوئی فرق نہیں پڑتا کہ وہ کشمیر کے تھے یا نہیں، شاعر کبھی کسی مخصوص خطے کا نہیں ہوتا ہے بلکہ اس کا تعلق عالم انسانیت سے ہوتا ہے’۔

مورخین کے مطابق علامہ اقبال کے آبا و اجداد جنوبی کشمیر کے ضلع کولگام میں رہتے تھے جنہوں نے یہاں کے ابتر حالات سے مجبور ہو کر اٹھارویں صدی کے نصف آخر میں کشمیر سے ہجرت کی اور سیالکوٹ میں آباد ہو گئے۔

علامہ اقبال نے اپنے دور کی روایتی شاعری سے ہٹ کر لکھا

مسٹر ومل نے کہا کہ علامہ اقبال نے اپنے دور کی روایتی شاعری سے ہٹ کر لکھا۔ ان کا کہنا تھا: ‘ہر ایک فنکار کی ایک منفرد پہچان ہوتی ہے۔ علامہ نے اپنے دور کی روایتی شاعری سے ہٹ کر لکھا اور اپنے لئے ایک الگ مزاج پیدا کیا جو آج بھی جاری ہے اور جس کو کئی لوگوں نے نقل کر کے آگے بڑھانے کی کوشش کی’۔

ستیش ومل نے کہا علامہ چھوٹے چھوٹے خیالات کو بڑے انداز میں پیش کرنے میں مہارت رکھتے تھے۔ انہوں نے کہا کہ شاعر کا کلام آفاقی ہوتا ہے اور ان کو مخصوص فریم میں بند کرنا ان کا درجہ گھٹانے کے مترادف ہے۔

موصوف نے کہا کہ علامہ کے کلام و حیات کے ہزار پہلو ہیں اور ہر کوئی ان کو اپنے حساب سے دیکھ سکتا ہے۔ انہوں نے کہا کہ کشمیر کے معروف شعرا حضرات شیخ العالم، احد زرگر، رسول میر وغیرہ کا کلام بھی آفاقی نوعیت کا ہے لہٰذا وہ بھی آفاقی شعرا ہیں۔

مسٹر ومل کا کہنا ہے کہ شاعر یا مفکر کے ساتھ اختلاف کی گنجائش ہوسکتی ہے۔ انہوں نے کہا کہ آج ادب، فن اور علم کی بھی بازار کی مصنوعات کی طرح توضیح کی جاتی ہے جو ایک غلط روش ہے۔

حج 2021 کے لیے”حفاظت کے ساتھ عبادت” کے عزم کا اعلان کیا گیا ہے۔  روانگی صرف 10 مراکز سے ہوگی اور اس بار عازمین حج کی تعداد میں کمی واقع ہونے امکان ہے۔ انکم ٹیکس ریٹرن پرتبادلہ خیال جاری

ممبئی: مرکزی وزیر برائے اقلیتی امور اور حج مختار عباس نقوی نے حال ہی میں حج 2021 کا اعلان "حفاظت کے ساتھ عبادت” کے نعرے کے ساتھ کیا ہے۔ انہوں نے اس بار سعودی عرب حکومت کی جاری کردہ ہدایات پر عمل کے ساتھ حج کا فریضہ ادا کرنے کی بات کی ہے، جس کا مقصد اپنی اور پوری دنیا کی صحت وسلامتی کا بھی خیال رکھنا ہے

روانگی اور واپسی کے مراکز میں احتیاطی طور پر کمی کردی گئی ہے۔ اب صرف دس ہوائی اڈوں کا استعمال کیا جائے گا۔ ماضی میں روانگی کے لیے 21 مقامات شامل تھے۔ انکم ٹیکس ریٹرن فائنل کرنے کے معاملہ میں وزارت مالیات اور دیگر وزارت اور شعبوں سے گفت وشنید جاری ہے۔ اور مثبت حل نکلنے کاامکان بتایا جارہا ہے۔

ممبئی میں حج کمیٹی آف انڈیا کے صدر دفتر میں حج 2021 کے درخواست فارم اور کمیٹی کی ہدایات کے اجراء کی تقریب سے خطاب کرتے ہوئے گزشتہ سنیچر کے روز مختار عباس نقوی نے کہا تھا کہ اس بار عازمین حج کی تعداد میں کمی واقع ہونے امکان ہے۔

ہرایک عازم حج کو سعودی عرب آمد کے بعد کئی گھنٹے کورائنٹائن میں رکھا جائے گا۔ رہائش گاہ میں مکینوں کی تعداد بھی کم کی گئی ہے۔ بلامحرم جانے والی خواتین کے لیے بھی شرائط شامل ہوں گی۔ عازمین کی عمر کے بارے میں بھی سعودی حکومت کی ہدایات پر عمل ہوگا۔

آن لائن درخواستیں دینے کا عمل شروع

مرکزی وزیر برائے اقلیتی امور مختار عباس نقوی کے ذتعہ کوروناکے چیلنجوں کے پیش نظر بڑی تبدیلیوں اورحج 2021ء کے اعلان کے ساتھ ہی آن لائن درخواستیں دینے کا عمل شروع ہوگیا ہے جوکہ 10 دسمبر تک جاری رہے گا۔ اس موقع پر جناب نقوی نے کہا کہ وبائی امراض کے حالات کے پیش نظر قومی و بین الاقوامی پروٹوکول کے رہنما خطوط پر مستعدی سے عمل کیا جائے گا۔

حج 2021 کے لئے درخواستیں جمع کروانے کی آخری تاریخ 10 دسمبر ہوگی۔ حج کے لئے درخواستیں آن لائن، موبائل ایپ اور آن لائن کے ذریعہ دی جاسکتی ہیں۔ انہوں نے کہا کہ حج 2021 کی ادائیگی کا عمل جون جولائی کے مہینے میں شروع ہوگا۔

حج کا پورعمل اہلیت و عمر کے معیار، محنت کے حالات اور دیگر ضروری ہدایات کے تحت حکومت سعودی عرب اور حکومت ہند کی طرف سے کورونا وبا کے بعد کیے گئے فیصلوں کے مطابق ہوگا۔

صحت عامه، حفاظت اور حکومت سعودی عرب، وزارت اقلیتتی امور، وزارت صحت، وزارت خارجہ، وزارت شہری ہوابازی، حج کمیٹی آف انڈیا، سعودی عرب میں ہندوستانی سفارت خانہ، قونصل جنرل ہند، جدہ وغیرہ نے بڑے غور خوض کے بعد حج 2021 کے ہوتے عمل کو حتمی شکل دی ہے۔

عازمین حج پر سے ریٹرن فائل کرنے کی پابندی ختم کرنے کا مطالبہ

عازمین حج پر سے ریٹرن فائل کرنے سے متعلق عازمین کے درمیان کافی بے چینی محسوس کی جارہی ہے۔ ملک کے کئی سرکردہ دینی و سماجی تنظیموں نے اس پابندی پر نظرثانی کرنے کا مطالبہ کیا ہے۔

راجستھان میں اجمیر کے سلطان الہند ویلفیئر ادارہ کے صدر اور خواجہ غریب نوا ز کی درگاہ کے گدی نشین ایس ایف حسن چشتی نے وزیراعظم نریندر مودی کو خط لکھ کر عازمین حج پرسے ریٹرن فائل کرنے کی پابندی ختم کرنے کا مطالبہ کیا ہے۔

چشتی نے وزیر اعظم نریندر مودی کو مطلع کیا ہے کہ مرکزی حکومت کی طرف سے حج پر جانے والوں کے لئے ریٹرن فائل کرنے کی پابندی کئی عازمین حج کو حج سے محروم کردے گی۔ اس لئے مرکزی حکومت کی طرف سے ریٹرن فائل کیے بغیر حج پر جانے کی پہلے کی طرح اجازت دی جائے۔

انہوں نے اس مطالبہ کی وجہ بھی بتائی کہ حج پر جانے والے بیشتر عازمین حج غیرتعلیم یافتہ اور غریب ہوتے ہیں اور اپنی سخت محنت کی کمائی سے حج پر جاتے ہیں۔ ایسی صورت میں وہ ریٹرن فائل کروا سکیں گے۔ انہوں نے جناب مودی سے عازمین حج کے لئے ریٹرن فائل کرنے کی پابندی مکمل طورپر ختم کرنے کی ہدایت جاری کرنے کی درخواست کی۔

دیگر لوازمات حج

اقلیتی امور اور حج کے وزیر مختار عباس نقوی نے مطلع کیا ہے کہ بغیر محرم جانے والی خواتین کو سعودی عرب حکومت کے ذریعہ مقررہ شرط کے بعد ہی جانے دیا جائے گا۔ البتہ سن رجسٹریشن فیس تین سو روپئے نہیں لی جائے گی۔ اس کے ساتھ ہی گزشتہ سال کی درخواستوں کو قبول نہیں کیا جائے گا، بلکہ نئی درخواستیں قبول کرنے کا فیصلہ کیاگیا ہے۔ حج پر جانے والے ہر ایک عازم کو کورونا ٹیکہ لگانا ہوگا اور 72 گھنٹے پہلے کورونا ٹیسٹ بھی لازمی ہوگا۔

انہوں نے اطلاع دی کہ اب 21 کے بجائے روانگی صرف 10 مقامات سے ہوگی۔ ممبئی، دہلی، احمدآباد، بنگلورو، کوچی، گوہاٹی، لکھنو، حیدرآباد، کولکاتا، سری نگر شامل ہیں۔ ممبئی سے ایم پی، گوا، دمن دیو، دہلی سے ہریانہ، پنجاب، ہماچل، اتراکھنڈ اور مغربی یوپی، راجستھان کے عازمین سفر کریں گے جبکہ احمد آباد سے گجرات، کوچی سے کیرالا، تمل ناڈو، پڈوچری، بنگلورو سے کرناٹک، حیدراباد سے آندھراپردیش اور تلنگانہ کے عازمین سفر کریں گے۔

[ہمس لائیو]

 بی جے پی کے ریاستی صدر دلیپ گھوش نے ایک بار پھر ترنمول کانگریس کے ورکروں کو مبینہ طور پر اسپتال یا قبرستان پہنچانے کی بات کہہ کر ایک بڑا تنازع کھڑا کر دیا ہے۔

کلکتہ: متنازع بیانات کی وجہ سے ہمیشہ سرخیوں میں رہنے والے بی جے پی کے ریاستی صدر دلیپ گھوش نے ایک بار پھر ترنمول کانگریس کے ورکروں کو مبینہ طور پر قبرستان پہنچانے کی بات کہہ کر ایک بڑا تنازع کھڑا کردیا ہے۔

مسٹر گھوش نے اس دعوے کیساتھ کہ ان کی پارٹی اگر اقتدار میں آتی ہے تو ریاست میں ’’جمہوریت بحال‘‘ کرے گی مبینہ طور پر کہا کہ ترنمول کانگریس کے کارکنان نے اپنا رویہ درست نہیں کیا تو انہیں اسپتال یا قبرستان پہنچانے کا انتظام کیا جائے گا۔

دلیپ گھوش مشرقی مدنی پور ضلع کے ہلدیہ میں ایک ریلی سے خطاب کر تے ہوئے کہا میں یہ یقین دلانا چاہتا ہوں کہ مرکزی حکومت آپ سب کے ساتھ ہے۔ مرکز ریاست میں آزادانہ اور منصفانہ اسمبلی انتخابات کو یقینی بنائے گی۔ عوام بلا خوف و خطر اپنے جمہوری حق کا استعمال کر یں گے۔

ترنمول کانگریس کے ورکروں کو مبینہ طور پر دھمکی

انہوں نے کہا کہ ترنمول کانگریس کی حکومت کے دن گنتی کے چند رہ گئے ہیں۔ اسمبلی انتخابات ریاستی پولیس کی موجودگی میں نہیں بلکہ مرکزی فورسوں کی موجودگی میں ہوں گی۔ انہوں نے ترنمول کانگریس کے لیڈروں کو اپنے طریقے بہتر کرنے اور عام لوگوں پر ظلم و تشدد کرنے سے گریز کرنے کی نصیحت کرتے ہوئے مبینہ طور پر کہا کہ اگلے چھ مہینوں میں خود کو بہتر بنالیں ورنہ ان کے ہاتھ، پیر اور پسلیاں ٹوٹ جائیں گی اور انہیں اسپتال جانا پڑے گا۔ انہوں نے مزید کہا کہ اگر وہ پھر بھی اپنی شرارتوں کو جاری رکھتے ہیں تو انہیں قبرستان جانا پڑے گا۔

مسٹر گھوش کے بیان پر رد عمل دیتے ہوئے ترنمول کانگریس نے کہا ہے کہ گھوش ریاست کی سیاسی فضا کو خراب کر رہے ہیں۔ اس قسم کے بیانات سے یہ ظاہر ہوتا ہے کہ اسمبلی انتخابات سے قبل بی جے پی دہشت گردی کے ذریعہ ریاست کے سیاسی ماحول کو خراب کرنے کی کوشش کر رہی ہے۔ ریاست کے عوام انہیں مناسب جواب دیں گے۔

حادثہ علی الصبح ناگود تھانہ علاقے میں ایک موڑ پر پیش آیا۔ ہلاک ہونے والوں میں تین خواتین، تین مرد اور ایک بچہ شامل ہے۔ متاثرہ خاندان کا تعلق ریوا ڈویژن ایریا سے بتایا گیا ہے۔

ستنا: مدھیہ پردیش کے ضلع ستنا کے ناگود تھانہ علاقے میں ڈمپر سے جیپ کی ٹکر کے سبب جیپ میں سوار 7 افراد ہلاک اور 5 زخمی ہوگئے۔

پولیس ذرائع کے مطابق یہ حادثہ علی الصبح ناگود تھانہ علاقے میں ایک موڑ پر پیش آیا۔ ہلاک ہونے والوں میں تین خواتین، تین مرد اور ایک بچہ شامل ہے۔ زخمیوں کو یہاں کے ضلعی اسپتال لایا گیا۔ کچھ کو تشویشناک حالت کے سبب ریوا میڈیکل کالج اسپتال بھیج دیا گیا ہے۔

ذرائع کا کہنا ہے کہ جیپ میں سوار افراد پنا ضلع میں ایک تقریب میں شرکت کے بعد واپس جارہے تھے۔ متاثرہ خاندان کا تعلق ریوا ڈویژن ایریا سے بتایا گیا ہے۔

مٹی کے تودے گرنے سے 49 مکانات مکمل طور پر تباہ ہوگئے ہیں جبکہ 140 عمارتوں کو کافی نقصان پہنچا ہے۔ 20 سے زائد پل تباہ ہوگئے ہیں۔

کرکاس: ہونڈوراس میں طوفان ایٹا کے سبب آنے والے سیلاب سے کم از کم 26 افراد کی موت ہوگئی ہے۔ یہ اطلاع مقامی اخبار لا ٹریبونا نے اپنی رپورٹ میں دی ہے۔

اتوار کے روز اخبار نے اپنی رپورٹ میں بتایا کہ 65900 سے زیادہ افراد مواصلاتی سہولت سے دور ہیں جبکہ 27000 سے زیادہ افراد کو سیلاب سے متاثرہ علاقوں سے محفوظ مقامات پر منتقل کیا گیا ہے۔

اخبار نے اپنی رپورٹ میں بتایا ہے کہ موسلا دھار بارش اور سیلاب سے کم از کم 26 افراد کی موت ہوگئی ہے اور چھ افراد لاپتہ ہیں۔ مٹی کے تودے گرنے سے 49 مکانات مکمل طور پر تباہ ہوگئے ہیں جبکہ 140 عمارتوں کو کافی نقصان پہنچا ہے۔ 20 سے زائد پل تباہ ہوگئے ہیں۔

قابل ذکر بات یہ ہے کہ گذشتہ ہفتے کے آغاز میں ایٹا طوفان نے ہونڈوراس میں زبردست تباہی مچائی تھی۔ اس کی وجہ سے یہاں قریب 10.70 لاکھ افراد کے متاثر ہونے کا امکان ہے۔

عدالتی تحویل میں دیے جانے کے بعد ارنب کو تلوجہ جیل کے قیدیوں کے لئے بنائے گئے عارضی قرنطنیہ مرکز میں رکھا گیا تھا۔ موبائل فون استعمال کرنے پر انہیں تلوجہ جیل منتقل کر دیا گیا۔

دونوں افواج منفی حالات میں اس علاقے میں ڈٹے رہنے کو تیار ہیں اور وہ اس کے لیے تمام تیاریاں کررہی ہیں۔ دونوں نے متنازعہ علاقوں میں بہت بڑی تعداد میں فوجیوں اور ہتھیاروں کو جمع کر رکھا ہے۔

نئی دہلی: مشرقی لداخ میں ایل اے سی پر گزشتہ چھ ماہ سے بھی زیادہ وقت سے چلے آرہے تعطل کوختم کرنے کے لئے ہند اورچین کے فوجی کمانڈروں کے درمیان آٹھویں دور کی بات چیت میں بھی فوجیوں کو پیچھے ہٹانے پر اتفاق نہیں ہوسکا۔

فوجی کمانڈروں کے درمیان آٹھویں دور کی بات چیت ہندوستانی سرحدی علاقے چشول میں گزشتہ جمعہ کو ہوئی تھی۔ لیکن تقریباً دس گھنٹوں تک چلے اس مذاکرات کا کوئی ٹھوس نتیجہ سامنے نہیں آیا اور یہ طے پایا کہ فریقین کے درمیان جلد ہی دوبارہ بات چیت ہوگی۔

فوجی کمانڈروں کی بات چیت ختم ہونے کے تقریباً 48 گھنٹے بعد وزارت دفاع نے اس بارے میں مختصر بیان جاری کرتے ہوئے کہا کہ فریقین کے درمیان لائن آف ایکچول کنٹرول پر تناؤ اور تعطل ختم کرنے کے لیے واضح نظریہ اور تفصیل سے بات چیت ہوئی۔ دونوں کے درمیان فوجیوں کی واپسی کے سلسلے میں مثبت خیالات کا تبادلہ ہوا۔

اس بات پر بھی اتفاق ہوا کہ دونوں فریق دونوں ممالک کے رہنماؤں کے مابین ہوئے اہم معاہدے کو سنجیدگی کے ساتھ عمل میں لائیں گے۔ وہ یہ بھی یقینی بنائیں گے کہ محاذوں پر تعینات فوجی تحمل برتیں گے نیز غلط فہمی اور ناسمجھی سے اجتناب کریں گے۔

فریقین کے درمیان چند امور پر اتفاق

دونوں فریقوں نے اس بات پر بھی اتفاق کا اظہار کیا کہ وہ فوجی اور سفارتی ذرائع سے بات چیت اور رابطے کو برقرار رکھیں گے اور اب تک ہوئی بات چیت کی بنیاد پر زیر التوا امور کو حل کریں گے، جس سے سرحدی علاقوں میں امن اور دوستی کی فضا قائم رہ سکے۔ دونوں فریقوں کے مابین اگلے دور کے مذاکرات جلد ہی ہوں گے۔

ذرائع کے مطابق مذاکرات کے دوران ہندوستان نے یہ واضح کردیا کہ وہ فوجیوں کو پیچھے ہٹانے کی چین کی یکطرفہ تجویز سے متفق نہیں ہے۔

بات چیت میں کوئی ٹھوس اتفاق رائے قائم نہ ہونے سے یہ واضح ہوگیا کہ دونوں افواج منفی حالات میں اس علاقے میں ڈٹے رہنے کو تیار ہیں اور وہ اس کے لیے تمام تیاریاں کررہی ہیں۔ اس سے یہ تقریباً ثابت ہوگیا کہ موسم سرما کے باوجود یہ تعطل طویل ہوگا کیونکہ دونوں ہی فریق اپنے اپنے موقف پر قائم ہیں۔ دونوں نے متنازعہ علاقوں میں بہت بڑی تعداد میں فوجیوں اور ہتھیاروں کو جمع کر رکھا ہے۔

اب سبھی کی نگاہیں وزیراعظم نریندر مودی اور چین کے صدر شی جن پنگ پر مرکوز ہیں۔ دونوں لیڈران رواں ماہ مختلف بین الاقوامی پلیٹ فارموں پر ورچوول میٹنگوں میں شامل ہونے جارہے ہیں اور اس دوران ان کے درمیان کسی طرح کی بات چیت کا امکان پیدا ہوتا ہے تو اس معاملے پر بھی گفتگو ہوسکتی ہے۔

ہندوستان نے اعلیٰ سطح پر چین کو واضح کردیا ہے کہ وہ ملک کی خودمختاری کے ساتھ کوئی سمجھوتہ نہیں کرے گا چاہے اس کے لئے اسے کوئی بھی قربانی دینی پڑے۔

جو بائیڈن کو امریکہ کے 46 ویں صدر منتخب ہونے اور محترمہ ہیرس کو امریکہ کی پہلی خاتون نائب صدر منتخب ہونے پر محترمہ سونیا گاندھی اور مسٹر راہل گاند نے نیک خواہشات کا اظہار کیا۔

نئی دہلی: کانگریس کی صدر سونیا گاندھی اور سابق صدر راہل گاندھی نے مسٹر جو بائیڈن کو امریکہ کے 46 ویں صدر منتخب ہونے پر مبارکباد پیش کی ہے۔

محترمہ گاندھی نے مسٹر بائیڈن کے ساتھ کملا ہیریس کے نائب صدر منتخب ہونے پر بھی خوشی کا اظہار کیا اور انہیں دلی مبارکباد پیش کی۔ راہل گاندھی نے بھی ٹویٹ کرکے مبارکبادی دی۔

Congratulations, Vice-President-elect @KamalaHarris! It makes us proud that the first woman to serve as Vice President of the USA traces her roots to India.

— Rahul Gandhi (@RahulGandhi) November 7, 2020

انہوں نے کہا کہ انہیں امید ہے کہ مسٹر بائیڈن اور محترمہ ہیرس کی سربراہی میں امریکہ اور ہندوستان کے مابین تعلقات گہرے ہوں گے اور ہمارے خطے کے ساتھ ساتھ دنیا میں بھی امن اور ترقی کو ایک نئی سمت ملے گی۔

مسٹر راہل گاندھی نے کہا کہ انہیں یقین ہے کہ مسٹر بائیڈن کی قیادت میں امریکہ مضبوط ہوگا۔ انہوں نے محترمہ ہیرس کو امریکہ کی پہلی خاتون نائب صدر منتخب ہونے کو فخر کی بات بتایا اور اس اعتماد کا اظہار کیا کہ ان کے دور میں ہندوستان اور امریکہ کے مابین تعلقات نئی بلندیوں پر پہنچیں گی۔