ملک میں لگاتار دوسرے دن کورونا وائرس کے ایکٹیو کیسز میں اضافہ درج کیا گیا۔ گزشتہ 24 گھنٹوں میں کورونا وائرس کے 41،831 نئے کیسز کی رپورٹ ہوئی ہے۔

نئی دہلی: ملک میں لگاتار دوسرے دن کورونا وائرس (کووڈ 19) کے نئے کیسز کے مقابلہ میں اس سے شفایاب ہونے والے مریضوں کی تعداد کم رہی جس کے سبب ایکٹیو کیسز میں اضافہ درج کیا گیا۔

دریں اثنا ہفتہ کے روز ملک میں 60 لاکھ 15 ہزار 842 افراد کو کورونا ویکسین دی گئی جس سے اب تک ملک میں 46 کروڑ 75 لاکھ 34 ہزار 311 افراد کو ویکسین دی جا چکی ہے۔

اتوار کی صبح مرکزی وزارت صحت کی جانب سے جاری کردہ تازہ ترین اعداد و شمار کے مطابق گزشتہ 24 گھنٹوں میں کورونا وائرس کے 41،831 نئے کیسز کی رپورٹ ہوئی ہے۔ اس کے ساتھ ہی ملک میں کورونا متاثرین کی تعداد تین کروڑ 16 لاکھ 55 ہزار 824 ہو گئی ہے۔

اسی دوران 39 ہزار 258 مریضوں کی صحت یابی کے بعد اس وبا کو شکست دینے والے مریضوں کی کل تعداد بڑھ کر 3،08،20،521 ہوگئی ہے۔ ایکٹیو کیسز 2032 سے بڑھ کر چار لاکھ 10 ہزار 952 ہو گئے ہیں۔ اسی عرصے میں 541 مریضوں کی موت کے باعث ہلاک شدگان کی مجموعی تعداد بڑھ کر چار لاکھ 24 ہزار 351 ہو گئی ہے۔

عالمی ادارہ صحت نے کہا ہے کہ ڈیلٹا ویرینٹ نے کورونا کے خلاف جنگ میں حاصل فائدے خطرے میں ڈال دیے، ڈیلٹا وائرس تیزی سے پھیلتا ہے۔

جنیوا: کورونا وائرس کے ڈیلٹا ویرینٹ کے بارے میں عالمی ادارہ صحت (ڈبلیو ایچ او) نے خبردار کرتے ہوئے کہا ہے کہ یہ ہلاکت خیز وائرس مراکش سے پوری دنیا میں ڈیلٹا ویرینٹ تیزی سے پھیل سکتا ہے۔

ڈبلیو ایچ او نے کہا ہے کہ ڈیلٹا ویرینٹ نے کورونا کے خلاف جنگ میں حاصل فائدے خطرے میں ڈال دیے، ڈیلٹا وائرس تیزی سے پھیلتا ہے۔

عالمی ادارے کا کہنا تھا کہ ڈیلٹا ویرینٹ نہ صرف بچوں بلکہ ایس او پیز کی خلاف ورزی کرنے والے تمام افراد کو نشانہ بناتا ہے۔

ڈبلیو ایچ او کے مطابق 4 ہفتوں میں کیسز میں 80 فیصد اضافہ ہوا، اب تک 132 ملکوں میں ڈیلٹا ویرینٹ پھیل چکا ہے۔

ترکی میں خوفناک آتشزدگی کے باعث اب تک دو فائر فائٹرز سمیت 6 افراد جاں بحق ہوچکے ہیں۔ عالمی خبر رساں ایجنسی کے مطابق صدر رجب طیب اردگان نے متاثرہ علاقوں کے دورے کئے۔

انقرہ: ترکی میں خوفناک آتشزدگی کے واقعات میں ممکنہ سازش پر ترک صدر رجب طیب اردگان نے برہمی کا اظہار کیا ہے۔

عالمی خبررساں ایجنسی کے مطابق صدر رجب طیب اردگان نے متاثرہ علاقوں کے دورے کئے۔ اس موقع پر ان کا کہنا تھا کہ اشارے ملے ہیں کہ آگ لگنے کے واقعات کے پیچھے کوئی سازش ہے۔

ترک صدر نے کہا کہ اگر یہ ثابت ہوا کہ آگ جان بوجھ کر لگائی گئی ہے تو سازشی عناصر کا سینہ چیر دیں گے، چاہے اس کی کچھ بھی قیمت دینا پڑے۔

واضح رہے کہ ترکی کے جنوبی علاقوں میں آتشزدگی کے باعث اب تک دو فائر فائٹرز سمیت 6 افراد جاں بحق ہوچکے ہیں۔

خیال رہے کہ ترکی کی میڈیا رپورٹوں میں بتایا گیا تھا کہ ملک میں خوفناک آتشزدگی کے تخریبی عناصر کار فرما ہیں اور یہ کہ آگ لگی نہیں بلکہ لگائی گئی ہے۔

ملک میں کورونا وائرس (کووڈ 19) کے یومیہ کیسز میں معمولی کمی آئی ہے۔ گزشتہ 24 گھنٹوں میں کورونا کے 41649 نئے کیسز کی آمد کے ساتھ، متاثرہ افراد کی تعداد تین کروڑ 16 لاکھ 13 ہزار 993 ہو گئی ہے۔

نئی دہلی: ملک میں کورونا وائرس (کووڈ 19) کے سامنے آنے والے یومیہ کیسز میں معمولی کمی آئی ہے۔

دریں اثنا، جمعہ کو 52 لاکھ 99 ہزار 36 افراد کو کورونا کی ویکسین لگائی گئی۔ اب تک ملک میں 46 کروڑ 15 لاکھ 18 ہزار 479 افراد کو ویکسین دی جا چکی ہے۔

ہفتہ کی صبح مرکزی وزارت صحت کی جانب سے جاری اعداد و شمار کے مطابق گزشتہ 24 گھنٹوں میں کورونا کے 41649 نئے کیسز کی آمد کے ساتھ، متاثرہ افراد کی تعداد تین کروڑ 16 لاکھ 13 ہزار 993 ہو گئی ہے۔

اس دوران 37 ہزار 291 مریضوں کی صحت یابی کے بعد اس وبا کو شکست دینے والوں کی کل تعداد بڑھ کر 30781263 ہو گئی ہے۔ ایکٹو کیسز 3765 کے اضافے کے ساتھ 4 لاکھ 8 ہزار 290 ہو گئے ہیں۔ اسی عرصے میں 593 مریضوں کی موت کی وجہ سے، اموات کی تعداد بڑھ کر چار لاکھ 23 ہزار 810 ہو گئی ہے۔ ملک میں فعال کیسز کی شرح 1.29 فیصد، ری کوری کی شرح 97.37 فیصد اور اموات کی شرح 1.34 فیصد ہے۔

مہاراشٹر میں، گزشتہ 24 گھنٹوں کے دوران فعال معاملات 1062 کم ہو کر 80871 ہو گئے ہیں۔ دریں اثنا، ریاست میں 7431 مریضوں کی صحت یابی کے بعد، کورونا کو شکست دینے والے لوگوں کی تعداد بڑھ کر 6083319 ہوگئی ہے۔ جبکہ 231 مریضوں کی موت کے باعث اموات کی تعداد بڑھ کر 132566 ہوگئی ہے۔

مدھیہ پردیش کے بھنڈ ضلع ہیڈ کوارٹر جیل کمپلیکس کی دیوار گرنے کے سبب 21 قیدی زخمی ہوگئے، جن میں سے ایک کی حالت نازک ہے۔ ضلع میں دو دنوں سے مسلسل بارش ہو رہی ہے۔

بھنڈ: مدھیہ پردیش کے بھنڈ ضلع ہیڈ کوارٹر جیل کمپلیکس کی دیوار گرنے کے سبب آج صبح 21 قیدی زخمی ہوگئے، جن میں سے ایک کی حالت نازک ہے۔

جیل ذرائع نے کہا کہ صبح تقریباً ساڑھے پانچ بجے جیل کی ایک بیرک کی دیوار اچانک گر گئی۔ اس وجہ سے بیرک میں موجود 21 قیدی زخمی ہوگئے۔ سبھی کو علاج کے لئے ضلع اسپتال بھیجا گیا ہے اور ایک کو سنگین حالت کے پیش نظر گوالیار ریفر کیا گیا ہے۔

ضلع میں دو دنوں سے مسلسل بارش ہو رہی ہے۔ سمجھا جارہا ہے کہ جیل احاطے کی عمارت پرانی ہونے کے سبب اس کی دیوار گری ہے۔

جائے واقعہ شہر کے کوتوالی تھانہ علاقے میں واقع ہے اور اطلاع ملنے پر جیل اور پولیس محکمے کے افسران اور ملازم بھی موقع پر پہنچ گئے ہیں۔

اترپردیش کے بستی ضلع کے سونہا علاقے میں آج ایک پولیس تصادم میں دو شرپسندوں کو گرفتار کیا گیا ہے۔ دو پولیس اہلکار زخمی بھی ہوئے۔

بستی: اترپردیش میں بستی ضلع کے سونہا علاقے میں آج ہوئے پولیس تصادم میں دو بدمعاشوں کو گرفتار کرلیا گیا ہے۔ اس دوران دو پولیس اہلکار بھی زخمی ہوگئے۔ پولیس ذرائع نے یہاں یہ اطلاع دی۔

انہوں نے بتایا کہ سونہا علاقے میں خیرا گاؤں کے نزدیک بائیک سوار دو بدمعاشوں کو پولیس نے روکنے کی کوشش کی۔ خود کو محاصرے میں آتا دیکھ کر بدمعاش پولیس پر فائرنگ کرتے ہوئے فرار ہونے لگے۔ جس میں دو پولیس اہلکار اگرسین چورسیا و سرجیت بند گولی لگنے سے زخمی ہوگئے۔ پولیس کی جوابی فائرنگ میں بھاگ رہے بدمعاش اجے دوبے و رنجیت یادو بھی گولی سے زخمی ہوگئے، جنہیں گرفتار کرلیا گیا۔

انہوں نے بتایا کہ زخمی بدمعاش کے قبضے سے دو پستول، 26 اے ٹی ایم کارڈ، 25 ہزار روپے کی نقدی برآمد کی گئی ہے۔ دونوں افراد اے ٹی ایم کارڈ کی ہیرا پھیری کرکے دوسروں کے کھاتوں سے پیسہ نکالتے تھے۔ زخمی پولیس اہلکاروں و بدمعاشوں کو اسپتال بھیج دیا گیا ہے۔

کمزور عالمی اشاروں کے ساتھ ہی گھریلو سطح پر دھات اور انرجی جیسے گروپ میں ہوئی فروخت کے سبب شیئر بازار آج پھر کمزور ہو کر بند ہوئے۔

ممبئی: عالمی سطح سے ملنے والے کمزور اشاروں کے ساتھ ہی گھریلو سطح پر دھات اور انرجی جیسے گروپ میں ہوئی فروخت کے سبب شیئر بازار آج پھر کمزور ہو کر بند ہوئے۔

بی ایس ای کا 30 شیئر والا سینسری انڈیکس سینسیکس 66.23 پوائنٹس گر کر 52586.84 پوائنٹس پر رہا۔ اس دوران نیشنل اسٹاک ایکسچینج (این ایس ای) کا نفٹی 15.40 پوائنٹس کمزور ہو کر 15763.05 پوائنٹس پر تھا۔

بی ایس ای میں بڑی کمپنیوں میں جہاں فروخت ہوئی وہیں چھوٹی اور درمیانی کمپنیوں میں خرید دیکھی گئی جس سے مڈکیپ 0.52 فیصد بڑھ کر 23087.22 پوائنٹس پر اور اسمال کیپ 0.69 فیصد چڑھ کر 26786.62 پوائنٹس پر رہا۔

بی ایس ای میں شامل گروپ میں سبقت میں رہنے والوں میں ہیلتھ کیئر 2.25 فیصد، یوٹیلٹیز 0.93 فیصد، آٹو 0.86 فیصد اور انڈسٹریل 0.66 فیصد شامل ہیں۔ نقصان میں رہنے والوں میں دھات ایک فیصد اور انرجی 0.77 فیصد شامل ہے۔

سی این بی سی کی رپورٹ کے مطابق فیس بک کی اسمارٹ عینک پہننے پر صارف کی آنکھوں کے سامنے ایک گرافک پر مشتمل ڈسپلے نمایاں ہوگا، صارف ان سے کالز کرسکے گا، اس کے علاوہ اپنی موجودہ جگہ کو لائیو اسٹریم اور دیگر بہت کچھ کرسکے گا۔

واشنگٹن: فیس بک کے بانی مارک زکر برگ نے بالآخر صارفین کا انتظار ختم کرتے ہوئے انہیں اسمارٹ عینک متعارف کروائے جانے کی خوشخبری سنادی۔

حال ہی میں مارک زکر برگ نے صارفین کو یہ بتایا کہ فیس بک کی اگلی پراڈکٹ ’رے بین‘ کی اسمارٹ عینک ہوگی جو کہ EssilorLuxottica کارپوریشن کے اشتراک سے لانچ کروائی جائے گی۔

زکر برگ کے مطابق یہ عینک عام عینکوں کی طرح ہی دکھائی دے گی تاہم یہ عینک کب لانچ ہوگی اور کس طرح کام کرے گی اس حوالے سے تفصیلات نہیں بتائی گئیں لیکن امید کی جا رہی ہے کہ رواں برس کے اختتام تک یہ صارفین کیلئے دستیاب ہوگی۔

سی این بی سی کی رپورٹ کے مطابق فیس بک کی اسمارٹ عینک پہننے پر صارف کی آنکھوں کے سامنے ایک گرافک پر مشتمل ڈسپلے نمایاں ہوگا، صارف ان سے کالز کرسکے گا، اس کے علاوہ اپنی موجودہ جگہ کو لائیو اسٹریم اور دیگر بہت کچھ کرسکے گا۔

رپورٹ کے مطابق یہ اسمارٹ عینک اسمارٹ فون کی جگہ لینے کی اہل ہوگی۔

گزشتہ برس برازیل کے کمپیوٹر سائنسدان ہیوگو برا کی جانب سے اسمارٹ عینک کا ایک ٹیزر جاری کیا گیا تھا جس میں بتایا گیا تھا کہ ٹیکنالوجی کی دنیا میں یہ کس طرح بڑی تبدیلی ثابت ہوگا۔