سپرٹیک کے ٹوئن ٹاورس کو منہدم کرنے میں دھماکہ خیز اشیاء کو اس طرح سے استعمال کیا گیا تھا کہ عمارت میں لگا کنکریٹ، دھماکہ ہوتے ہی دھول میں تبدیل ہوگیا، اس کے بعد پلک جھپکتے ہی ٹوئن ٹاورس دھوئیں کے غبار میں تبدیل ہوگئے
گوتم بدھ نگر: قومی راجدھانی علاقے (این سی آر) دہلی سے منسلک اترپردیش کے ضلع گوتم بدھ نگر کے نوئیڈا سیکٹر 93 اے میں واقع غیر قانونی طریقے سے تعمیر شدہ کثیر منزلہ رہائشی سوسائٹی سپرٹیک کے ‘ٹوئن ٹاورس’ اتوار کو دھماکہ کر زمین دوز کردئیے گئے۔ اس کاروائی میں استعمال کئے گئے دھماکہ خیز مواد کے دھماکے سے کسی طرح کے جان و مال کے نقصان کی فی الحال کوئی اطلاع نہیں ہے۔
سپریم کورٹ کے حکم کے مطابق بدعنوانی کی بنیاد پر تعمیر کئے گئے 32 منزلہ ٹوئن ٹاورس کو نوئیڈا ڈیولپمنٹ اتھارٹی اور ضلع انتظامیہ کی نگرانی میں آج دن میں 2:30 بجے منہدم کیا جانا تھا۔ گھڑی میں ڈھائی بجتے ہی سائرن کی تیز آواز سنی گئی اور اگلے ایک منٹ میں ریموٹ کنٹرول سے کئے گئے دھماکے کے بعد پل بھر میں ٹوئن ٹاور تاش کے پتوں کی طرح بھربھرا کر گرگئے۔
نوئیڈا کے چیف ایگزیکٹو آفیسر رتو مہیشوری نے کہا کہ عمارت گرائے جانے کے بعد موصول تازہ جانکاری کے مطابق ٹوئن ٹاورس کے آس پاس کسی سوسائٹی میں نقصان کی کوئی اطلاع نہیں ہے۔ انہوں نے کہا کہ آس پاس کے علاقے میں سڑکوں پر دھول کی پرت جم گئی ہے۔ اسے صاف کیا جا رہا ہے۔ انہوں نے کہا کہ اگلے ایک گھنٹے میں حالات کا صحیح تجزیہ کیا جاسکے گا۔
محض نو سیکنڈ کے اندر ٹوئن ٹاورس زمین دوز
ان ٹوئن ٹاورس کو منہدم کرنے میں دھماکہ خیز اشیاء کو اس طرح سے استعمال کیا گیا تھا کہ عمارت میں لگا کنکریٹ، دھماکہ ہوتے ہی دھول میں تبدیل ہوگیا۔ اس کے بعد پلک جھپکتے ہی ٹوئن ٹاورس دھوئیں کے غبار میں تبدیل ہوگئے۔ محض نو سیکنڈ کے اندر پوری عمارت زمین دوز ہوگئی اور اس کے ملبے سے اٹھی دھول نے آس پاس 500 میٹر کے علاقے کو ڈھک لیا۔
دھول کے غبارے کے شبہ کے پیش نظر 500 میٹر کے دائرے والی سبھی عمارتوں کو پہلے ہی کپڑے اڑھا دئیے گئے تھے۔ اس کے ساتھ ہی دہلی این سی آر کی بلڈنگ تعمیر کرنے والی کمپنی سپرٹیک کے ٹوئن ٹاورس کے دو بلاک ‘اپیکس اور سیین’ ماضی کا حصہ بن گئے۔ قابل ذکر ہے کہ ضلع انتظامیہ نے ٹوئن ٹاورس کو منہدم کرنے کی ذمہ داری پرائیویٹ سیکٹر کی کمپنی’ اے ڈی فائس’ کو سونپی تھی۔
پانی کے تیز فواروں سے پورے علاقے میں چھڑکاؤ شروع
عمارت کے منہدم ہونے کے کچھ وقت بعد دھول ہٹانے کے لئے نگرنگم کی پہلے سے تعینات اینٹی اسماگ گن سے پانی کے تیز فواروں سے پورے علاقے میں چھڑکاؤ شروع کردیا گیا ہے۔ افسران نے بتایا کہ عمارت کا ملبہ ہٹانے میں تین مہینے کا وقت لگے گا۔
عمارت منہدم ہونے سے کچھ دیر پہلے نوئیڈا کے پولیس کمشنر آلوک کمار نے بتایا کہ پولیس نے ٹوئن ٹاورس کے آس پاس 500 میٹر کے علاقے کو پوری طرح سے خالی کروا لیا تھا۔ انہوں نے کہا ٹوئن ٹاور کو واٹر فال تکنیک سے گرایا گیا۔ اس تکنیک سے ملبہ بکھرتا نہیں ہے۔ بلکہ پانی کی طرح نیچے گرتا ہے۔
اس سے پہلے نوئیڈا۔گریٹر نوئیڈا ایکسپریس وے پر دوپہر 1:30 بجے سے ایک گھنٹے کے لئے آمدورفت کو روک دیا گیا تھا۔ نوئیڈا کے ڈی سی پی (ٹریفک) گنیش نے کہا کہ ڈائیورٹ کئے گئے راستوں کے بارے میں گوگل میپ کو پہلے ہی اپڈیٹ کردیا گیا تھا۔ اس کی مدد سے لوگوں کو بند راستوں کی جانکاری مل جائے گی۔
