فوجی جوانوں اور دہشتگردوں کے درمیان فائرنگ کے تبادلہ میں تین دہشت گرد مارے گئے ہیں جبکہ دیگر دو دہشت گرد یا تو واپس بھاگ گئے یا وہیں کہیں چھپے ہوئے ہیں۔ آپریشن کے دوران چار فوجی جوان بھی زخمی ہوگئے۔

جموں: دفاعی ذرائع کا کہنا ہے کہ ضلع جموں کے اکھنور سیکٹر میں لائن آف کنٹرول پر دراندازی کی ایک کوشش کو ناکام بناتے ہوئے فوج نے کم سے کم تین مسلح دہشت گردوں کو ہلاک کیا ہے۔ جبکہ اس دوران چار فوجی جوان بھی زخمی ہوگئے ہیں۔

مذکورہ ذرائع نے تفصیلات فراہم کرتے ہوئے بتایا کہ اکھنور سیکٹر کے کیری باتل علاقے میں ایل او سی پر منگل اور بدھ کی درمیانی شب پانچ مسلح دہشت گردوں کے ایک گروپ نے در اندازی کرنے کی کوشش کی لیکن وہاں تعینات فوجی جوانوں نے انہیں روکا اور للکارا۔

انہوں نے بتایا کہ اس دوران فوجی جوانوں اور در اندازی کرنے والے دہشتگردوں کے درمیان فائرنگ کا تبادلہ شروع ہوا جس کے نتیجے میں تین دہشت گرد مارے گئے جبکہ دیگر دو دہشت گرد یا تو واپس بھاگ گئے یا وہیں کہیں چھپے ہوئے ہیں۔

مذکورہ ذرائع نے بتایا کہ اس آپریشن کے دوران چار فوجی جوان بھی زخمی ہوگئے جنہیں علاج و معالجے کے لئے ہسپتال منتقل کیا گیا ہے۔ انہوں نے بتایا کہ علاقے میں آپریشن ابھی جاری ہے۔

بتادیں کہ فوجی ذرائع کے مطابق سرحد پار لانچنگ پیڈس پر زائد از تین سو دہشت گرد دراندازی کرنے کی تاک میں بیٹھے ہوئے ہیں۔

مذکورہ ذرائع کا کہنا ہے کہ سال 2020 میں ماضی کے نسبت دہشت گردوں کی طرف سے دراندازی کرنے کی کوششوں میں دس گنا اضافہ درج ہوا۔

امریکی نامزد وزیر دفاع لائیڈ آسٹن نے کہا کہ نو منتخب صدر بائیڈن نے ہمیں درپیش خطرات کے مقابلہ میں ہماری عالمی فوجی طاقت کا ایک جامع جائزہ لینے کا وعدہ کیا تھا۔ اگر اجازت دی جاتی ہے تو میں اس کوشش کی رہنمائی کرنے کے لئے تیار ہوں۔

واشنگٹن: امریکی انتظامیہ جرمنی سے امریکی فوجیوں کی تعداد کم کرنے کے رخصت پذیر صدر ڈونلڈ ٹرمپ کے فیصلے پر نظر ثانی کرے گی۔ منگل کے روز امریکی نامزد وزیر دفاع لائیڈ آسٹن نے یہ اطلاع سینیٹ کی آرمڈ سروسز کمیٹی کو دی۔

انہوں نے کہا ’’نو منتخب صدر بائیڈن نے ہمیں درپیش خطرات کے مقابلہ میں ہماری عالمی فوجی طاقت کا ایک جامع جائزہ لینے کا وعدہ کیا تھا اور اگر اجازت دی جاتی ہے تو میں اس کوشش کی رہنمائی کرنے کے لئے تیار ہوں اور اس بات کی تفتیش کرنا چاہتا ہوں کہ وقت کے ساتھ اس میں کس طرح تبدیلی آنی چاہئے۔ میں نے ابھی تک اس حوالہ سے پوری طرح سے جائزہ نہیں لیا ہے‘‘۔

انہوں نے کہا کہ میرا خیال ہے کہ مجھے اس جائزہ کا حصہ بننا چاہئے۔ اگر اجازت دی جاتی ہے تو میں بھی جائزہ لینا چاہوں گا کہ ٹرمپ انتظامیہ نے جرمنی سے امریکی فوج کی نمایاں تعداد میں واپس لینے کا فیصلہ کیوں کیا؟

ہندوستان نے 1۔2 کی فتح کے ساتھ آسٹریلیائی دورے کا خاتمہ کیا۔ ہندوستان نے اس دورے میں ون ڈے سیریز 2۔1 سےہاری تھی لیکن دوبارہ واپسی کرتے ہوئے ٹی ٹوئنٹی سیریز 1۔2 سے اور ٹیسٹ سیریز 1۔2 سے جیت لی۔

ہندوستان کو اس مقابلے کو جیتنے کے لئے 328 رنوں کا ہدف ملا تھا۔ ٹیم انڈیا نے صبح جب بنا کوئی وکٹ کھوئے چار رنوں سے آگے کھیلنا شروع کیا تو کسی کو توقع نہیں تھی کہ ہندوستان چوتھی اننگز میں اتنے مشکل ہدف کو حاصل کرلے گا لیکن ہندوستانی بلے بازوں نے وہ کرشمہ کر دکھایا جس کا کروڑوں اہل وطن کو انتظار تھا۔ انڈیا نے 97 اووروں میں سات وکٹوں کے نقصان پر 329 رن بنا کر تاریخی فتح درج کرلی۔

ہندوستان کی گابا میدان میں سات ٹیسٹ میچوں میں پہلی جیت

ہندوستان کی گابا میدان میں سات ٹیسٹ میچوں میں یہ پہلی جیت ہے۔ ہندوستان نے اس میدان پر اپنے گزشتہ چھ ٹیسٹ میچوں میں پانچ ہارے تھے اور ایک ڈرا کھیلا تھا۔ گابا میدان میں ہندوستان کی تاریخی فتح کے تین بڑے ہیرو تھے۔ شبھمن، پجارا اور پنت نے میچ کے آخری دن ایسی بلے بازی کی جسے طویل عرصے تک یاد رکھا جائے گا۔

شبھمن نے 146 گیندوں میں آٹھ چوکے اور دو چھکوں کی مدد سے 91 رنوں کی جارحانہ اننگ کھیلی جس نے ہندوستان کو فتح کی بنیاد بنا دیا۔ پجارا نے 211 گیندوں میں سات چوکوں کی مدد سے 56 رن بنائے۔ پجارا کی اس اننگز نے ٹیم انڈیا کو مضبوطی فراہم کی اور پنت نے 138 گیندوں میں نو چوکے اور ایک چھکے کی مدد سے 89 رن بنائے اور میچ میں ہندوستان کی فتح پر مہر لگادی۔

کپتان اجنکیا رہانے نے 24، مینک اگروال نے نو اور واشنگٹن سندر نے 29 گیندوں میں دو چوکے اور ایک چھکے کی مدد سے 22 رن بنائے۔ آسٹریلیا اپنی شاندار گیندبازی کے باوجود ٹیم انڈیا کے حوصلوں کو پست نہیں کر پایا اور ہندوستان نے 1 ۔ 2 کی فتح کے ساتھ آسٹریلیائی دورے کا خاتمہ کیا۔ ہندوستان نے اس دورے میں ون ڈے سیریز 2۔1 سےہاری تھی لیکن دوبارہ واپسی کرتے ہوئے ٹی ٹوئنٹی سیریز 1۔2 سے اور ٹیسٹ سیریز 1۔2 سے جیت لی۔

درمیانی شب کے آس پاس ایک تیز رفتار ڈمپر، گنا سے لدے ایک ٹریکٹر- ٹرالی سے تصادم کے بعد غیر متوازن ہو کر سڑک کنارے سونے والے 20 مزدوروں کے اوپر چڑھ گئی۔ جس سے 15 کی موت ہو گئی۔

سورت: گجرات کے ضلع سورت میں گذشتہ دیر رات ایک بے قابو گاڑی نے سڑک کنارے سونے والے 20 افراد کو کچل دیا، جس سے ان میں سے 15 کی موت ہو گئی۔

پولیس نے آج بتایا کہ یہاں سے تقریباً 50 کلومیٹر دور کِم-مانڈوی روڈ پر کوسنبا کے پلوڈگام کے نزدیک یہ حادثہ ہوا۔

ہلاک ہونے والے بنیادی طور پر راجستھان کے ضلع بانسواڑہ کے کُشل گڑھ کے باشندے مزدور بتائے گئے ہیں۔ ہلاکتوں میں بچے اور خواتین بھی شامل ہیں۔

درمیانی شب کے آس پاس ایک تیز رفتار ڈمپر، گنا لدے ایک ٹریکٹر- ٹرالی سے تصادم کے بعد غیر متوازن ہو کر ان مزدوروں کے اوپر چڑھ گئی۔ ان میں سے 12 کی تو موقع پر ہی موت ہو گئی۔ آٹھ زخمیوں میں سے تین نے سورت کے اسمیمیر اسپتال میں دم توڑ دیا۔

پولیس نے ڈمبپر کو ضبط کرکے اس کے ڈرائیور اور کلینر کو پکڑ لیا ہے۔ بتایا جاتا ہے کہ ڈرائیور نے شراب پی رکھی تھی۔ معاملے کی تفصیلی چھان بین کی جا رہی ہے۔

اس درمیان وزیراعظم نریندر مودی نے اس حادثے پر تکلیف کا اظہار کرتے ہوئے ہلاکتوں کے اہل خانہ کو دو دو لاکھ اور زخمیوں کے لیے 50 ہزار روپے کی امداد کا اعلان کیا ہے۔

رواں ماہ کی شروعات میں وسطی افریقی جمہوریہ میں مختلف حملوں میں اقوام متحدہ مشن کے دو امن فوجی مارے گئے تھے۔

بانگوئی: وسطی افریقی جمہوریہ (سی اے آر) مینوسکا میں اقوام متحدہ مشن کے امن فوجیوں پر حملے میں دو امن کے مندوبین کی موت ہو گئی۔

مینوسکا (MINUSCA) نے ٹویٹر پر یہ اطلاع دی۔ انہوں نے کہا، ’جنوب میں مبومواو صوبے کے بنگسو میں پیر کے روز اتحادیوں کی مسلح گروہ کے قافلے پر داؤں لگا کر حملہ کیا گیا۔

RCA?? |

➔ Deux Casques bleus d'@UN_CAR ont été tués ce lundi près de la ville de Bangassou, dans le sud du pays.

➔ Le chef de la MINUSCA?? @ndiayemankeur condamne une attaque lâche contre des soldats de la paix.@UNPeacekeeping@Lacroix_UN https://t.co/7bK726Q1Vl

— ONU Info (@ONUinfo) January 18, 2021

حملے میں دو امن فوجی گیبونوز اور مراکشی کی موت ہو گئی۔ رواں ماہ کی شروعات میں سی اے آر میں مختلف حملوں میں اقوام متحدہ کے دو امن فوجی مارے گئے تھے۔

زرعی قوانین کے ذریعہ پیدا کردہ بحران کو حل کرنے کے بجائے بی جے پی کی زیرقیادت مرکزی حکومت مشتعل کسانوں اور ان کے حامیوں کو ہراساں اور پریشان کرنے کی کوشش کررہی ہے۔

چنڈی گڑھ: وزیر اعلی پنجاب کیپٹن امریندر سنگھ نے نئے زرعی قوانین کے خلاف جاری جدوجہد میں متعدد کسان رہنماؤں اور ان کے حامیوں کو قومی تحقیقاتی ایجنسی (این آئی اے) کے نوٹس کی مذمت کرتے ہوئے کہا ہے کہ اس طرح کی دھمکیوں سے کسانوں کی لڑائی کو کمزور نہیں کی جاسکتی ہے۔

کیپٹن امریندر سنگھ نے آج یہاں ایک بیان میں کہا ہے کہ آیا یہ کسان بی جے پی کو علیحدگی پسند اور دہشت گرد سمجھتے ہیں۔ انہوں نے مرکز کو متنبہ کیا کہ اس طرح کی ناقص حکمت عملی کسانوں کی جدوجہد کو کمزور نہیں کرے گی بلکہ انھیں سخت موقف اختیار کرنے پر مجبور کرے گی۔

حکومت کسانوں کی جدوجہد کو دبانے پر تلی ہوئی ہے

انہوں نے حکومت ہند کی نیت پر سوال اٹھاتے ہوئے کہا کہ اس طرح کی خوفناک کارروائی کے ذریعے حکومت کسانوں کی جدوجہد کو دبانے پر تلی ہوئی ہے۔ اگر صورتحال ہاتھ سے نکل گئی تو بی جے پی کے طاقتور ترین رہنما بھی اس پر قابو پانے کے لئے کچھ نہیں کرسکیں گے۔

زرعی قوانین کے ذریعہ پیدا کردہ بحران کو حل کرنے کے بجائے بی جے پی کی زیرقیادت مرکزی حکومت مشتعل کسانوں اور ان کے حامیوں کو ہراساں اور پریشان کرنے کی کوشش کررہی ہے۔

کیپٹن امریندر سنگھ نے کہا کہ نہ صرف مرکزی حکومت زرعی قوانین کو واپس نہ لینے پر اٹل ہے بلکہ وہ کسانوں کی آواز دبانے کے لئے توہین آمیز سلوک کر رہی ہے۔ ایک ماہ قبل پنجاب کے کئی بڑے آڑھتیوں کو انکم ٹیکس کا نوٹس بھیجے جانے اور اب این آئی اے کی طرف سے نوٹس بھیجے جانے کا حوالہ دیتے ہوئے انہوں نے کہا کہ یہ کسانوں کو اپنی تحریک واپس لینے کے لئے دباؤ ڈالنے کے لئے کی جارہی ہے۔

حیدرآباد میں ٹماٹر کی قیمتوں میں چارگنا کی کمی درج کی گئی ہے اور موجودہ طور پر ٹماٹر فی کیلو 6 روپے کے حساب سے فروخت کیا جارہا ہے۔ چند ماہ پہلے اس کی قیمت 40 تا 50 روپے فی کیلو ہوگئی تھی۔

حیدرآباد: شہر حیدرآباد میں ٹماٹر کی قیمتوں میں کمی درج کی گئی ہے۔ اس کی اصل وجہ پیداوار میں اضافہ ہے۔ گذشتہ ایک ہفتہ کے دوران باورچی خانہ کی اس اہم شئے کی قیمت میں چارگنا کی کمی درج کی گئی اور موجودہ طور پر ٹماٹر فی کیلو 6 روپے کے حساب سے فروخت کیا جارہا ہے۔

چند ماہ پہلے اس کی قیمت 40 تا 50 روپے فی کیلو ہوگئی تھی۔ ٹماٹر کی قیمت میں کمی سے جہاں کسان فکر مند ہیں وہیں گھریلو خواتین کافی خوش ہیں کیونکہ ٹماٹر اب ان کے بجٹ میں آرہا ہے۔ کسانوں نے تلنگانہ کے اضلاع میں بڑے پیمانہ پر اس کی پیداوار کو قیمت میں کمی کی اہم وجہ قرار دیا جس کے نتیجہ میں حیدرآباد کے ہر مارکٹ میں ٹماٹر سستا دستیاب ہو رہا ہے۔ ایک کسان نے کہا کہ مارچ کے اواخر تک ایسی ہی صورتحال کے برقرار رہنے کا امکان ہے۔

ریاست میں وقارآباد، شاہ میرپیٹ، گجویل، چیوڑلہ کے ساتھ ساتھ رنگاریڈی اور محبوب نگر کے بعض علاقوں میں ٹماٹر کی پیداوار ہوتی ہے۔ ان تمام علاقوں میں اس کی زائد پیداوار ہوئی ہے۔ حیدرآباد اور اس کے اطراف کی مارکٹس میں ٹماٹر کی قیمت میں گراوٹ کے نتیجہ میں کسان برادری پر اس کا منفی اثر دیکھا جا رہا ہے۔

قیمتوں میں اچانک کمی پر کسانوں نے کیا تشویش کا اظہار

مہدی پٹنم رعیتو بازار میں کسان فی کیلو ٹماٹر پانچ روپے کے حساب سے فروخت کر رہے ہیں۔ ان کسانوں نے تشویش کا اظہار کرتے ہوئے کہا کہ انہیں ان کی پیداوار کی منتقلی کی قیمت بھی وصول نہیں ہو رہی ہے۔ ان کسانوں نے قیمتوں میں اچانک کمی پر حیرت کا اظہار کیا ہے۔ کسانوں نے الزام لگایا کہ درمیانی افراد اس قیمت میں اتار چڑھاؤ کے لئے ذمہ دار ہیں۔

شہر حیدرآباد کی شمس آباد مارکٹ میں بھی ایسی ہی صورتحال پائی جاتی ہے جہاں اطراف کے مواضعات کے کسان کم قیمت پر ٹماٹر فروخت کر رہے ہیں۔ مناسب پانی کی وجہ سے جاریہ سال کسانوں نے بڑے پیمانہ پر ٹماٹر اگائے، جس کے نتیجہ میں اس کی قیمت میں گراوٹ ہوگئی ہے۔

اس طرح کسانوں کو ان کی پیداوار پر نقصان اٹھانا پڑ رہا ہے۔ ان کسانوں نے تشویش کا اظہار کرتے ہوئے کہا کہ پیداوار کے لئے لگائی گئی قیمت بھی ان کو وصول نہیں ہو رہی ہے۔

وائٹ ہاؤس کے متوقع چیف آف اسٹاف کلائن نے ایک بیان میں کہا ہے کہ نئی امریکی انتظامیہ اپنے شروعاتی 10 دنوں میں مسٹر ٹرمپ کی جانب سے نافذ پالسیز کو رد کرے گا۔

واشنگٹن: امریکہ کے نو منتخب صدر جو بائیڈنن نے صدر ڈونلڈ ٹرمپ کی جانب سے کئی مسلم ممالک پر نافذ سفری پابندی کو ہٹائے جانے کا منصوبہ بنایا ہے۔ 

الجزیرہ نے اپنی رپورٹ میں یہ اطلاع دی۔ 

رپورٹ کے مطابق وائٹ ہاؤس کے متوقع چیف آف اسٹاف کلائن نے ایک بیان میں کہا ہے کہ نئی امریکی انتظامیہ اپنے شروعاتی 10 دنوں میں مسٹر ٹرمپ کی جانب سے نافذ پالسیز کو رد کرے گا۔ 

ان میں کووِڈ – 19 روک تھام کی کوشش، پیرس موسمیاتی تبدیلی کے معاہدے پر دوبارہ عمل درآمد اور شہریت حاصل کرنے کے لیے امیگریشن قانون کی اجازت دیے جانے سے متعلق پالیسیز شامل ہیں۔

21 جنوری کو وزیر مملکت اور جننائک جنتا پارٹی (جے جے پی) کے رکن اسمبلی انوپک دھانک کے کیمری روڈ، حصار میں واقع رہائش گاہ پر کسان پہنچیں گے اور ان سے استعفی کا مطالبہ کریں گے۔

حصار: مرکز کے تین زرعی قوانین کے خلاف جاری تحریک کے دوران اب وزراء اور ممبران اسمبلی سے گھر گھر جاکر استعفی مانگا جائے گا۔

یہ فیصلہ بھارتیہ کسان یونین چڈھونی گروپ کی جانب سے آج یہاں یونین کے ضلعی صدر کالا کنوہ کی صدارت میں منعقدہ ایک اجلاس میں کیا گیا۔

مسٹر کنوہ نے بتایا کہ 21 جنوری کو وزیر مملکت اور جننائک جنتا پارٹی (جے جے پی) کے ممبر اسمبلی انوپک دھانک کے کیمری روڈ، حصار میں واقع رہائش گاہ پر کسان پہنچیں گے اور ان سے استعفی کا مطالبہ کریں گے۔

انہوں نے بتایاکہ اس کے بعد ضلع کے تمام ممبران پارلیمنٹ اور ممبران اسمبلی سے استعفیٰ طلب کیا جائے گا۔