شملہ: ہماچل پردیش میں شدید بارش اور لینڈ سلائیڈنگ کی وجہ سے چاروں طرف تباہی کا منظر ہے۔ گزشتہ تین دنوں میں بارشوں کے باعث 71 افراد ہلاک ہو چکے ہیں، جبکہ 13 افراد تاحال لاپتہ ہیں۔ اطلاعات کے مطابق شملہ میں سمر ہل کے قریب شیو مندر کے ملبے سے ایک اور خاتون کی لاش برآمد ہوئی ہے۔

دریں اثنا، وزیر اعلیٰ سکھو نے کہا کہ ہماچل میں شدید بارشوں سے تباہ ہونے والے انفراسٹرکچر کی مرمت میں ایک سال کا وقت لگے گا۔ انہوں نے دعویٰ کیا کہ تقریباً 10000 کروڑ روپے کا نقصان ہوا ہے۔ وزیراعلیٰ نے کہا کہ یہ ایک بڑا چیلنج ہے۔

کئی علاقوں میں حالات خراب ہیں۔ کرشنا نگر میں تقریباً 15 مکانات کو خالی کرا لیا گیا ہے اور خاندانوں کو محفوظ مقامات پر منتقل کر دیا گیا ہے۔ بارش اور لینڈ سلائیڈنگ کے امکان کے پیش نظر کئی لوگوں نے اپنے طور پر گھر خالی کر دئے ہیں۔

موسلادھار بارش کے پیش نظر محکمہ تعلیم نے بدھ کو ریاست کے تمام اسکولوں اور کالجوں کو بند رکھنے کا حکم دیا ہے۔ جبکہ ہماچل یونیورسٹی نے 19 اگست تک تعلیمی سرگرمیاں معطل کر دی ہیں۔

گزشتہ کچھ دنوں سے سیاسی مباحث کے مرکز میں رہے این سی پی (نیشنلسٹ کانگریس پارٹی) کے صدر شرد پوار نے بدھ کو مہاوکاس اگھاڑی (ایم وی اے) کے تئیں اپنی وفاداری دہراتے ہوئے بی جے پی پر تلخ حملہ بولا۔ سبھی سیاسی قیاس آرائیوں کو خارج کرتے ہوئے شرد پوار نے چھترپتی سنبھاجی نگر میں کہا کہ "بی جے پی میں شامل ہونے کا کوئی سوال ہی نہیں ہے۔ میں ایم وی اے کے ساتھ ہوں۔ ہم ممبئی میں آئندہ قومی اپوزیشن اتحاد (اِنڈیا) کی میٹنگ کی تیاری کر رہے ہیں۔”

شرد پوار نے ان خبروں کو خارج کر دیا جس میں دعویٰ کیا گیا تھا کہ ایم وی اے کی ساتھی پارٹی کانگریس-شیوسینا (یو بی ٹی) نے مبینہ طور پر آئندہ لوک سبھا، اسمبلی یا بلدیاتی انتخاب میں این سی پی (شرد پوار) کے بغیر لڑنے کے لیے ‘پلان بی’ یا ‘پلان سی’ تیار کر رکھا ہے۔ شرد پوار نے کہا کہ "ایسی کوئی بات نہیں ہے۔ یہ افواہ صرف میڈیا میں ہے، حقیقت کچھ اور ہے۔ جب میں گزشتہ ہفتے اجیت پوار سے ملا تو انھوں نے میرے لیے ایسی کوئی تجویز نہیں پیش کی۔”

واضح رہے کہ کانگریس لیڈر وجئے وڈیتیوار اور سابق وزیر اعلیٰ پرتھوی راج چوہان نے حال ہی میں کہا تھا کہ بی جے پی اور وزیر اعظم نریندر مودی نے اجیت پوار کے لیے قبل میں شرط رکھی تھی کہ وہ تبھی وزیر اعلیٰ بن سکتے ہیں جب وہ اپنے چچا کو بی جے پی کے ساتھ لانے میں کامیاب ہوں گے۔ انھیں مرکزی کابینہ میں جگہ یا نیتی آیوگ کی صدارت سے نوازا جائے گا۔

بہرحال، بی جے پی اور وزیر اعظم مودی پر نشانہ سادھتے ہوئے شرد پوار نے کہا کہ بھگوا پارٹی لوگوں کے درمیان نفرت پھیلانے میں لگی ہوئی ہے اور اس کے فیصلوں کے نتیجہ کار سماج میں مختلف ذاتوں اور مذاہب کے درمیان تنازعہ یا تلخی پیدا ہوتی ہے۔ پوار نے کہا کہ تحریک عدم اعتماد کے دن پی ایم مودی نے منی پور پر 2 منٹ، اور دیگر ایشوز پر دو گھنٹے تک بات کی۔ انھوں نے نہیں سوچا کہ یہ اہم تھا یا انھیں منی پور جانا چاہیے اور وہاں کے لوگوں کا اعتماد بڑھانا چاہیے۔

سابق مرکزی وزیر دفاع شرد پوار نے آگاہ کیا کہ منی پور چین کی سرحد کے پاس ہے اور اس لیے اس ریاست پر زیادہ توجہ دینے کی ضرورت ہے۔ گزشتہ تین مہینوں سے وہاں جو کچھ بھی ہو رہا ہے، وہ ملک کے لیے خطرناک ہے۔ شرد پوار نے وزیر اعظم مودی کے یومِ آزادی پر دی گئی تقریر کا تذکرہ کیا، جس میں انھوں نے اعلان کیا تھا کہ وہ 2024 میں اقتدار میں لوٹیں گے۔ شرد پوار نے کہا کہ ملک میں موجودہ حالات بی جے پی کی واپسی کے لیے موافق نہیں ہے، چاہے وہ ‘واپس آنے’ کا کتنا بھی دعویٰ کریں ان کا انجام دیویندر فڑنویس جیسا ہی ہوگا۔

این سی پی چیف نے یہ بھی کہا کہ اپوزیشن پارٹیوں کی منتخب ریاستی حکومتوں کو کمزور کرنے کی کوششیں چل رہی ہیں، جیسا کہ گوا، مدھیہ پردیش یا مہاراشٹر اور دیگر جگہ دیکھا گیا۔ انھوں نے مزید کہا کہ عوام اب یہ سب برداشت نہیں کرے گی اور بی جے پی کو سبق سکھائے گی۔

منی پور میں امن کی بحالی کے لیے حکومت کے ذریعہ لگاتار کوششیں ہو رہی ہیں، لیکن اب تک کامیابی نہیں ملی ہے۔ جیسے ہی لگتا ہے کہ ریاست میں کشیدگی کم ہو رہی ہے، ویسے ہی تشدد کی نئی آگ بھڑک اٹھتی ہے۔ کانگریس رکن پارلیمنٹ گورو گگوئی نے بدھ کے روز موجودہ حالات پر اپنا رد عمل ظاہر کرتے ہوئے کہا کہ ’’جب تک لوٹے گئے 6 ہزار اسلحے برآمد نہیں ہو جاتے، تب تک منی پور میں امن کی بحالی ممکن نہیں ہے۔‘‘

گورو گگوئی کا کہنا ہے کہ منی پور میں لوٹے گئے چھ ہزار جدید اسلحے اور چھ لاکھ راؤنڈ گولہ بارود برآمد ہونے تک امن کی بحالی نہیں ہو سکتی۔ انھوں نے صحافیوں سے بات کرتے ہوئے یہ بیان دیا اور کہا کہ ریاست میں 3 مئی سے تشدد جاری ہے۔ یہاں سیکورٹی فورسز سے اسلحے اور گولہ بارود لوٹے گئے ہیں، اب ان اسلحوں کا استعمال ریاست کے عام لوگوں کے خلاف کیا جا رہا ہے۔ گورو گگوئی نے یہ بھی کہا کہ جب دونوں فریقین کے درمیان صلح پر کوئی بات چیت ہی نہیں ہوئی ہے تو پھر ریاست میں امن کی بحالی کیسے ہوگی!

اس درمیان کانگریس رکن پارلیمنٹ نے دعویٰ کیا کہ میتئی اور کوکی دونوں ہی طبقہ وزیر اعلیٰ این بیرین سنگھ سے ناخوش ہے۔ انھوں نے کہا کہ یہ افسوسناک ہے کہ وزیر داخلہ امت شاہ نے پارلیمنٹ میں وزیر اعلیٰ کی پوری حمایت کی۔ سچ تو یہ ہے کہ امن کمیٹیوں میں وزیر اعلیٰ کی موجودگی کے سبب امن مذاکرہ ناکام ہو گیا ہے۔

کالیابور سے رکن پارلیمنٹ گگوئی نے منی پور معاملے پر وزیر اعظم نریندر مودی کو ان کے 15 اگست کے خطاب کے لیے بھی تنقید کا نشانہ بنایا۔ انھوں نے کہا کہ ’’پی ایم مودی نے لال قلعہ سے ملک کو گمراہ کیا ہے۔ جب تک 6 ہزار اسلحے برآمد نہیں ہو جاتے، تب تک ریاست میں امن کی بحالی نہیں ہو سکتی۔‘‘

نئی دہلی: کانگریس نے آج مرکز کی مودی حکومت پر 7 بڑے گھوٹالوں کا شدید الزام عائد کیا۔ کانگریس نے کہا کہ ’’سی اے جی نے مودی حکومت کے سات بڑے گھوٹالوں کا پردہ فاش کیا ہے۔ وزیر اعظم کی ناک کے نیچے دھاندلی ہو رہی ہے۔ جس جھوٹی ایماندار شبیہ کا وزیر اعظم دَم بھرتے تھے اس سے اب پردہ اٹھ چکا ہے۔‘‘

یہ بیان نئی دہلی واقع کانگریس ہیڈکوارٹر میں پریس کانفرنس کرتے ہوئے کانگریس ترجمان سپریا شرینیت نے دیا ہے۔ انھوں نے کہا کہ سی اے جی کے ذریعہ 7 گھوٹالوں کا پردہ فاش ہونے سے مودی حکومت کی بدعنوانی کا سچ دھیرے دھیرے ملک کے سامنے آ رہا ہے۔ وزیر اعظم مودی اپنی ناک کے نیچے ہو رہے گھوٹالوں پر خاموشی توڑیں اور ان گھوٹالوں کو انجام دینے والے بدعنوانوں کے خلاف کارروائی کریں۔

سپریا شرینیت کا کہنا ہے کہ سی اے جی نے بھارت مالہ پروجیکٹ میں فرضی واڑا کی قلعی کھول دی ہے۔ سڑک کی لاگت میں تقریباً 100 فیصد اضافہ کا بھی انکشاف ہوا ہے۔ اس پروجیکٹ کے فنڈ کی اجازت معاشی معاملوں کی کابینہ کمیٹی سی سی ای اے دیتی ہے جس کی صدارت خود وزیر اعظم کرتے ہیں۔ پروجیکٹ میں سی سی ای اے نے 535000 کروڑ روپے کی لاگت پر 34800 کلومیٹر سڑک بنانے کے لیے منظوری دی تھی۔ لیکن اصل میں ٹھیکہ 26316 کلومیٹر کلومیٹر شاہراہ کو ہی دیا گیا، جس کی منظور لاگت 846588 کروڑ روپے تھی۔ جن پروجیکٹس کے لیے 15.37 کروڑ روپے فی کلومیٹر کی لاگت کو منظوری دی گئی، وہ بڑھ کر دوگنی سے بھی زیادہ ہو گئی۔

کانگریس ترجمان نے کہا کہ سی اے جی نے نیلامی کے عمل میں بھی بے ضابطگیوں کو ظاہر کیا ہے۔ کامیاب بولی لگانے والوں نے ٹنڈر کی شرط پوری نہیں کی، فرضی دستاویز کی بنیاد پر انتخاب ہو گیا، تفصیلی پروجیکٹ رپورٹ کے بغیر کام الاٹ ہو گیا۔ علاوہ ازیں سی اے جی نے دوارکا ایکسپریس وے میں زبردست دھاندلی کا انکشاف کیا اور بتایا کہ سڑک بنانے کی قیمت 18 کروڑ روپے فی کلومیٹر سے 250 کروڑ روپے فی کلومیٹر پہنچ گئی۔ سی اے جی نے ٹول اصولوں کی خلاف ورزی کا بھی انکشاف کرتے ہوئے بتایا ہے کہ این ایچ اے آئی نے غلط طریقے سے مسافروں سے 132 کروڑ روپے وصول کیے ہیں۔ اتنا ہی نہیں، سی اے جی نے بتایا ہے کہ ریوینیو کو این ایچ اے آئی کے کنسیشن ایگریمنٹس سے تقریباً 133 کروڑ روپے کا نقصان ہوا ہے۔ یہ آڈٹ ملک کے سبھی ٹول پلازہ کا ہو جائے تو لاکھوں کروڑوں روپے کا غبن سامنے آئے گا۔

سپریا شرینیت نے کہا کہ سی اے جی نے آیوشمان بھارت یوجنا میں ہو رہی دھاندلی کا بھی پردہ فاش کیا ہے۔ اس میں مردہ لوگوں کو زندہ دکھا کر ادائیگی کی گئی ہے اور ایک ہی نمبر سے ساڑھے سات لاکھ مستفیدین کے جڑے ہونے کا فرضی واڑا بھی ظاہر کیا ہے۔ علاج کے دوران 88760 مریضوں کی موت ہو گئی لیکن ان کی موت کے بعد ان سے متعلق 214923 کلیم کی ادائیگی کی گئی۔ کانگریس ترجمان نے پریس کانفرنس میں ایودھیا ڈیولپمنٹ پروجیکٹ کا بھی تذکرہ کیا۔ انھوں نے کہا کہ اس پروجیکٹ میں ٹھیکیداروں کے غلے میں تقریباً 19.73 کروڑ کا غلط طریقے سے نفع پہنچایا گیا۔ اتر پردیش گورنمنٹ کنسٹرکشن کارپوریشن نے ٹھیکیداروں کی تقرری کرتے وقت پرفارمنس گارنٹی کا پورا پیسہ تک نہیں جمع کروایا۔ جن ٹھیکیداروں کا رجسٹریشن رد ہو گیا تھا، ان کو بھی جی ایس ٹی کی ادائیگی ہو گئی، یہاں تک کہ محکمہ آبپاشی نے ٹھیکیداروں کے ذریعہ مجوزہ شرحوں کا تقابلی جائزہ بھی نہیں کیا۔

پریس کانفرنس میں اپنی بات کو آگے بڑھاتے ہوئے سپریا شرینیت نے کہا کہ سی اے جی نے وزارت برائے دیہی ترقیات کی خامیوں کو بھی ظاہر کیا۔ اس وزارت نے ضعیف، معذور اور بیوہ پنشن منصوبوں کا پیسہ دیگر منصوبوں کی تشہیر میں خرچ کر دیا۔ ساتویں گھوٹالے کو ظاہر کرتے ہوئے سی اے جی نے ایچ اے ایل پر طیارہ انجن کے ڈیزائن-پروڈکشن میں خامیوں کا سنگین الزام عائد کیا ہے، جس سے 159 کروڑ روپے کا نقصان ہوا ہے۔ کانگریس ترجمان نے سوال پوچھتے ہوئے کہا کہ وزیر اعظم مودی ان سبھی گھوٹالوں پر خاموشی توڑیں گے یا نہیں؟ کیا وزیر اعظم اپنی سیدھی نگرانی میں ہو رہے بھارت مالہ پروجیکٹ میں دھاندلی پر کارروائی کریں گے؟ کیا سڑک ٹرانسپورٹیشن اور شاہراہ وزارت اور وزیر پر کوئی کارروائی ہوگی؟ آیوشمان بھارت کے مستفیدین کا پیسہ کس نے غبن کیا؟ ایودھیا ڈیولپمنٹ پروجیکٹ میں ٹھیکیداروں کو نامناسب فائدہ کون پہنچا رہا ہے؟ پنشن اسکیم کا پیسہ دیگر منصوبوں کی تشہیر میں کیوں خرچ کیا گیا؟

مہندرا اینڈ مہندرا آنے والے وقت میں ایک وسیع الیکٹرک وہیکل (ای وی) پورٹ فولیو پر اپنی توجہ مرکوز کیے ہوئے ہے۔ کمپنی الیکٹرک گاڑیوں کے اپنے ماڈل کی تعداد بڑھانے پر بھی سنجیدگی سے غور کر رہا ہے۔ ایسی بھی خبریں ہیں کہ بیٹری سے چلنے والے ماڈل کے اندر اور ڈرائیونگ ایکسپیرینس میں اصلاح کی کوششیں بھی ہو رہی ہیں۔ عموماً الیکٹرک گاڑیوں میں کوئی ساؤنڈ نہیں ہوتی ہے، لیکن ایسی گاڑیوں کے ساؤنڈ ایکسپیرینس کو بہتر بنانے کے لیے کمپنی نے مشہور موسیقار اور گلوکار اے آر رحمن کے ساتھ ہاتھ ملانے کا اعلان کیا ہے۔

موصولہ خبروں کے مطابق اے آر رحمن اور مہندرا اینڈ مہندرا کی معاون کمپنی مہندرا الیکٹرک آٹوموبائلز لمیٹڈ کے درمیان اتحاد سے پدم بھوشن اور اکیڈمی ایوارڈ یافتہ موسیقار آئندہ مہندرا ای وی کے لیے تقریباً 75 ساؤنڈس (موسیقی) تیار کریں گے۔ اس میں ڈرائیو ساؤنڈ کے ساتھ ساتھ ایکسپیرینس یا ایمبینٹ موڈ دونوں شامل ہیں۔ اس پروگرام کے لیے اے آر رحمن نے ایک خاص نغمہ بھی تیار کیا ہے۔

قابل ذکر ہے کہ ای وی کے اندر اور اس کے آس پاس کی آوازیں ایک اہم پہلو بنتی جا رہی ہیں۔ ایسا اس لیے کیونکہ ایسی گاڑیاں روایتی گاڑیوں کے مقابلے میں بہت پرسکون ہوتی ہیں، پھر بھی بیٹری سے چلنے والے ماڈل کے لیے مسافروں کو کچھ آواز فراہم کرنا ضروری ہوتا ہے، یا تو الرٹ الارم کی شکل میں یا جو محسوس کرنے والی روش کے ہوتے ہیں۔ پھر ایسی گاڑیوں کی سیکورٹی کو بڑھانے کے لیے کچھ حد تک ایمبینٹ ساؤنڈ کی بھی ضرورت ہوتی ہے۔ اس کی ضرورت اس وقت سب سے زیادہ ہوتی ہے جب یہ پرسکون نظر آنے والی گاڑی سڑک پر پیدل چلنے والے مسافروں اور موٹر ڈرائیورس کے نزدیک آتے ہیں۔

یہی وجہ ہے کہ مہندرا اور اے آر رحمن کے درمیان معاہدہ طے پایا ہے جس سے وہ انٹیریر اور ایکسٹیریر ڈرائیو ساؤنڈ، ایکسپیرینس زون موڈ، انفوٹینمنٹ اشارے اور سیٹ بیلٹ الرٹ اور ٹرن انڈیکیٹرس جیسے فنکشن سگنلز کی دیکھ ریکھ کریں گے۔ اس تعلق سے اے آر رحمن نے کیپ ٹاؤن میں ایک تقریب سے خطاب کرتے ہوئے کہا کہ ’’حالانکہ میں نے جاپان، امریکہ اور یوروپ کی مشینوں کا استعمال کیا ہے، لیکن ہندوستان کو سرکردہ اینوویشن (تجدید) کے ساتھ ایک لیڈر کی شکل میں ابھرتا ہوا دیکھ رہا ہوں، یہ مجھے بہت فخر سے بھر دیتا ہے۔ مہندرا کے ساتھ تعاون میں ہمارا مقصد ایک ایسا ساؤنڈ ایکسپیرینس فراہم کرنا ہے جو عالمی اور خاص طور سے ہندوستانی دونوں ہو، ایک ایسی آواز جو فخر کے ساتھ گونجتی ہے اور ہندوستان کی اہم تبدیلی کا جشن مناتی ہے۔‘‘

نئی دہلی: کانگریس ہائی کمان نے بدھ کو یہاں کانگریس صدر ملکارجن کھڑگے کی صدارت میں لوک سبھا انتخابات کے لئے حکمت عملی تیار کرنے کے لئے ایک میٹنگ منعقد کی جس میں دہلی کانگریس کے سرکردہ لیڈروں نے شرکت کی۔ پارٹی ذرائع کے مطابق کھڑگے کے علاوہ پارٹی کے سابق صدر راہل گاندھی، دہلی کے کانگریس جنرل سکریٹری انچارج دیپک بابریہ، ریاستی صدر انیل چودھری، سینئر لیڈر اجے ماکن، سندیپ دکشت اور کئی اہم لیڈروں نے میٹنگ میں شرکت کی۔

کھڑگے نے بھی اس سلسلے میں معلومات دیتے ہوئے کہا کہ ‘لوک سبھا انتخابات کے پیش نظر آج دہلی کانگریس کے لیڈروں کے ساتھ مشاورت کی گئی۔ دہلی کانگریس کا نیا رابطہ ہماری ترجیح ہے، جس میں تمام لیڈروں اور کارکنوں کی شرکت ضروری ہے۔ ہم نے دہلی کو خوشحال بنایا تھا اور آگے بھی دہلی کے لوگوں کے لیے ہماری جدوجہد جاری ہے۔

گاندھی نے یہ بھی کہا کہ "آج کانگریس صدر ملک ارجن کھڑگے کی قیادت میں دہلی کانگریس لیڈروں کے ساتھ ایک میٹنگ ہوئی۔ کانگریس پارٹی دہلی کے لوگوں کی آواز بلند کرنے اور ریاست کی ترقی کے لیے ہر قدم اٹھانے کے لیے وقف ہے۔

عدالت عظمیٰ نے 16 اگست کو ایک ہینڈبک ریلیز کیا ہے جس میں ایسے الفاظ کا ذکر ہے جو جنسی قدامت پسندی کو قائم رکھتے ہیں۔ قابل ذکر بات یہ ہے کہ ان جنسی قدامت پسندی والے الفاظ کا عدالت میں استعمال کرنے سے پرہیز کیے جانے کی تلقین کی گئی ہے۔ ایسے الفاظ میں افیئر (معاشقہ)، ہاؤس وائف (خاتون خانہ)، پراسٹیٹیوٹ (طوائف) اور ایو ٹیزنگ (چھیڑخانی) وغیرہ شامل ہیں۔

اس تعلق سے چیف جسٹس ڈی وائی چندرچوڑ نے کہا کہ اس ہینڈبک کے ذریعہ یہ جاننے میں مدد ملے گی کہ کون سے الفاظ قدامت پسند ہیں اور ان سے کیسے بچا جا سکتا ہے۔ انھوں نے کہا کہ اس ہینڈ بک میں ان قابل اعتراض الفاظ کی فہرست موجود ہے، ساتھ ہی ان کی جگہ استعمال کیے جانے والے الفاظ کے بارے میں بھی بتایا گیا ہے۔

چیف جسٹس ڈی وائی چندرچوڑ کا کہنا ہے کہ قدامت پسندی والے الفاظ کی جگہ ایسے الفاظ دیے گئے ہیں جن کو عدالت میں دلیلیں پیش کرنے، حکم صادر کرنے اور اس کی کاپی تیار کرنے میں استعمال کیا جا سکتا ہے۔ یہ ہینڈ بک وکیلوں کے ساتھ ساتھ ججوں کے لیے بھی ہے۔ اس ہینڈ بک میں ان الفاظ کے بارے میں بتایا گیا ہے جو اب تک عدالت میں استعمال کیے گئے۔ ساتھ ہی یہ بھی بتایا گیا ہے کہ یہ لفظ غلط کیوں ہیں۔ اس کی مدد سے خواتین کے خلاف قابل اعتراض زبان کے استعمال سے بھی بچ سکیں گے۔

میڈیا رپورٹس کے مطابق جاری کردہ ہینڈبک میں افیئر کی جگہ پر شادی کے باہر رشتہ، پراسٹیٹیوٹ/ہوکر کی جگہ سیکس ورکر، اَنویڈ مدر (بن بیاہی ماں) کی جگہ صرف ماں، چائلڈ پراسٹیٹیوٹ کی جگہ پر اسمگلنگ کر کے لایا گیا بچہ، باسٹرڈ (حرامی) کی جگہ ایسا بچہ جس کے والدین نے شادی نہ کی ہو، ایو ٹیزنگ کی جگہ اسٹریٹ سیکسوئل ہراسمنٹ، ہاؤس وائف کی جگہ ہوم میکر، مسٹریس کی جگہ وہ خاتون جس کے ساتھ کسی مرد نے شادی سے الگ رومانی یا جنسی تعلقات بنائے ہوں… کا استعمال کرنے کو کہا گیا ہے۔

گوہاٹی: یوم آزادی کی تقریبات کے دوران گوہاٹی میں پارٹی ہیڈکوارٹر پر ترنگے کو الٹا لہرانے کے الزام میں آسام بی جے پی کے صدر بھابیش کلیتا کے خلاف ایف آئی آر درج کی گئی ہے۔

پولیس ذرائع کے مطابق تین لوگوں نے منگل کی شام ناگاؤں صدر پولیس اسٹیشن میں شکایت درج کرائی، جس میں کلیتا پر ملک مخالف سرگرمیوں میں ملوث ہونے کا الزام عائد کیا۔

انہوں نے دعویٰ کیا کہ ریاستی بی جے پی لیڈر اس حقیقت سے واقف تھے کہ ترنگا الٹا رکھا گیا تھا اور پھر بھی انہوں نے اسے لہرایا۔جب جھنڈا الٹا لہرانے کی نشاندہی کی گئی تو اس کی اصلاح کی گئی۔

اس واقعہ پر ردعمل ظاہر کرتے ہوئے، کلیتا نے بدھ کو آئی اے این ایس کو بتایا، "پارٹی کارکنان جو جھنڈا لہرانے کے انچارج تھے، وہ اس بات سے بے خبر تھے کہ اسے الٹا لہرایا گیا ہے۔ اس کی وجہ سے ہمارے علم میں لائے بغیر اسے الٹا کر دیا گیا۔”

وزیر اعظم نریندر مودی نے 15 اگست کے موقع پر لال قلعہ سے ’وشوکرما یوجنا‘ کا اعلان کیا تھا۔ اس اعلان کے 24 گھنٹے کے اندر، یعنی محض ایک روز بعد ہی مرکزی حکومت سے منظوری مل گئی ہے۔ میڈیا ذرائع کے مطابق بدھ کو ہوئی مرکزی کابینہ کی میٹنگ میں ’وشوکرما یوجنا‘ پر مہر لگا دی گئی۔ 2024 کے لوک سبھا انتخاب سے قبل مودی حکومت کے اس منصوبہ کے ذریعہ او بی سی طبقہ کو خوش کرنے کی کوشش ہو رہی ہے۔

موصولہ خبروں میں بتایا جا رہا ہے کہ اس ’وشوکرما یوجنا‘ کو ستمبر میں وشوکرما جینتی کے دن لانچ کیا جائے گا۔ مرکز کے اس منصوبہ کا مقصد سنار، راج مستری، نائی، لوہار جیسے کام کرنے والے لوگوں کو مدد پہنچانا ہے۔ لال قلعہ سے پی ایم مودی نے اعلان کرتے ہوئے کہا تھا کہ شروع میں اس منصوبہ کو 15 ہزار کروڑ روپے کے بجٹ کے ساتھ لانچ کیا جائے گا اور بعد میں اسے بڑھایا جائے گا۔ لانچنگ کے وقت مرکزی حکومت اس منصوبہ کے بارے میں تفصیلی جانکاری دے گی۔

واضح رہے کہ 15 اگست کو جب وزیر اعظم نریندر مودی نے لال قلعہ سے ملک کو خطاب کیا تھا تب انھوں نے کچھ اہم اعلانات کیے تھے۔ وشوکرما یوجنا کے علاوہ پی ایم مودی نے ’لکھ پتی دیدی‘ منصوبہ سے متعلق بھی اہم جانکاری دی تھی۔ پی ایم مودی نے بتایا تھا کہ حکومت کا ہدف 2 کروڑ لکھ پتی دیدی بنانے کا ہے۔ اس کے ذریعہ دیہی خواتین کو ڈرون چلانے اور اس کا استعمال کرنے کی ٹریننگ دی جائے گی۔ اس کا خصوصی استعمال ایگریکلچر سیکٹر میں ہوگا۔

رانچی: کانگریس لیڈر راہل گاندھی کو جھارکھنڈ ہائی کورٹ سے ‘مودی کنیت’ تبصرہ سے متعلق معاملے میں بڑی راحت ملی ہے۔ جسٹس ایس کے دویدی کی عدالت نے انہیں رانچی کی خصوصی ایم پی-ایم ایل اے عدالت میں اس معاملے کی سماعت کے دوران جسمانی طور پر حاضر ہونے سے استثنیٰ دیا ہے۔

اس معاملے کا نوٹس لیتے ہوئے رانچی کی خصوصی ایم پی-ایم ایل اے کورٹ نے راہل گاندھی کو پیش ہونے کا حکم دیا تھا۔ اس عدالت نے راہل گاندھی کی ذاتی حاضری سے استثنیٰ کی درخواست کو بھی خارج کر دیا تھا۔ دریں اثنا، راہل گاندھی نے خصوصی ایم پی-ایم ایل اے کورٹ کے حکم کے خلاف جھارکھنڈ ہائی کورٹ میں عرضی داخل کی، جس پر آج دوسری سماعت ہوئی۔

انہوں نے سی آر پی سی (ضابطہ فوجداری) کے سیکشن 205 کے تحت جسمانی جانچ سے استثنیٰ طلب کیا تھا۔ پچھلی سماعت کے دوران ہائی کورٹ نے راہل گاندھی کے خلاف کسی بھی قسم کی سخت کارروائی کرنے سے روکتے ہوئے اس معاملے میں شکایت کنندہ پردیپ مودی سے جواب طلب کیا تھا۔

بدھ کو دونوں فریقوں کے دلائل سننے کے بعد ہائی کورٹ نے راہل گاندھی کو ذاتی حاضری سے مستثنیٰ قرار دے دیا۔ راہل گاندھی کی جانب سے پیوش چتریش اور دیپانکر رائے نے اپنا موقف پیش کیا۔

خیال رہے کہ یہ مقدمہ رانچی کے رہنے والے پردیپ مودی نے دائر کیا تھا۔ اس میں کہا گیا ہے کہ گزشتہ لوک سبھا انتخابات کے دوران، راہل گاندھی ایک انتخابی میٹنگ سے خطاب کرنے کے لیے رانچی آئے تھے، اس وقت انھوں نے مودی کنیت والے لوگوں پر تبصرہ کیا تھا۔ پردیپ مودی کا کہنا ہے کہ اس سے ان کے اور مکمل برادری کے جذبات مجروح ہوئے ہیں۔ یہ ہتک عزتی کا مقدمہ ہے۔